Yaolsuv 13
Gaq lai khi ya oil-ai haq nail miltsaq juq
1 Yaolsuv neq, joiqmaoq maoq ail-u phao, Heeqphaq Miqyail, Yaolsuv bhai niail hai ge bhiq-a nail ngaol: "Naol joiqmaoq maoq lee-aoq nail ngaol. Thail hai ngaol-aoq, ya gaq lai nail miltsaq mao dai jail-ai haq nail ngaol.
2 Miltsaq al juq neq, Philliltiv nail milkhaoq teevq khaoq khaoq lao, Geiqsullav nail milkhaoq teevq khaoq khaoq lao bhai aol nail niil juq pevq nail ngaol.
3 Iljiltuv nail milkhaoq nail nl ma dov khoeq phao jiav nail Silhoqlav laoljaol nee mail, pultavq phao jiav nail Eilkaqlonq nail milkhaiq bha kev dai kev nail ngaol. Al juq iqsanl mail, Khaqnanq nail milkhaoq dai, ge kivq khi Pilliltiv nail heeqphaq ngaq gaq uv thaiq nail ngaol. Heeqphaq al ngaq gaq-i mail jaol nail meenq neq, Gaqsaq nail meenq, Aqsaqdoq nail meenq, Aqsaqkheiqlonq nail meenq, Gavq nail meenq, Eilkaqlonq nail meenq, niil juq pevq nail ngaol. Al ovqtavq, pul-nvq bhai jiav nail Aqwil nail miltsaq,
4 Khaqnanq nail milkhaoq teevq khaoq khaoq lao nail lavqkhoel bhai aol nail Sildonq nail jeq-e jaol nail Aqlaq meenq nee mail, Aqmaolliv nail jeq-e nail milkhaiq bhai jiav nail Aqphail meenq bhai kev dai, kev nail ngaol.
5 Al ovqtavq, Geiqbhaq nail jeq-e nail miltsaq, nlma dov khoeq phao jiav nail Leiqbhaqnonq nail gaoqjaoq juq dai khi Heiqlaqmonq gaoqjaoq nail pul-nvq khe Bhaqlal Gavq meenq nee mail Haqmal nail gaoqjaoq bha kev dai kev nail ngaol. Al juq iqsanl mail jail-ai haq nail ngaol.
6 Al ovqtavq, jail-aiq haq nail, Leiqbhaqnonq gaoqjaoq juq nee mail Milsaqleiqphaoltaq Maqyinq meenq nail gaiqlaq bhai jaol nail Sildonq nail jeq-e juq bhai gail, ngal Ilsaqleiqlav nail tsaol-aq juq nail sivtavq nee the dov bhiq nail ngaol. Ngal naoq bhai daoq bivq-ai thaq nail khe-ai, miltsaq niil juq iqsanl mail Ilsaqleiqlav nail tsaol-aq juq nail haqbhoil jaiqbhoil ya bhoil bhiq nail ngaol.
7 Al heel ngel-i mail, niil aq-il naol neq Ilsaqleiqlav nail jeq-e goiq jeq-e dai khi Maqnaqseiq nail jeq-e teevq gaol pav bhai miltsaq niil ya bhoil pav bhiq nail ngaol" dai, ge bhiq-a nail ngaol.
Yaoldaq laoljaol nail nlma dov khoeq phao jiav nail miltsaq bhai bhoil pav-a nail ganl
8 Aq-u phao, Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav juq neq Yaoldaq laoljaol nail nlma dov khoeq phao jiav nail miltsaq bhai Heeqphaq Miqyail nail yaqkav Maolseiq-i mail jaiqbhoil bhoil bhiq-a nail khe-ai ya-a nail ngaol.
9 Aqyu juq-i mail ya-a nail miltsaq neq, gaoqjaoq nvq gaiqlaq khe Aqnonq laoljaol daolbhaq bhai jiav nail Aqlaoqeiq meenq dai khi laoljaol daolbhaq khe jiav nail meenq teevq meenq nee mail daq-n-a nail ngaol. Al nail lavqkhoel bhai Meiqdaqbhal nail daikhaoq nee daq-n khi Dilbhaoq meenq iqsanl aol nail ngaol.
10 Heiqsaqbhonq meenq bhai uv thaiq nail Aqmaolliv heeqphaq Silhonq nail meenq juq iqsanl mail aol khi Aqmonq milkhaiq bha kev dai, eeq nail ngaol.
11 Al ovqtavq, Gillav milkhaoq, Geiqsulliv nail jeq-e nail miltsaq, Maqkhaq nail jeq-e nail miltsaq, Heiqlaqmonq gaoqjaoq teevq jaoq jaoq lao dai khi Seiqleiqkhaq miltsaq bha kev dai eeq nail Bhaqsanq milkhaoq teevq khaoq khaoq lao iqsanl aol nail ngaol.
12 Al juq iqsanl mail neq, Aqsaqtaqlol nail meenq dai khi Eillilyil meenq bhai uv thaiq nail daq moe moe nail Leiqphaqinq nail tsaol-aq nail lavqkhoel khe haoqnao naosaq khe jail nail gaq pevq nail heeqphaq Aolgav nail miltsaq pevq nail ngaol. Gaq-u, Maolseiq neq aqyu juq bhai genl dev gaq khi aqyu juq nail miltsaq oil-a nail ngaol.
13 Thail hai ngaol-aoq Ilsaqleiqlav nail tsaol-aq juq neq, Geiqsulliv nail jeq-e dai khi Maqkhaq nail jeq-e bhai maq the dov-a nail ngel-i mail, aqyu juq neq yaq n n-gaol kev dai, Ilsaqleiqlav nail tsaol-aq juq nail lavqkhoel bhai jaol nail ngaol.
14 Maolseiq neq, Leiqbhil nail jeq-e bhai miltsaq jaiqbhoil maq bhoil bhiq-ail ceevq-al. Khul khi mail dai ngal-aq, Heeqphaq Miqyail aqyu juq bhai ge bhiq-a nail khe-ai, aqyu juq neq Ilsaqleiqlav nail tsaol-aq juq nail Heeqphaq Miqyail bhai laolduq kovtavq bha miqjaq kheq khi laol bhiq nail lavqkhoel khe, aqyu juq nail haqbhoil jiav nail ngaol.
Lulbheiq nail jeq-e bhai jaiqbhoil bhoil bhiq-a nail miltsaq
15 Maolseiq neq Lulbheiq nail jeq-e nail haqbhoil yovqgavq nail ildaoq yovqgavq, teevq daoq gil haq teevq daoq miltsaq jaiqbhoil niail hai bhoil-ail ceevq bhiq-a nail ngaol.
16 Aqyu juq-i mail ya-a nail jaiqbhoil al neq, gaoqjaoq nvq gaiqlaq khe Aqnonq laoljaol daolbhaq bhai jiav nail Aqlaoqeiq meenq dai khi laoljaol daolbhaq bhai jiav nail meenq teevq meenq, Meiqdaqbhal meenq aqjail bhai jiav nail daikhaoq teevq khaoq khaoq lao,
17 Heiqsaqbhonq meenq dai khi daikhaoq bhai jiav nail meenq juq pevq nail Dilbhonq nail meenq, Bhaqmol Bhaqlal nail meenq, Bheiqtaq Bhaqlal Maonq meenq,
18 Yaqhaqsal nail meenq, Kheiqdeiqmov nail meenq, Meiqphal meenq,
19 Kiqlilyaqthaqyinq nail meenq, Silbhaqmaq nail meenq, gavqlaovq pultavq gaoqjaoq bha jiav nail Seiqleiqtha Saqhaqlav meenq,
20 Bheiqtaq Peiqoqlav nail meenq, Pilsaqgaq gaoqjaoq bhaqga dai khi Bheiqtaq Yeiqsilmoq meenq niil juq pevq nail ngaol.
21 Al ovqtavq, daikhaoq bhai jiav nail meenq juq iqsanl mail dai khi, Heiqsaqbhonq meenq bhai uvthaiq nail Aqmaolliv heeqphaq Silhonq nail milkhaoq teevq khaoq khaoq lao kheq nail ngaol. Aq-u Maolseiq neq, heeqphaq al dai khi, Mildanq nail aqivq juq pevq nail Eilwil, Leiqkhainq, Tsullav, Hullav dai khi Leiqbhaq niil juq bhai genl dev gaq khi heivq-a nail ngaol. Aqivq al ngaq gaq neq, heeqphaq Silhonq nail miltsaq bhai jaol khi aqtsaoq juq pevq nail ngaol.
22 Ilsaqleiqlav nail tsaol-aq juq-i mail heivq-a nail lavqkhoel bhai neq, Bheiqaoq nail yaqyov maivmaol maol nia nail saqlaq Bhaqlanq gail kheq nail ngaol.
23 Lulbheiq nail jeq-e-i mail ya-ai thaq nail miltsaq nail milkhaiq neq, Yaoldaq laoljaol nail daolbhaq pevq nail ngaol. A bhai khe meenq juq dai khi julgu juq iqsanl mail neq, Lulbheiq nail jeq-e juq, yovqgavq nail ildaoq yovqgavq, bhoil bhiq-a nail miltsaq jaiqbhoil juq iqsanl pevq nail ngaol.
Gavq nail jeq-e bhai jaiqbhoil bhoil bhiq-a nail miltsaq
24 Maolseiq neq Gavq nail jeq-e nail haqbhoil yovqgavq nail ildaoq yovqgavq, teevq daoq gil haq teevq daoq, miltsaq jaiqbhoil niail hai bhoil-ail ceevq bhiq-a nail ngaol.
25 Aqyu juq nail miltsaq neq, Yaqseiqlav nail miltsaq dai khi Gillav milkhaoq khe jiav nail meenq juq iqsanl mail kheq nail nee ovqtavq, Laqbhaq meenq nail aqjail bhai jiav nail Aqlaoqeiq meenq bha kev dai eeq nail Aqmonq milkhaoq teevq pav iqsanl kheq nail ngaol.
26 Al ovqtavq, Heiqsaqbhonq meenq nee mail Laqmaq Milsaqbhaq meenq dai khi Bheiqtaolninq meenq bha kev dai maqkhaiq, Maqhaqneinq meenq nee mail Deiqbhillav milkhaiq bha kev dai maqkhaiq, eeq nail ngaol.
27 Yaoldaq nail gavqlaovq bha jiav nail Bheiqtaq Haqlanq nail meenq, Bheiqtaq Nilmaqlav nail meenq, Sulkov nail meenq, Saqphonq meenq dai khi Heiqsaqbhonq nail heeqphaq Silhonq nail miltsaq nee mail jail nail miltsaq iqsanl mail kheq nail ngaol. Miltsaq al juq iqsanl mail neq, Yaoldaq laoljaol nail nlma dov khoeq phao khe, Gaqliqlail ngaqkha bha kev dai eeq nail ngaol.
28 Meenq dai khi julgu al juq iqsanl mail neq, Gavq nail jeq-e juq, yovqgavq nail ildaoq yovqgavq, bhoil bhiq-a nail jaiqbhoil juq pevq nail ngaol.
Maqnaqseiq nail jeq-e teevq pav bhai bhoil bhiq-a nail miltsaq
29 Maolseiq neq Maqnaqseiq nail jeq-e jail nail teevq pav nail haqbhoil yovqgavq nail ildaoq yovqgavq teevq gaq gil haq teevq dao, miltsaq jaiqbhoil niail hai bhoil-ail ceevq bhiq-a nail ngaol.
30 Aqyu juq nail miltsaq neq, Maqhaqneinq meenq nee mail, Bhaqsanq nail heeqphaq Aolgav-i mail uv thaiq nail milkhaoq teevq khaoq khaoq lao bha kev dai kev khi, milkhaoq al khaoq nail lavqkhoel bhai jiav nail Yaq-illav nail julgu 60 gu iqsanl kheq nail ngaol.
31 Gillav nail milkhaoq teevq gaol pav dai khi, heeqphaq Aolgav-i mail uvthaiq nail Bhaqsanq milkhaoq nail meenq daoqthaoq pevq nail Aqsaqtaqlol meenq dai khi Eillilyil meenq juq gail kheq nail ngaol. Niil juq neq, Maqnaqseiq nail yaqyov Maqkhillav nee mail yavq kha lee thaq nail yaq juq teevq gaol pav-i mail yovqgavq nail ildaoq yovqgavq ya-a nail miltsaq juq pevq nail ngaol.
32 Al juq iqsanl mail neq, Maolseiq-i mail jaiqbhoil bhoil pav bhiq-a nail phaq pevq nail ngaol. Al neq, aivq Yeiqlilkhol meenq nail nlma dov khoeq phao jiav nail Yaoldaq laoljaol nail a phao lelkhel bhai jiav nail Maolbav nail daikhaoq bhai jaol-u phao, bhoil pav bhiq-a nail ngaol.
33 Maolseiq neq Leiqbhil nail jeq-e bhai miltsaq maq bhoil bhiq-al. Khul khi mail dai ngal-aq, Ilsaqleiqlav nail Heeqphaq Miqyail ge bhiq-ai thaq nail khe-ai, aivq nail aqmaol neq, aqyu juq nail haqbhoil jaiqbhoil pevq nail ngaol.