Gubernur Festus kasi sidang Paulus di muka orang-orang Yahudi
25:1-12
25
1 Waktu Gubernur Festus sampe di propinsi Yudea, akang pung tiga hari, dia pi dari kota Kaisarea ka kota Yerusalem. 2 Di kota tu orang Yahudi pung imam-imam kapala deng orang-orang basar pi tudu Paulus di muka dia. 3 Dong su baku skongkol par mau bunu Paulus di tenga jalang, jadi dong minta dia pung hati bae par suru orang bale bawa Paulus ka Yerusalem. 4 Mar Gubernur Festus bilang par dong kata, “Paulus ni ada dapa tahang di Kaisarea. Seng lama lai beta sandiri mau bale kombali ka Kaisarea. 5 Jadi, labe bae kamong kiring babarapa orang basar dari kamong par pi sama-sama deng beta ka Kaisarea. Di sana, dong bisa kasi tau Paulus pung sala par beta, kalo memang dia batul-batul ada pung sala.”6 Gubernur Festus tinggal di Yerusalem mangkali barang dalapang sampe sapulu hari bagitu. Abis itu, dia bale ka Kaisarea.
Waktu dia sampe di Kaisarea, akang pung eso bagini, dia pi ka tampa sidang la suru orang-orang bawa Paulus ka situ. 7 Waktu Paulus sampe, orang-orang Yahudi yang datang dari Yerusalem badiri ron dia la mulai tudu dia deng banya hal yang barát, mar dong seng bisa kasi unju akang pung bukti.
8 Tarus Paulus bela dia pung diri. Dia bilang bagini, “Bapa Gubernur, beta ni seng pung sala apapa. Beta seng parna malawang orang Yahudi pung Kitab Torat, ka biking apapa yang seng bae par Tampa Sombayang Pusat, ka malawang Raja Basar Roma.”
9 Mar Gubernur Festus ni mau cari muka par orang-orang Yahudi. Jadi, dia bilang par Paulus kata, “Paulus e, ale mau pi ka seng ka Yerusalem par urus ale pung parkara di sana di muka beta?”
10 Paulus bilang, “Bapa e, beta ni warga Roma, deng sakarang ni beta ada badiri di muka sidang pemerinta Roma. Jadi, beta musti dapa sidang di sini, bukang di Yerusalem. Bapa sandiri batul-batul tau kalo beta seng biking sala apapa par orang-orang Yahudi. 11 Jadi, kalo beta ni batul-batul ada pung kajahatang yang biking beta pantas par dapa hukum mati, beta siap mati. Mar kalo apa yang dong tudu par beta tu seng batul, seng ada orang yang pung hak par kasi beta par dong. Beta minta nai banding ka Raja Basar Roma biar antua yang putus beta pung parkara.”
12 Tarus, Gubernur Festus baku tukar pikirang deng orang-orang yang kasi nasehat par dia. Abis itu, dia bilang par Paulus kata, “Ale su minta Raja Basar Roma yang putus ale pung parkara, jadi ale nanti pi par antua.”
Gubernur Festus carita soal Paulus par Raja Agripa
25:13-22
13 Akang pung babarapa hari, Raja Agripaa datang ka kota Kaisarea. Dia datang sama-sama deng dia pung ade parampuang, nama Bernike. Dong dua datang par kasi salamat par Bapa Festus yang baru jadi gubernur. 14 Dia deng Bernike tinggal sadiki lama di kota tu.
Satu kali bagini, Gubernur Festus carita soal Paulus pung parkara par Raja Agripa kata, “Bapa e, waktu Gubernur Feliks masi pegang parenta di sini, antua ada kasi tinggal orang bui satu. Orang tu nama Paulus. 15 La waktu beta ada di kota Yerusalem, orang Yahudi pung imam-imam kapala deng pamimping-pamimping datang kasi tau Paulus pung sala par beta. Dong minta beta hukum dia.
16 Mar beta bilang par dong bagini, ‘Kalo iko katong orang Roma pung atorang, katong musti bawa dia di muka orang-orang yang ada biking parkara deng dia di tampa sidang biar dia bisa bela dia pung diri di muka dong. Kalo katong su biking macang bagitu baru katong bisa hukum dia.’ 17 Jadi, waktu dong sampe di Kaisarea deng beta, beta seng tunda-tunda lai par kasi sidang Paulus. Akang pung eso, beta suru orang bawa Paulus ka tampa sidang par dapa sidang. 18 Waktu itu, orang-orang yang biking parkara deng dia tu badiri tudu dia. Mar, samua yang dong tudu tu bukang soal kajahatang macang yang beta pikir. 19 Dong cuma baku malawang deng dia soal dong pung ajarang agama deng soal Satu Orang yang nama Yesus. Yesus tu su mati, mar Paulus bilang kalo Dia su hidop kombali. 20 Tarus, beta bingong seng tau mau urus akang bagemana. Jadi, beta tanya dia mau pi ka seng deng beta ka Yerusalem par urus dia pung parkara. 21 Mar dia seng mau. Mala dia minta beta tahang dia tarus sampe Raja Basar Roma urus dia pung parkara. Tagal itu, beta suru orang-orang par tahang dia sampe beta bisa bawa dia par Raja Basar Roma.”
22 Tarus, Raja Agripa bilang par Gubernur Festus kata, “Beta mau dengar dia bicara lai.”
Gubernur Festus bilang, “Eso bapa bisa dengar dia bicara.”
Gubernur Festus kasi tau Raja Agripa soal Paulus
25:23-27
23 Akang pung eso bagini, Raja Agripa deng Bernike datang pake pakiang karajaang, kong samua orang taru hormat par dong dua. Dong dua maso ka dalang ruang basar satu sama-sama deng komandan-komandan tantara deng orang-orang basar yang ada di kota itu. Abis dong maso, Festus suru orang-orang bawa maso Paulus ka ruangang tu. 24 Waktu Paulus su ada, Gubernur Festus bilang kata, “Bapa Raja Agripa deng samua orang yang beta hormat! Lia dia ni! Samua orang Yahudi di kota Kaisarea deng di kota Yerusalem su tudu dia. Dong bataria-bataria par beta kalo dia seng pantas par hidop. 25 Mar beta seng dapa dia pung sala sadiki lai yang pantas par dia dapa hukum mati. Dia su minta Raja Basar Roma yang urus dia pung parkara. Jadi, beta nanti suru orang bawa dia par Raja Basar di Roma. 26 Mar beta seng tau mau tulis apa soal dia pung parkara par Raja Basar Roma. Tagal itu, beta ada bawa dia kamari di muka kamong samua, labe-labe lai di muka Bapa Raja Agripa yang beta hormat biar katong bisa cari tau dia pung sala. Abis itu, baru beta bisa tau apa yang beta musti tulis dalang surat tu. 27 Barang, beta pikir kalo katong mau kiring orang bui satu, katong musti kiring dia sama-sama deng surat yang kasi tau soal apa yang orang tudu par dia.”