Paulus di Makedonia deng Yunani
20:1-6
20
1 Waktu su seng kaco lai di kota Efesus, Paulus kumpul orang-orang parcaya la kasi nasehat dong biar dong parcaya Tuhan Yesus tarus. Abis itu, dia minta diri la pi ka propinsi Makedonia. 2 Dia bajalang koliling Makedonia la kasi nasehat par basudara-basudara yang iko Yesus di daera itu biar dong parcaya Yesus tarus. Abis itu, dia pi ka tana Yunani.a 3 Dia tinggal di Yunani tiga bulang. Waktu dia ada siap-siap par balayar ka propinsi Siria, dia dengar kalo orang-orang Yahudi ada baku skongkol par bunu dia. Jadi, dia putus par bale kombali ka Siria langgar Makedonia. 4 Ada babarapa orang yang pi deng dia. Dong tu: Bapa Pirus dari kota Berea pung ana Sopater, Aristarkus deng Sekundus yang asal dari kota Tesalonika, Gayus yang asal dari kota Derbe, Timotius, la yang laste Tikikus deng Trofimus yang asal dari propinsi Asia.5 Dong tuju tu pi kamuka la tunggu katongb di kota Troas. 6 Waktu orang Yahudi pung hari basar Roti Seng Pake Ragic su abis, katong balayar dari kota Filipi. Akang pung ampa hari, katong sampe di Troas la bakumpul deng dong tuju yang su pi kamuka. Katong tinggal di situ tuju hari.
Paulus kasi hidop Eutikus kombali
20:7-12
7 Hari Minggu itu katong bakumpul sama-sama deng orang parcaya la dudu makang sama-sama. Akang pung eso, Paulus mau pi jadi dia kasi balajar dong sampe tenga malang. 8 Katong bakumpul di kamar satu di lante tiga. Di kamar tu ada banya palita yang manyala. 9 Waktu itu ada nyong satu dudu di jandela. Dia pung nama Eutikus. Paulus bicara paleng lama sampe Eutikus manganto paskali la dapa sono. Skrek bagini, dia jatu dari lante tiga tu sampe ka bawa. Tarus, orang-orang paparipi angka dia, mar dia su mati. 10 Mar Paulus turung ka bawa la tiarap di atas dia pung badang la polo dia. Paulus bilang, “Jang taku! Dia seng mati. Dia ada hidop.”
11 Abis itu, Paulus bale nai ka atas la dudu makang sama-sama deng dong. Dia bicara deng dong sampe pagi. Abis itu, dia pi. 12 Waktu dia su pi, orang-orang antar Eutikus yang su hidop kombali tu ka dia pung ruma. Dong pung hati paleng sanang.
Paulus pi ka Miletus
20:13-16
13 Paulus suru katong nai kapal par pi kamuka ka kota Asos, mar dia sandiri lewat jalang darat, iko dia pung rencana. Nanti baru katong samua baku dapa di Asos baru dia nai kapal sama-sama deng katong. 14 Waktu katong baku dapa Paulus di Asos, katong bawa dia nai kapal deng katong la balayar sama-sama ka kota Metilene. 15 Katong tinggal di Metilene la akang pung eso, katong balayar sampe katong baku tangada muka deng pulo Kios. Akang pung eso, katong sampe di pulo Samos. La akang pung eso lai, katong sampe di kota Miletus. 16 Paulus seng mau singga di kota Efesus biar katong jang lama-lama di propinsi Asia. Barang, dia paparipi mau pi ka kota Yerusalem par iko hari basar Pentakosta.
Paulus minta diri dari penatua-penatua di Efesus
20:17-38
17 Dari kota Miletus, Paulus suru orang pi ka kota Efesus par bawa pasáng par penatua-penatua jamaat di sana kata, “Bapa-bapa e, mari datang baku dapa beta di kota Miletus do!”
18 Waktu dong sampe, Paulus bilang par dong kata, “Basudara samua! Kamong tau beta pung hidop bagemana dari partama kali beta ada deng kamong di propinsi Asia. 19 Beta karja karas par Tuhan Yesus deng randa hati, deng banya kali beta tumpa aer mata. Beta sangsara paskali tagal orang-orang Yahudi baku skongkol par mau bunu beta. 20 Kamong tau kalo beta deng barani kasi balajar kamong soal apa sa yang bisa bantu kamong. Beta kasi balajar kamong di muka orang banya deng di ruma-ruma. 21 Beta su kasi tau par orang-orang Yahudi deng orang-orang yang bukang Yahudi kalo dong musti kasi tinggal dong pung dosa-dosa la iko Allah deng parcaya Tuhan Yesus.
22 Sakarang, beta musti pi ka kota Yerusalem, iko Allah pung Roh pung parenta par beta, jadi beta ada di tenga jalang ka sana. Beta seng tau apa yang nanti jadi deng beta di sana. 23 Beta cuma tau kalo di sagala kota yang beta su singga, Allah pung Roh kasi tau par beta kalo beta nanti dapa bui deng nanti sangsara paskali. 24 Mar beta seng pusing sadiki lai deng beta pung hidop, asal beta bisa kasi klar karja yang Tuhan Yesus su kasi par beta, par kasi tau Kabar Bae soal Allah pung hati bae par manusia.
25 Beta su bajalang koliling par baku dapa basudara samua par kasi tau soal Allah pegang parenta jadi Raja. Mar sakarang ni, beta tau kalo basudara dong nanti seng baku dapa beta lai. 26 Jadi, sakarang beta mau kasi tau par kamong bagini: Kalo nanti ada dari kamong yang maso naraka, itu bukang beta pung sala! 27 Barang, beta seng lari dari beta pung karja par kasi tau soal samua-samua yang Allah mau par kamong.
28 Jadi, jaga kamong pung diri bae-bae. Bagitu lai deng Allah pung orang-orang samua, tagal Antua pung Roh su pili kamong par jaga dong. Jaga dong macang deng orang yang jaga deng kalesang domba-domba, tagal Allah sandiri su kasi Antua pung Ana Yesus par mati di kayo salib par Antua pung orang-orang tu. 29 Beta tau kalo waktu beta su pi dari sini, nanti ada orang-orang yang datang par kasi ancor jamaat yang kamong jaga. Dong tu macang deng anjing utang yang jahat, yang makang domba-domba. 30 La nanti dari tenga-tenga kamong sandiri ada saparu orang yang ajar ajarang yang tar batul soal Yesus la tarek orang-orang parcaya par iko dong. 31 Jadi, jaga kamong pung diri bae-bae. Ingatang e! Beta su tiga taong kasi nasehat kamong siang-malang deng aer mata.
32 Basudara e, sakarang beta minta Allah jaga kamong deng bantu kamong par inga pasáng soal Antua pung berkat basar par katong. Pasáng tu bisa kasi kuat kamong pung parcaya. Kalo kamong parcaya pasáng tu, kamong nanti tarima samua yang Antua su janji par samua orang yang Antua su angka par jadi Antua pung orang-orang. 33 Beta seng parna baringing orang pung mas, perak, ka pakiang. 34 Kamong sandiri su tau to, kalo beta karja biking tenda par beta deng beta pung tamang-tamang pung hidop hari-hari.* 35 La dalang samua hal yang beta biking, beta su kasi unju par kamong kalo katong musti karja karas par bantu orang-orang kasiang deng seng kuat. Katong musti inga apa yang Tuhan Yesus su bilang kata, ‘Kalo katong dapa apapa dari orang, katong sanang. Mar katong pasti labe sanang lai kalo katong kasi apapa par orang.’ ”
36 Abis bilang bagitu, Paulus tikang lutu la sombayang deng dong samua. 37 Dong samua manangis la polo deng ciong Paulus. Barang, Paulus su mau pi kasi tinggal dong. 38 Dong samua pung hati paleng ancor paskali, labe-labe lai tagal Paulus bilang kata, “Kamong nanti seng baku dapa beta lai.” Abis itu, dong antar dia ka kapal.