Yaolsuv 16

Yaolsuv 16

Eilphaqlaqyinq nail jeq-e dai khi Maqnaqseiq nail jeq-e bhai bhoil bhiq-a nail miltsaq jaiqbhoil

1 Yaolsai nail jeq-e-i mail jaiqbhoil ya-a nail miltsaq nail milkhaiq neq, Yeiqlilkhol meenq nail ulcuvq eelbev dov nail nlma dov khoeq phao khe Yaoldaq laoljaol nee daq-n khi, haqtsoiq haqyal nee lai ceiv-a nail nee ovqtavq, Bheiqtaqlav nail gaoqjaoq juq phao lai-a nail ngaol.

2 A bhai nee ngal-aq, Lulsav dai iqsanl khul nail Bheiqtaqlav meenq nee mail, Aqtaqlol meenq bha ail jel khi, Aqkhil nail jeq-e jaol nail miltsaq bha ail kev-a nail ngaol.

3 Al ovqtavq, nlma ga khoeq phao gaoq yavq kha lee khi, Yaqpheiqlaqthil nail jeq-e jaol nail miltsaq bhai jiav nail pul-nvq phao khe Bheiqtaq Hoqlonq meenq bhai gaoq lee khi, Geiqsaqlav meenq bha gaoq ail-a nail nee ovqtavq, Meildiqtiqlav iqyaq iqma bhai daoqloi loi lai-a nail ngaol.

4 Al heel ngel-i mail, Yaolsai nail yaqyov pevq nail Maqnaqseiq nail jeq-e dai khi Eilphaqlaqyinq nail jeq-e jaiqbhoil al hai ya-a nail ngaol.

Eilphaqlaqyinq nail jeq-e bhai jaiqbhoil bhoil bhiq-a nail miltsaq

5 Eilphaqlaqyinq nail jeq-e-i mail yovqgavq nail ildaoq yovqgavq ya-a nail miltsaq neq, niil juq ngaol.

Nlma dov khoeq phao khe aqyu juq nail milkhaiq, Aqtaqlol Aqdaqlav meenq nee mail daq-n khi, pultavq phao khe Bheiqtaq Hoqlonq nail meenq bhai ail-a nail nee ovq tavq,

6 Meildiqtiqlav iqyaq iqma bha ail kev-a nail ngaol. A bhai nee ngal-aq, pultavq phao jiav nail Milkaqmeiqtaq meenq nee mail, nlma dov khoeq phao jiav nail Thaqnaq Sillaol meenq phao gaoq kovq lee khi, nlma dov khoeq phao jiav nail Yaqnoq-aq meenq bha lee-a nail ngaol.

7 A bhai nee pul-nvq phao gaoq yavq kha lee khi, Aqtaqlol meenq dai khi, Naqlaq meenq phao nee, Yeiqlilkhol meenq bha gaoq lai jel nail phao nee, Yaoldaq laoljaol bhai daoqloi loi lai-a nail ngaol.

8 Al ovqtavq, milkhaiq neq, Taqpuq-aq meenq nee mail nlma ga khoeq phao gaoqjaoq nvq gaiqlaq khe il nail Kaqnav laoljaol bha kev khi Meildiqtiqlav iqyaq iqma bhai daoqloi loi lai-a nail ngaol. Al juq iqsanl mail neq, Eilphaqlaqyinq nail jeq-e-i mail yovqgavq nail ildaoq yovqgavq, teevq daoq gil haq teevq daoq ya-a nail miltsaq jaiqbhoil juq pevq nail ngaol.

9 Al ovqtavq, aqyu juq-i mail miltsaq jaiqbhoil ya-a nail lavqkhoel nee, Eilphaqlaqyinq nail jeq-e bhai, bhoil pav-ai bhiq thaq nail Maqnaqseiq nail jeq-e nail lavqkhoel khe, meenq juq dai khi julgu juq iqsanl aol nail ngaol.

10 Aqyu juq neq, Geiqsaqlav meenq bhai jaol nail Khaqnanq nail jeq-e bhai maq the dov-a nail ngel-i mail, aqyu juq nail lavqkhoel bhai yaqkav jiovq khi mail yaq n n-gaol kev dai jaol nail ngaol.