23
1 Paulus nganga Pamimping-pamimping Sidang la bilang kata, “Basudara e! Sampe oras tadi ni beta tau kalo beta karja par Allah deng hati barsi.”2 Waktu orang Yahudi pung Imam Basar yang nama Ananias dengar Paulus bilang bagitu, antua bilang par orang yang badiri di dekat Paulus kata, “Tampeleng dia pung mulu tu!”
3 Tarus Paulus bilang par antua, “Hoe, manusia muka parlente putar bale e! Allah nanti tampeleng ale lai! Ale tinggal kong dudu taru panta di situ la hukum beta iko apa yang Tuhan pung Kitab Torat bilang, mar ale sandiri langgar akang waktu ale parenta ale pung ana bua par tampeleng beta!”*
4 Orang-orang yang badiri dekat Paulus bilang par dia kata, “Hoe! Se barani sakali biking malu Allah pung Imam Basar e!”
5 Paulus bilang, “Basudara e! Beta seng tau kalo antua tu Imam Basar. Memang batul dalang Allah pung Tulisang ada bilang kata, ‘Jang kamong bicara yang tarbae-tarbae soal kamong pung pamimping-pamimping.’ ”*
6 Paulus tau kalo Pamimping-pamimping Sidang tu ada dari kalompok Saduki deng jua dari kalompok Farisi. Jadi, dia bilang par Pamimping-pamimping Sidang bagini, “He basudara e! Beta ni dari kalompok Farisi. Beta pung bapa jua orang Farisi. Orang-orang kasi sidang beta tagal beta parcaya kalo orang mati bisa hidop kombali.”*
7 Waktu dia bilang bagitu, orang Farisi deng orang Saduki mulai baku malawang sampe dong tapica. 8 Orang-orang Saduki bilang kalo orang mati seng bisa hidop kombali.* Dong jua seng parcaya kalo malekat deng roh-roh tu ada. Mar orang-orang Farisi parcaya kalo samua tu ada, 9 jadi dong baribot tamba basar. Guru-guru Torat saparu dari kalompok Farisi badiri la baku malawang mati deng orang-orang Saduki. Dong bilang kata, “Dia ni seng pung sala sadiki lai. Jang sampe roh ka malekat yang bicara par dia.”
10 Dong baku malawang hebat paskali sampe komandan jadi takotang jang sampe dong rabe-rabe Paulus. Jadi, dia parenta dia pung anana bua kata, “Angka Paulus dari tenga-tenga orang banya tu bawa ka katong pung markas.”
11 Akang pung malang, Tuhan Yesus datang par Paulus la badiri di dekat dia. Antua bilang par dia kata, “Paulus e, jang taku! Ale su barani kasi tau soal Beta di kota Yerusalem. Jadi, ale musti kasi tau soal Beta macang bagitu lai di kota Roma.”
Orang-orang Yahudi baku skongkol par mau bunu Paulus
23:12-22
12 Eso pagi bagini, orang-orang Yahudi mulai baku skongkol. Dong angka sumpa kalo dong seng makang deng minong sampe dong bunu Paulus. 13 Dong samua tu labe dari ampa pulu orang. 14 Dong pi par orang Yahudi pung imam-imam kapala deng orang Yahudi pung pamimping-pamimping la bilang kata, “Katong su angka sumpa kalo katong seng makang deng minong sampe katong bunu Paulus. 15 Jadi, sakarang ni bapa-bapa deng Pamimping-pamimping Sidang samua musti minta dari komandan batalion biar dia bale bawa Paulus par bapa-bapa dong. Bapa-bapa dong biking sa macang kata ada mau pariksa Paulus pung parkara bae-bae, la katong nanti bunu dia di tenga jalang waktu dia mau datang kamari.”
16 Mar Paulus pung sudara parampuang pung ana laki-laki dapa tau kalo dong su baku skongkol par mau bunu Paulus. Jadi, dia pi ka markas tantara la kasi tau akang par Paulus. 17 Tarus, Paulus panggel komandan kompi satu la bilang bagini, “Bapa e, tolong bawa nyong ini par komandan batalion do! Barang, dia ada mau bilang apapa.”
18 Jadi, komandan kompi bawa nyong tu par komandan batalion la bilang kata, “Bapa e, Paulus yang katong ada tahang tu panggel beta la minta beta bawa nyong ini par bapa. Barang, nyong ni ada mau bilang apapa satu par bapa.”
19 Komandan batalion pegang nyong tu pung tangang la bawa dia ka tampa yang seng ada orang, la tanya dia kata, “Ose mau bilang apa par beta?”
20 Dia bilang, “Bapa e, orang-orang Yahudi dong su baku skongkol par minta bapa bale bawa Paulus eso par dong pung Pamimping-pamimping Sidang. Dong biking macang kata dong ada mau pariksa dia pung parkara bae-bae. 21 Mar waktu bapa dengar dong bilang bagitu, bapa jang iko dong pung mau. Barang, labe dari ampa pulu orang su siap par mau bunu Paulus. Dong su angka sumpa kalo dong seng makang deng minong sampe dong bunu dia. La sakarang ni dong samua su siap, tinggal bapa bilang iyo sa.”
22 La komandan batalion bilang par nyong tu kata, “Sakarang se pulang suda. Mar ingatang! Jang se kasi tau par sapa-sapa lai kalo se su bilang akang par beta.”
Komandan batalion kiring Paulus par Gubernur Feliks
23:23-35
23 Komandan batalion panggel dia pung komandan kompi dua orang la bilang par dong kata, “Kasi siap kamong pung anana bua dua ratus orang, tamba yang nai kuda tuju pulu orang, deng yang pegang tombak dua ratus orang lai, la pi malang ini jam sambilang ka kota Kaisarea! 24 Kasi siap kuda lai par Paulus, la bawa dia deng salamat par Gubernur Feliks.”
25 Komandan batalion tu tulis surat par Gubernur Feliks yang bilang bagini,
26 “Salam! Dari Klaudius Lisias par Gubernur Feliks yang katong hormat!
27 Orang-orang Yahudi su tangkap orang ini la mau bunu dia. Mar untung bae beta datang capat deng beta pung anana bua la kasi salamat dia dari dong, tagal beta dengar kalo dia tu warga Roma. 28 Beta mau cari tau mangapa sampe dong tudu dia macang bagitu. Jadi, beta bawa dia par orang Yahudi pung Pamimping-pamimping Sidang. 29 Mar beta lia kalo dong kasi sidang dia tu tagal masala soal dong pung atorang agama. Mar, seng ada alasang yang dong bawa yang biking dia pantas par dapa hukum mati. Jadi, beta seng kasi maso dia dalang bui, apalai kasi hukumang mati par dia. 30 Tarus, ada orang datang kasi tau par beta kalo orang-orang Yahudi su baku skongkol par mau bunu dia. Gara-gara itu sampe beta suru beta pung anana bua bawa dia par bapa. La beta su suru dong yang kasi sala dia tu datang sandiri par bapa biar dong bisa kasi tau dia pung sala lai par bapa.”
31 Jadi, tantara-tantara iko samua yang komadan su bilang la dong pi bawa Paulus malang-malang ka kota Antipatris. 32 Akang pung eso bagini, tantara-tantara yang nai kuda antar Paulus tarus la yang laeng bale kombali ka markas. 33 Waktu sampe di Kaisarea, tantara-tantara yang nai kuda kasi surat deng ofor Paulus par Gubernur Feliks. 34 Tarus, dia baca surat tu la tanya Paulus kata, “Ale ni asal dari propinsi mana?”
Paulus bilang, “Beta ni asal dari propinsi Kilikia.”
35 Dia bale bilang, “Beta yang nanti urus ale pung parkara. Mar katong musti tunggu sampe dong yang tudu ale tu datang kamari do.” Tarus, dia suru dia pung anana bua kata, “Tahang dia di Raja Herodes pung istana.”