Yaolsuv 14
Yaoldaq laoljaol nlma ga khoeq phao khe miltsaq bhai bhoil pav-a nail ganl
1 Niil juq iqsanl mail neq, Khaqnanq milkhaoq bhai Ilsaqleiqlav nail tsaol-aq juq-i mail jaiqbhoil bhoil-a nail miltsaq ngaol. Philma Eilleiqaqsaq, Nunq nail yaqyov Yaolsuv dai khi Ilsaqleiqlav nail jeq-e juq lavqkhoel khe aqivq aqtsu juq neq, miltsaq niil juq bhai bhoil bhiq-a nail ngaol.
2 Heeqphaq Miqyail Maolseiq bhai daoq bivq-ai thaq nail khe-ai, aqyu juq eellaoq bheq khi miltsaq al bhai Ilsaqleiqlav nail jeq-e goiq jeq-e ovqtavq teevq pav bhai jaiqbhoil bhoil bhiq-a nail ngaol.
3 Aq-u Maolseiq neq, Ilsaqleiqlav nail jeq-e nvq jeq-e ovqtavq teevq pav bhai Yaoldaq laoljaol nail nlma dov khoeq phao jaiqbhoil bhoil bhiq-a nail ngaol. Leiqbhil nail jeq-e bhai neq, miltsaq maq bhoil bhiq-al.
4 Yaolsai nail jeq-e neq, Maqnaqseiq dai khi Eilphaqlaqyinq nail jeq-e nvq jeq-e pevq lal-a nail ngaol. Leiqbhil nail tsaol-aq juq neq, aqyu juq jaol nail galduq meenq juq dai khi aqyu juq nail jaiqyaq bhi gav jaq nail galduq aqduq ya-al teevq-eel ngaol.
5 Al heel ngel-i mail, Heeqphaq Miqyail Maolseiq bhai daoq bivq-ai thaq nail khe-ai, Ilsaqleiqlav nail tsaol-aq juq neq, miltsaq bhoil pav-a nail ngaol.
Kaqlaiv bhai Heiqbhonq meenq bhoil bhiq-a nail ganl
6 Aqyu juq Gillavgaqlav nail aqduq bhai jaol-u phao, Yuldav nail jeq-e teevq pav ga nav juq neq, Yaolsuv bha moel lal-a nail ngaol. Aqyu juq nail lavqkhoel khe Keiqniqsil nail tsaol-aq Yeiqphuqnaiq nail yaqyov Kaqlaiv neq, Yaolsuv bhai niail hai ge bhiq-a nail ngaol: "Kaqdeiqsav Bhaqneiq-aq nail aqduq bhai Heeqphaq Miqyail neq, aivq nail haqbhoil ge dan nail gaq pevq nail Maolseiq bhai ngadao nvq gaq nee mail tavq lai khi ge bhiq-a nail daoq bhai naol noeq moel naol laiq.
7 Heeqphaq Miqyail nail yaqkav Maolseiq-i mail ngaq bhai milkhaoq niil khaoq bha Kaqdeiqsav Bhaqneiq-aq aqduq nee mail bhi khoiq hel daiq lee lavq-u phao, ngaq nail aqkovq 40 kovq bhee-aiq nail ngaol. Al ovqtavq, ngal kovq lee khi, ngaq nail neema lavqkhoel bhai, khal aol nail khe-ai, cavq gaiq lee-a nail ngaol.
8 Ngaq-ai nee mail lal-a nail aqivq jaqbheq juq neq, Ilsaqleiqlav nail tsaol-aq juq bhai neema ga juq gil lal dai, lav geesil bhiq-a nail ngaol. Thail hai ngaol-aoq, ngal neq, ngaq nail Heeqphaq Miqyail nail haoqnao neema kev khi teevq bhee teevq lovq tsao the-a nail ngaol.
9 Al heel ngel-i mail, aq-u n-gaol, Maolseiq niail hai saljial jaq lavq-a nail ngaol: 'Naol, ngaq nail Heeqphaq Miqyail nail haoqnao neema kev khi teevq bhee teevq lovq tsao the-a nail ngel-i mail, naoq-i mail naoq thaiq nail miltsaq neq, naol dai khi naoq-ai nee mail yavq kha lee thaq nail juq nail haqbhoil khaqmao iqsanl jaiqbhoil pevq nail ngaol' dai, ge lavq-a nail ngaol.
10 Heeqphaq Miqyail neq, Maolseiq bhai al hai ge bhiq gaq khi pultavq, aivq-i mail ge-ai thaq nail khe-ai, ngaq bhai 45 kovq bhi doevq lavq-a nail nee ovqtavq, Ilsaqleiqlav nail tsaol-aq juq nee mail tsalhail daikav bhai tsao thail thaiq nail ngaol. Niil aq-il neq ngaq nail aqkovq 85 kovq bhee-aiq nail ngaol.
11 Thail hai ngaol-aoq, Maolseiq neq, ngaq-ai milkhaoq niil khaoq bhai bhi khoiq hel daiq lee lavq-a nail aqyanq khe-ai, niil aq-il iqsanl, aq-u khe-ai ganl nl nail phao, gaq aol khi, genl dev nail phao iqsanl, gaq aol-aiq haq nail ngaol.
12 Al heel ngel-i mail, aq-u n gaol Heeqphaq Miqyail saljial jaq lavq-a nail khe-ai, naol gaoqjaoq niil juq ngaq bhai bivq lavq yaoq. Jaol duq al duq bhai neq, Aqnaqkav nail tsaol-aq juq jaol nail ngaol dai, naol iqsanl ya gaiq-a nail ngaol. Al ovqtavq, aqyu juq nail meenq juq neq, eeq dee dee khi meenq nail khainl iqsanl aqmeeq-ai ivq dao dai nl-aiq thaq nail ngaol. Thail hai ngaol-aoq, Heeqphaq Miqyail tsao jao-ai lavq haq neq, aivq-i mail khal ge nail khe-ai, tsaol-aq al juq iqsanl bhai ngal the dov gil nail ngaol" dai, ge bhiq-a nail ngaol.
13 Aq-u phao, Yaolsuv neq, Yeiqphuqnaiq nail yaqyov Kaqlaiv bhai geeqlaoq bivq khi, gaoqjaoq juq jiav nail Heiqbhonq meenq jaiqbhoil bhoil bhiq-a nail ngaol.
14 Keiqniqsil nail tsaol-aq Yeiqphuqnaiq nail yaqyov Kaqlaiv neq Ilsaqleiqlav Heeqphaq Miqyail nail haoqnao neema kev khi teevq bhee teevq lovq tsao the-a nail ngel-i mail, aivq nee mail yavq kha lee thaq nail yaq juq neq, Heiqbhonq miltsaq bhai yaq n n-gaol kev dai, jaiqbhoil ovq nail ngaol.
15 Heiqbhonq nail aqmil aqlil neq, Khiqlil-avq Aqlaqbhaq dai khul nail ngaol. Aqlaqbhaq dai ge nail neq, Aqnaqkav nail jeq-e bhai aqmil dov nail teevq gaq nail aqmil ngaol.
A bhai nee ngal-aq, genl maq dev dai, milkhaoq aqsal sal lal-a nail ngaol.