Paulus pi ka Roma
27:1-12
27
1 Gubernur Festus putus par kiring Paulus deng babarapa orang bui par Raja Basar Roma di propinsi Italia. Dia suru komandan kompi satu jaga Paulus dong. Komandan kompi tu nama Yulius. Dia tu komandan tantara dari pasukan satu yang akang pung nama Pasukan Raja Basar. 2 Katong nai kapal satu yang datang dari kota Adramitium. Akang mau balayar ka pelabuhan-pelabuhan yang ada di propinsi Asia. Jadi, katong balayar sama-sama deng akang. Waktu itu, ada orang Makedonia satu yang pi sama-sama deng katong. Dia asal dari kota Tesalonika. Dia nama Aristarkus.3 Akang pung eso bagini, katong sampe di kota Sidon. Komandan Yulius bae par Paulus. Dia kasi biar Paulus pi lia dia pung tamang-tamang biar dong kasi apapa yang dia parlu. 4 Dari situ katong balayar kombali. Mar tagal anging dari muka batiop talalu kancang, jadi kapal balayar langgar pante yang ada di pulo Siprus biar pulo tu pele katong dari anging. 5 Abis itu, katong balayar langgar propinsi Kilikia deng propinsi Pamfilia la sampe di kota Mira. Mira ni kota satu yang ada di propinsi Likia. 6 Di situ Komandan Yulius dapa kapal satu yang datang dari kota Aleksandria yang mau balayar ka Italia. Jadi, dia suru katong samua nai kapal tu.
7 Mar, tagal katong toma anging kancang, kapal tu bajalang paleu paskali. Jadi, katong balayar babarapa hari paskali deng stenga mati baru sampe di dekat kota Kanidus. La tagal anging masi kancang tarus, jadi katong musti manyabrang ka pulo Kreta langgar tanjong Salmone, biar pulo tu pele katong dari anging.a 8 Katong balayar toma anging deng omba hasa-hasa pante bagiang salatang pulo tu la sampe di tampa satu yang nama Labuang Bagus. Akang dekat deng kota Lasea.
9 Waktu tabuang banya tagal katong balayar toma anging, jadi waktu katong sampe lai, orang Yahudi pung hari basar Puasab su abis, la su mulai musing omba. Jadi, waktu itu wer seng bae par balayar. Tagal itu, Paulus kasi inga dong kata, 10 “Basudara e! Beta pikir kalo katong balayar tarus, katong nanti bisa susa deng cilaka. Bukang cuma kapal deng barang-barang sa yang tinggalang deng ilang, mar katong samua jua bisa mati.”
11 Mar Komandan Yulius seng mau dengar apa yang Paulus bilang. Dia labe parcaya juru mudi deng orang yang pung kapal. 12 Pelabuhan di situ memang seng bagus par kapal-kapal kalo balabu tarus waktu musing omba. Jadi, banya dari katong yang mau sa balayar sampe ka kota Feniks la tinggal di kota itu sampe musing omba abis. Feniks tu pelabuhan di pulo Kreta yang paleng bae, tagal akang baku tangada muka deng sabala barat daya deng barat laut, jadi akang bebas dari omba basar.
Anging ribut hantam Paulus dong pung kapal
27:13-38
13 Waktu anging sibu-sibu batiop dari sabala salatang, anana bua kapal pikir kalo dong su bisa balayar ka kota Feniks. Jadi, dong angka jangkar la balayar hasa-hasa pante yang ada di pulo Kreta. 14 Mar seng lama bagini, anging ribut datang dari pulo Kreta la hantam kapal. Anging tu, orang jaga bilang akang Anging Timur Laut. 15 Tagal kapal seng bisa toma anging, jadi katong kasi biar kapal anyo-anyo di lautang iko anging. 16 Kapal anyo di dekat pulo kacil satu yang pele katong dari anging. Pulo tu pung nama Kauda. Katong stenga mati tarek skoci par kasi nai di kapal. 17 Pas skoci su ada di atas kapal, anana bua kapal mulai balei badang kapal deng tali-tali biar dinding-dinding kapal seng talapas. Dong taku jang sampe kapal ni anyo la takandas di Labuang Sirtis pung tanusang. Jadi, dong kasi turung layar biar kapal anyo-anyo iko anging sa. 18 Anging ribut hantam kapal seng stop-stop. Jadi akang pung eso, anana bua kapal mulai buang kapal pung muatang ka dalang lautang. 19 Tarus akang pung hari katiga, dong sandiri yang buang dong pung alat-alat kapal ka lautang. 20 Katong su bahari-hari seng parna lia matahari deng bintang-bintang, la anging ribut jua hantam kapal seng stop-stop. Jadi, katong samua su seng harap lai par salamat.
21 Samua orang yang ada di kapal su bahari-hari seng makang apapa. Jadi, Paulus badiri di muka dong la bilang kata, “Basudara e, coba waktu itu kamong iko beta pung nasehat par seng pi balayar dari Kreta pasti katong sakarang ada bae-bae sa. Katong seng cilaka deng susa macang bagini. 22 Mar sakarang beta minta kamong samua jang putus harap, biar kata katong ada susa. Barang, seng ada satu orang lai dari katong yang nanti mati, cuma kapal ni sa yang nanti ancor. 23 Beta ni somba Tuhan Allah deng beta karja par Antua. Tadi malang Antua pung malekat datang badiri di beta pung sabala 24 la bilang kata, ‘Paulus e, jang taku! Allah mau ale nanti badiri di muka Raja Basar Roma. Jadi, ale deng samua orang yang ada sama-sama deng ale di kapal ni nanti salamat tagal Allah pung hati bae par ale.’ 25 Jadi, basudara samua jang putus harap. Beta parcaya kalo Allah nanti biking parsis deng apa yang malekat tu su bilang. 26 Mar katong nanti takandas di pulo satu.”
27 Kapal anyo-anyo di Lautang Adria sampe sapulu ampa hari. Mar akang pung tenga malang bagini, anana bua kapal rasa kalo kapal su dekat deng daratang. 28 Tagal itu, dong kasi turung batu sau par cari tau lautang tu pung kadalang. Dong ukur bagini, akang pung kadalang tu 37 meter. Tarus, kapal maju sadiki la dong ukur kombali. Akang pung kadalang 27 meter. 29 Anana bua kapal taku jang sampe kapal ni takandas di batu karang. Jadi, dong kasi turung jangkar ampa bua dari kapal pung bagiang balakang par balabu. Dong jua harap par capat-capat pagi. 30 Mar anana bua kapal su baku skongkol par pi kasi tinggal kapal tado-tado. Jadi, dong kasi turung skoci la biking macang dong ada mau kasi turung jangkar dari muka kapal. 31 Mar Paulus dapa tau kalo anana bua kapal mau lari. Tagal itu, dia bilang par Komandan Yulius deng dia pung anana bua kata, “Bapa-bapa e, kalo anana bua kapal seng tinggal di kapal ni, kamong nanti seng salamat.” 32 Abis Paulus bilang bagitu, tantara-tantara kasi putus skoci pung tali-tali la kasi biar skoci tu anyo.
33 Waktu su amper siang, Paulus buju samua orang yang ada di dalang kapal par makang. Paulus bilang par dong, “Basudara-basudara e, su sapulu ampa hari ni katong samua tunggu-tunggu deng hati tapukul sampe seng makang apapa. 34 Jadi, beta minta kamong samua makang biar kuat. Seng ada satu orang lai dari kamong yang nanti cilaka. Kamong samua nanti salamat.”
35 Abis Paulus bilang bagitu, dia ambe roti la minta dangke dari Allah di muka dong samua yang ada di kapal. Tarus, dia rabe-rabe roti tu la makang. 36 Dong samua pung hati tamba kuat la makang lai. 37 Waktu itu katong samua tu ada 276 orang. 38 Katong samua makang sampe kanyang. Abis itu, anana bua kapal buang gandum-gandum ka lautang biar kapal tu haringang.
Kapal takandas
27:39-44
39 Waktu su mulai tarang, anana bua kapal dapa lia pulo satu. Dong seng tau kalo itu pulo apa, mar dong lia labuang yang pung pante bapaser. Jadi, dong mau coba kasi kandas kapal di situ, kalo bisa. 40 Dong potong tali-tali jangkar la kasi biar akang tinggalang. Tarus, dong buka tali yang ika kamudi la kasi turung akang ka dalang lautang par kamudi kapal. Abis itu, dong kasi nai layar di muka biar anging tiop kapal la bawa akang ka daratang. 41 Mar kapal takandas di tanusang. Akang pung muka su seng bisa bagara lai. Akang pung bagiang balakang ancor tagal omba basar pukul.
42 Waktu itu, tantara-tantara mau bunu samua orang bui biar seng ada satu orang lai yang bisa barnang par lari. 43 Mar Komandan Yulius ni mau kasi salamat Paulus. Jadi, dia larang dia pung anana bua par biking macang bagitu. Dia parenta orang-orang yang tau barnang balumpa kamuka ka lautang la barnang ka dara. 44 Tarus, orang-orang yang seng tau barnang iko dari balakang pake papang-papang ka kayo panggal-panggal yang talapas dari kapal. Jadi, katong samua salamat sampe di karing.