Orang-orang Yahudi tudu Paulus di muka Gubernur Feliks
24:1-27
24
1 Lima hari dari waktu Paulus dapa tahang di Raja Herodes pung istana, orang Yahudi pung Imam Basar datang di kota Kaisarea. Imam Basar tu nama Ananias. Antua datang sama-sama deng babarapa orang Yahudi pung pamimping-pamimping deng pengacara satu, nama Tertulus. Dong samua pi par Gubernur Feliks par tudu-tudu Paulus. 2-3 Waktu orang bawa maso Paulus ka tampa sidang, Tertulus mulai tudu dia. Tertulus bilang, “Bapa Gubernur Feliks yang katong hormat! Bapa pung cara pegang parenta par katong pung negri ni, akang su lama biking katong pung hidop tenang. La deng bapa pung pikirang tajang, bapa su biking banya hal yang bae par katong pung bangsa ni, sampe akang su jadi bagus paskali. Di mana-mana, katong sanang deng samua yang bapa biking tu, deng minta dangke banya lai par bapa. 4 Beta seng mau buang-buang bapa pung waktu lai, cuma mau minta, kalo bole, bapa tolong dengar apa yang katong mau bilang ni jua.5 Bapa, katong su dapa tau kalo orang ini ni tukang biking kaco. Dia jaga pancing orang-orang Yahudi di sagala tampa par biking kaco. Dia tu jua pamimping dari kalompok yang jaga iko Satu Orang dari kampong Nasaret pung ajarang. 6 Mala dia jua coba biking kotor Tuhan pung Tampa Sombayang Pusat yang kudus. Tagal itu, katong tangkap dia. [Katong mau kasi sidang dia iko katong pung atorang agama, 7 mar Komandan Lisias datang la rampas dia dari katong. 8 Antua suru orang-orang yang biking parkara deng Paulus tu datang sandiri la urus akang deng bapa.] Jadi, kalo bapa mau cari tau dia pung sala, bapa tanya sandiri sa par dia la nanti bapa tau kalo samua yang katong su bilang ni batul.”
9 Orang-orang Yahudi yang ada di situ iko tudu-tudu Paulus lai. Dong bilang kata, “Batul paskali apa yang Bapa Tertulus su bilang.”
10 Tarus, Gubernur Feliks kasi kode par suru Paulus bicara. Paulus bilang, “Bapa e, beta tau kalo bapa ni su bataong-taong jadi hakim par katong pung bangsa ni. Jadi, beta sanang par bela beta pung diri di muka bapa. 11 Bapa e, bapa bisa cari tau sa dari orang-orang, kalo mangkali barang sapulu dua hari yang lalu tu beta pi ka kota Yerusalem par sombayang. 12 Orang-orang Yahudi tu seng parna lia beta baku malawang deng satu orang lai ka kumpul orang banya par biking kaco di Tampa Sombayang Pusat, di katong orang Yahudi pung tampa-tampa sombayang yang laeng, ka di mana sa dalang kota tu. 13 Dong seng bisa kasi unju bukti satu lai par bapa soal apa yang dong su tudu par beta. 14 Mar beta mangaku di muka bapa kalo beta ni batul-batul somba Allah yang katong orang Yahudi pung tete-nene moyang dong somba. Beta somba Antua iko kalompok yang parcaya Tuhan Yesus pung ajarang. Mar orang-orang Yahudi bilang kalo kalompok itu pung ajarang seng batul. Beta parcaya par samua ajarang yang ada dalang Kitab Torat yang Musa su tulis deng Allah pung juru-juru bicara pung tulisang. 15 Beta lai parcaya macang deng dong kalo Allah nanti kasi hidop kombali samua orang mati, bae yang jaga iko Antua pung mau deng yang seng iko Antua pung mau. 16 Itu tu yang biking beta tarus jaga beta pung hidop deng hati barsi di muka Allah deng manusia.
17 Beta su babarapa taong seng ada di Yerusalem. Waktu beta bale, beta bawa kepeng par bantu katong pung orang-orang kasiang deng kasi korbang binatang par Allah. 18 Waktu beta su abis kasi barsi diri,a ada babarapa orang Yahudi dari propinsi Asia yang datang di katong pung Tampa Sombayang Pusat. Dong baku dapa beta di situ lai. Mar waktu itu tu seng ada orang banya deng beta, deng beta seng biking kaco.* 19 Jadi, kalo mau iko akang pung batul, dong yang datang dari Asia tu yang musti ada di sini sakarang. Dong tu yang musti kasi tau beta pung sala kalo ada apapa yang beta biking seng pas di dong pung hati sampe dong mau tudu beta. 20 Mar suda jua. Kasi biar orang-orang yang sakarang ada di sini kasi tau par bapa soal beta pung sala apa yang dong dapa waktu dong kasi sidang beta di muka dong pung Pamimping-pamimping Sidang. 21 Waktu itu, dong seng dapa beta pung sala apapa. Dong cuma seng sanang deng kata-kata yang beta tabaos basar-basar di tenga-tenga dong kata, ‘Kamong kasi sidang beta tagal beta parcaya kalo orang mati bisa hidop kombali!’ ”*
22 Gubernur Feliks su tau banya lai soal kalompok yang iko Tuhan Yesus pung ajarang. Jadi dia bilang kata, “Katong tunda sidang ni sampe Komandan Lisias datang do, baru beta bisa putus ale pung parkara.”
23 Tarus, dia parenta komandan kompi satu par tahang Paulus. Mar komandan kompi tu seng bole biking Paulus kasar-kasar deng seng bole larang dia pung tamang-tamang datang par tolong dia.
24 Akang pung babarapa hari, Gubernur Feliks datang sama-sama deng dia pung bini Drusila. Drusila tu orang Yahudi. Gubernur Feliks suru orang panggel Paulus la dengar Paulus kasi tau par dia soal dia pung parcaya par Yesus Kristus. 25 Paulus kasi tau par dia soal bagemana orang bisa hidop iko Allah pung mau deng bisa jaga diri biar jang biking dosa. Paulus kasi tau par dia kalo Tuhan nanti jadi hakim par samua orang. Dengar bagitu, dia takotang stenga mati. Jadi dia bilang kata, “Paulus e, sampe jua la pi suda! Nanti laeng kali kalo beta ada waktu, beta panggel ale kombali.”
26 Waktu itu Gubernur Feliks harap kalo Paulus nanti kasi kepeng par dia par kasi lapas Paulus. Jadi, dia jaga suru orang panggel Paulus la dudu carita lama-lama deng dia.
27 Abis dua taong, Gubernur Feliks su seng jadi gubernur lai. Perkius Festus yang ganti dia. Mar tagal Feliks mau biking orang-orang Yahudi pung hati sanang, dia kasi biar Paulus tarus di dalang bui.