Paulus bela dia pung diri di muka Raja Agripa
26:1-32
26
1 Raja Agripa bilang par Paulus kata, “Paulus e! Sakarang beta kasi waktu par ale bela ale pung diri.”Abis Raja Agripa bilang bagitu, Paulus kasi kode deng tangang la mulai bela dia pung diri. Dia bilang, 2 “Bapa Raja Agripa yang beta hormat! Hari ini beta baruntung paskali. Barang, beta bisa bela beta pung diri di muka bapa soal samua parkara yang orang Yahudi dong su tudu par beta. 3 Beta labe baruntung lai tagal bapa batul-batul tau soal katong orang Yahudi pung atorang adat deng parkara-parkara. Jadi, beta minta bapa sabar dengar apa yang beta mau bilang ni.
4 Samua orang Yahudi su tau kalo beta pung hidop ni batul dari beta masi muda lai waktu tinggal di kota Tarsus. Labe-labe lai par dong yang tinggal di kota Yerusalem. 5 Dong tu su lama paskali kanal beta. Jadi kalo dong mau, dong bisa kasi tau kalo beta ni orang dari kalompok Farisia yang iko dong pung samua atorang yang karas paskali dari katong pung agama.* 6 Sakarang beta badiri di sini par dong kasi sidang beta, tagal beta parcaya soal janji yang Allah su bilang par katong pung moyang-moyang. 7 Janji tu katong sapulu dua suku di Israel ada tunggu-tunggu akang, sampe katong somba Allah siang-malang.
Bapa Raja Agripa yang beta hormat! Tagal beta parcaya akang janji tu sampe orang-orang Yahudi su tudu beta.
8 Sio orang-orang Yahudi e, mangapa kong kamong seng parcaya kalo Allah bisa kasi hidop orang mati?
9 Dolo-dolo beta pikir kalo beta musti biking apapa yang jahat par orang-orang yang parcaya Yesus, Orang dari kampong Nasaret.* 10 Itu yang beta biking di Yerusalem. Waktu itu beta dapa surat kuasa dari orang Yahudi pung imam-imam kapala biar beta bisa kasi maso Yesus pung orang-orang ka dalang bui. Beta setuju waktu orang-orang hukum mati dong. 11 Beta jaga siksa dong di orang Yahudi pung tampa-tampa sombayang deng paksa dong par hojat Yesus. Beta paleng jumawa paskali par dong sampe beta jaga cari dong di kota-kota deng negri-negri yang jau par siksa dong.*
12 Satu kali bagini, beta pi ka kota Damsik. Waktu beta pi, beta ada bawa surat yang orang Yahudi pung imam-imam kapala su kasi par beta biar beta bisa tangkap orang-orang yang parcaya Yesus. 13 Mar Bapa Raja Agripa e! Waktu beta deng tamang-tamang ada di tenga jalang, pas tenga hari bagitu, skrek bagini beta lia sinar puti paleng tarang dari langit tapancar koliling katong. Akang pung tarang tu labe lai dari matahari pung tarang. 14 Oras itu jua, katong samua jatu ka tana. Tarus, beta dengar ada suara satu dalang bahasa Ibrani bilang par beta kata, ‘Saulus, Saulus e! Mangapa ale siksa Beta? Kalo ale malawang Beta tarus, ale nanti biking susa ale pung diri sandiri.’
15 Mar beta bilang, ‘Tuhan e! Tuhan ni sapa?’
Tuhan bilang, ‘Beta ni Yesus yang ale siksa tu. 16 Badiri suda. Beta datang kasi unju rupa par ale tagal Beta mau ale jadi Beta pung orang karja. Ale nanti jadi saksi par kasi tau samua yang Beta su kasi unju deng yang nanti Beta kasi unju par ale. 17 Beta nanti jaga ale dari orang-orang Yahudi deng orang-orang yang bukang Yahudi yang mau biking susa ale. Beta nanti suru ale pi par dong 18 par buka dong pung hati deng pikirang biar dong kasi tinggal dong pung dosa-dosa, deng biar Setang pung Raja seng parenta dong lai mar Allah yang parenta dong. Akang macang deng orang yang kaluar dari tampa galap la pi ka tampa tarang. La kalo dong parcaya Beta, Allah nanti kasi ampong dong pung dosa-dosa. Tarus, dong nanti jadi Beta pung orang-orang, sama deng orang laeng yang Beta su pili par jadi Beta pung orang-orang tagal dong parcaya Beta.’*
19 Jadi Bapa Raja Agripa e! Beta biking iko apa yang Yesus su bilang par beta waktu Antua kasi unju diri dari sorga. 20 Beta pi kasi tau kamuka par orang-orang yang ada di Damsik kalo dong musti kasi tinggal dong pung dosa-dosa, parcaya Allah, la kasi unju akang dalang dong pung hidop. Abis itu, beta pi kasi tau akang par orang-orang di Yerusalem deng di samua propinsi Yudea. Tarus, beta pi kasi tau akang lai par orang-orang yang bukang Yahudi.* 21 Tagal itu sampe orang-orang Yahudi tangkap beta di dong pung Tampa Sombayang Pusat pung kintal la coba bunu beta. 22 Mar Allah tolong beta sampe oras tadi ni. Jadi, beta bisa badiri di sini par jadi saksi par samua orang kacil deng basar soal Yesus. La samua yang beta ada kasi tau ni, Allah pung juru-juru bicara deng Musa su bilang akang. 23 Dong bilang kalo Orang yang Allah su Angka par Kasi Salamat Manusia musti sangsara do la mati. Mar Antua Orang partama yang Allah kasi hidop kombali biar Antua kasi tau Kabar Bae par orang-orang Yahudi deng orang-orang yang bukang Yahudi biar dong salamat.”
24 Waktu Paulus masi bela dia pung diri, Gubernur Festus tabaos basar-basar kata, “Paulus e! Ale su gila ka? Ale balajar talalu banya sampe akang biking ale gila!”
25 Mar Paulus bilang, “Bapa Festus yang beta hormat! Beta seng gila par bicara yang seng maso-maso akal. Apa yang beta bilang ni batul! Beta seng karang-karang! 26 Beta tau kalo Bapa Raja Agripa su tau lai soal samua ni. Barang, soal bagemana Yesus mati la hidop kombali tu, orang banya su tau akang. Seng ada satu lai yang Bapa Raja Agripa seng tau. Jadi, beta barani bilang akang samua-samua di muka Bapa Raja Agripa.
27 Bapa Raja Agripa yang beta hormat! Bapa parcaya ka seng apa yang Allah pung juru-juru bicara su bilang? Beta tau kalo bapa parcaya to?”
28 Raja Agripa bilang, “Paulus e! Ale kira bisa buju beta par jadi Kristen dalang waktu yang pende ni ka?”
29 Paulus bilang, “Beta nanti sombayang par Allah biar dalang waktu capat ka lama, bapa deng samua orang yang ada dengar beta bicara ni jadi parcaya Yesus macang deng beta lai. Mar jang jadi orang bui macang deng beta bagini.”
30 Abis Paulus bilang bagitu, Raja Agripa, Gubernur Festus, Bernike, deng samua orang basar yang ada di tampa tu badiri la bajalang kaluar. 31 Sampe di luar, dong laeng bilang par laeng kata, “Orang itu seng biking apapa satu lai yang pantas par dapa hukum mati ka dapa bui.”
32 Tarus, Raja Agripa bilang par Gubernur Festus kata, “Festus e, kalo dia seng minta Raja Basar Roma urus dia pung parkara, dia su bisa bebas sakarang ni.”