Wen nak xtizh Dios
119
Wen re xaa nze naz wen,
re xaa nze mod nii ley cheen Xaa Tubka Nak.
2 Wen xaa ngozhaw xtizh xa
nu kwaan dub lextoo xaa nkwaan xaaya,
3 nel nanlet xaa kwaan nawent,
xaa kwaan nzo lo xnaz Dios.
4 Xaa Tubka Nak,
lu ngunabeyy le nu xley lu
nu tubka nzhaal gon nuya.
5 ¡Nzhekla na wen gak xnaz na,
zee tubka kochaw na xley lu!
6 Zee natont na,
gorna la xtizh lu yek na.
7 Kwaan dub lextoo na gol na lo lu,
gorna seed na xtizh lu kwaan wen.
8 ¡Lee xtizh lu kozhaw na!
¡Nu tira nalaat lu na!
9 ¿Xomod gak nali xaa mad lo xnaz xaa?
¡Nebse kozhaw xaa xtizh lu!
10 Kwaan dub lextoo na nkwaan na lu;
nalaat lu la na xtizh lu.
11 Naz leen lextoo na ngozhaw na xtizh lu,
zee nalet na jwalt lo lu.
12 ¡Wen doo nak lu,
Xaa Tubka Nak!
¡Seed na xtizh lu!
13 Kwaan roo na nza na kwent
rese xtizh lu kwaan ngunii lu.
14 Nix nzhak lextoo na nreke na tich xnaz lu,
ke kano na zyen doo kwaan.
15 Tubka nle na xgab ley cheen lu
nu tubka nrekee na tich xnaz lu.
16 Nix doo nzhak lextoo na gorna nzhon na xtizh lu
nu lee xtizh lu nayenlazht na.
17 Zaa zyen liin ban na,
xaa nak xmos lu,
zee tubka kozhaw na xtizh lu.
18 Bxal garlo na,
zee dedyall na wii na lo re kwaan gro kwaan nii xley lu.
19 Xaa zit nak na lo yizhyo;
nakaxlaant lu xtizh lu lo na.
20 Tubka nales nzhak lextoo na,
nel nzhekla na labeyy na xtizh lu.
21 Mgalno lu re xaa nto yalxwa nu re xaa nxobde,
rese xaa kwaan nlaa nangwiit lo xtizh lu.
22 Nalaat lu nii nawent xaa na nu yii xaa,
nel ngozhaw na xtizh lu.
23 Noka mkasa re xaa non,
nu ngunii nawent xaa na,
per lee xmos lu,
mle xgab xtizh lu.
24 Nix doo nzhak lextoo na gorna nzhon na xtizh lu,
nel lee xtizh lu nak kwaan nza konsej lo na.
25 Mer yilo yet na;
kanap na modxa nzaa xtizh lu kwent.
26 Ngunii na re kwaan mle na lo lu nu mbin luya;
Bseed na xtizh lu.
27 Ble zee la xtizh lu yek na,
zee le na xgab re xcheen lu kwaan gro.
28 Tubka nales nzhak lextoo na;
kozhaw na modxa nii ley cheen lu.
29 Bloo na lo naz cheen yalnkade
nu lo yalnkela cheen lu,
seed na xtizh lu.
30 Mleey na naz kwaan wli
nu nzhekla na xley lu.
31 Tubka nye nzo na lo xtizh lu;
Xaa Tubka Nak,
nalaat lu ton na.
32 Gax nrekee na tich xnaz lu,
nel lu nle nix lextoo na.
33 Xaa Tubka Nak,
bseed na reke na tich naz cheen xley lu
nu kozhaw naya axta mbizh yet na.
34 Ble zee laya yek na,
zee nzho mod kozhaw na ley cheen lu
nu le naya kwaan dub lextoo na.
35 Be na lo xtizh lu,
nel leeya nle nix lextoo na.
36 Ble zee kela na xtizh lu,
zee nazoblazht na.
37 Ble zee nawiit na lo re kwaan yizhyo;
zaa diizh zee reke na tich xnaz lu.
38 Ble mod né lu lo xtizh lu lo xaa nak xmos lu,
modxa nle luya lo re xaa nzheb ne lu.
39 Ble zee natont nel nzheb na seton re xaa na
nu nel wen nak xtizh lu.
40 Wii,
na nkela xtizh lu;
zaa diizh ban na modxa nzhé xtizh lu.
41 Xaa Tubka Nak,
blu yalnkela cheen lu lo na
nu xaal yalnaban cheen lu lo na modxa myaan lu.
42 Snee keb na lo re xaa nxizhno na,
nel nebse lo xtizh lu ngwii na.
43 Nakiibt lu xtizh lu kwaan wli lo na,
nel xtizh lu nak kwaan kambaz na.
44 Tubka kozhaw na ley cheen lu,
nal nu tubka le naya.
45 Sneesi chul doo yoo na,
nel mkwaan na xtizh lu.
46 Nii na xtizh lu delant lo re rey
nu natont na.
47 Nix gak lextoo na lo xley lu,
nel nkedoola naya.
48 Nkedoola na ley cheen lu
nu nle na xgab xtizh lu.
49 Selazh wdizh kwaan mzaa lu lo na,
xaa nak xmos lu,
wdizh kwaan kambaz na gak.
50 Kwaane nak yalnix lo na gorna nales nzhak na,
nel kwent cheen xtizh lu mban na.
51 Nxizhno re xaa nto yalxwa na,
per namlat na ley cheen lu.
52 Xaa Tubka Nak,
mselazh na xley lu kwaan mzaa lu nzha zyen doo liin
nu leeya mseleyy na.
53 Nayii na ne na re xaa nakap,
gorna nlaa xaa ley cheen lu.
54 Lee xtizh lu nak kwaan mbill na,
nixa xaa zit nak na lo yizhyo ne.
55 Xaa Tubka Nak,
nselazh na lu re yaal
nu nzhekla na kozhaw na xley lu.
56 Kwaan nzhaal yizo na nak,
nzhaal le na ley cheen lu.
57 Xaa Tubka Nak,
nebse lu nak kwaan yalzo na
nu lee na kozhaw xtizh lu.
58 Kwaan dub lextoo na nkwaan na lu;
blesla lu ne lu na modxa nzhé xtizh lu.
59 Mle na xgab re kwaan nle na,
mbare na gon na xtizh lu.
60 Mle na prad nu nangokt na tras,
zee kochaw na xley lu.
61 Nixa mzhaal xtramp re xaa nakap lo na,
per namlat na xley lu.
62 Nyixche na wall yaal nu nza na dixkix lo lu,
nel wen nak xtizh lu.
63 Na nak xmig re xaa nzheb ne lu,
re xaa nle kwaan nii xtizh lu.
64 Xaa Tubka Nak,
yalnkela cheen lu nzho lo dubse yizhyo;
lee xley lu nak kwaan nzhekla na seed lu na.
65 Xaa Tubka Nak,
wen mle lu lo na,
xaa nak xmos lu,
modxa nzhé xtizh lu.
66 Seed na,
zee kano na yalnzhak,
nel ngwii na lo xtizh lu.
67 Yilo mle na jwalt zee mdeed na bid,
per lee nal nzhon na xtizh lu.
68 Wen nak lu nu nle lu kwaan wen;
seed na xtizh lu.
69 Nixa nzhib re xaa nkade kwaan tich na,
per dub lextoo na le na kwaan nii ley cheen lu.
70 Ngulo ngok ned lextoo re xaa ne,
per lee na nix doo nzhak lextoo na ne na xtizh lu.
71 Wen leezha mted lu na bid,
nel snee mlabeyy na xtizh lu.
72 Wenra xtizh lu kwaan nseed na lo lu,
ke zyen demi kwaan nak or nu plat.
73 Kwaan yaa lu mdexkwaa lu na;
zaa yalnzhak lo na,
zee la xtizh lu yek na.
74 Lee re xaa nkela lu gak nix lextoo xaa,
gorna ne xaa lo na,
nel ngwii na lo xtizh lu.
75 Xaa Tubka Nak,
ne na wen nak xley lu,
nu kwaan yalnali ntezi lu na.
76 Lee yalnles cheen lu gak yalnix cheen na,
modxa myaan lu kwaan na,
xaa nak xmos lu.
77 Blesla lu ne lu na,
zee ban na,
nel nix doo nzhak lextoo na ne na ley cheen lu.
78 Laa ton re xaa nto yalxwa,
xaa ngaazh kwaan nawlit tich na,
per lee na le xgab xtizh lu.
79 Bare re xaa nzheb ne lu lo na,
re xaa kwaan nlabeyy xtizh lu.
80 Gak nali lextoo na lo xtizh lu,
zee nanzhaalt ton na.
81 Nyichin na nu nkambaz na le lu yud na,
per masra ngwii na lo xtizh lu.
82 Kambaz na le lu kwaan nguné lu lo na
nu nzhé na:
“¿Cho gor yiid lu seleyy lu na?”
83 Nzak na nak na mod tub mbud gox kwaan mlaa xaa,
per namyenlazht na xtizh lu.
84 ¿Axta zlak mbizh nkin deed na xaa nak xmos lu bid?
¿Axta cho gor naab lu kwent lo re xaa nrenal na?
85 Re xaa nto yalxwa nzob tramp zen na;
xaa nangwiit lo ley cheen lu.
86 Wli nak rese xtizh lu;
ble yud na,
nel nik tub kwaan namlet na nu nrenal xaa na.
87 Mer ngulo mluux xaa na,
nixa sbaaya per namyenlazht na xtizh lu.
88 Lo yalnkela cheen lu le zee ban na,
zee tubka le na kwaan nii xtizh lu.
89 Xaa Tubka Nak,
tubka nak xtizh lu
nu tira nak xtizh lu naz leen yiba.
90 Nali nak lu lo tub dii nu lo stub dii;
nye mdexkwaa lu yizhyo,
zee nye gaka.
91 Lee re kwaan mdexkwaa lu nzho axta mbizh nalzhe,
nel rese kwaane nzhaal ke zhiin lo lu.
92 Chol nanzenot xley lu yalnix lo na,
zeesi nglux na lo yalnales.
93 Tira nayenlazht na xtizh lu,
nel leeya nak kwaan mban na.
94 Le yud na,
nel lu nabeyy na,
nu nel nseed na xtizh lu.
95 Re xaa nakap kambaz luux na,
per lee na tubka le xgab xtizh lu.
96 Ngwii na nlux rese kwaan,
nixa wen doo naka,
per lee xtizh lu nanluxt.
97 ¡Nkela na ley cheen lu!
Dubse zhe nle na xgaba.
98 Lee xtizh lu nzaa yalnzhak lo na,
masra ke lo re xaa nayii ne na,
nel tubka nzhoya lo na.
99 Masra nlaya yek na ke lo re xaa nseed na,
nel nle na xgaba.
100 Wenra nlaya yek na ke yek re xaa gol,
nel ngozhaw na xtizh lu.
101 Mla na re naz nawent,
zee kozhaw na kwaan nii xtizh lu.
102 Nambachit na lo xtizh lu,
nel lu mseed na.
103 Lee xtizh lu nax nzho roo na,
naxra ke mzhin kwaan nzhaw na.
104 Lee xtizh lu nzaa yalnzhak lo na,
kwaanzee nayii na ne na naz cheen yalnkade.
105 Lee xtizh lu nak kwaan nzaa xni lo na
nu kwaan nzaa xni lo xnaz na.
106 Myaan na nu le wena xgab,
le na re kwaan nii xtizh lu kwaan wen.
107 Xaa Tubka Nak,
nales doo nzhak na;
zaa diizh ban na modxa nii xtizh lu.
108 Xaa Tubka Nak,
naab na zee kayaa lu gon kwaan nroo roo na
nu bseed na xtizh lu.
109 Tubka nzo yalzi lo na,
per nanyenlazht na ley cheen lu.
110 Lee re xaa nakap nzob tramp zen na,
per nanlat na xtizh lu.
111 Xtizh lu nak kwaan nkano na tubka,
nel leeya nak kwaan nzaa yalnix lextoo na.
112 Kwaan dub lextoo na le na kwaan nii xtizh lu,
tubka le naya axta mbizh yet na.
113 Nanyulat na re xaa nii tub kwaan nu nle stub kwaan,
per lee na nkela xley lu.
114 Lu nak xaa nkaxlaan na nu nak lu tub lee yiib kwaan nsaaw na,
per lee na kambaz xtizh lu.
115 Re gu,
xaa nakap,
bachi gu lo na,
nel nzhekla na gon na xtizh Xtios na.
116 Zaa yalngezh lo na mod nii xtizh lu,
zee ban na;
nalaat lu ton na lo kwaan kambaz na.
117 Kanap na,
nu le yud na,
zee nix gak lextoo na lo xtizh lu.
118 Nankayaat lu re xaa nlaa xtizh lu,
nel sbaasa nak xgab nawent cheen xaa.
119 Kwenta yix nzak lu re xaa nakap,
kwaanzee nkela na xtizh lu.
120 Nxiz na lo yalnacheb cheen lu
nu nle na respet xtizh lu.
121 Tubka nle na kwaan nali nu kwaan wli;
nalaat lu na lo re xaa nayii ne na.
122 Ble wen lo na,
xaa nak xmos lu;
nalaat lu cheldil re xaa nto yalxwa na.
123 Ngulola nguzha na kambaz na,
zee le lu yud na,
lo xtizh lu kwaan nali nak.
124 Ble lo na,
xaa nak xmos lu,
modxa nak yalnkela cheen lu
nu bseed na xtizh lu.
125 Lee xmos lu nak na,
zaa yalnzhak lo na,
zee zhin na labeyy na xtizh lu.
126 Xaa Tubka Nak,
mzhinla mbizh le lu tub kwaan,
nel mdiich xaa xley lu.
127 Kwaanzee nkela na xtizh lu,
masra ke kwaan nak neb or.
128 Kwaanzee tich xtizh lu nrekee na
nu nayii na ne na naz cheen yalnkade.
129 Chul nak xtizh lu,
kwaanzee ngozhaw naya.
130 Lee xtizh lu nak kwaan nzaa xni lo nu
nu nzaaya yalnzhak lo xaa nadoo.
131 Nzi lextoo na ngoob na mbi,
nel nzhekla na xtizh lu.
132 Wii lo na nu blesla lu ne lu na,
modxa nle luya lo re xaa nkela lu.
133 Be na modxa nzhé xtizh lu,
nalaat lu le jwalt gan lo na.
134 Bloo na lo re xaa nakap,
zee kozhaw na xtizh lu.
135 Blu xni cheen lu lo na,
xaa nak xmos lu
nu bseed na xtizh lu.
136 Kwenta nis yuu nzhonn na,
nel nangozhawt re xaa xley lu.
137 Xaa Tubka Nak,
nali nak lu,
nu nali nak xtizh lu.
138 Lee xtizh lu kwaan mxaal lu,
nu nali naka.
139 Ngok selos na,
nel re xaa nayii ne na myenlazh xtizh lu.
140 Nzhul doo nak xtizh lu,
kwaanzee lee na,
xaa nak xmos lu,
nkelaya.
141 Tira nanont na,
per nanyenlazht na xtizh lu.
142 Lee yalnali cheen lu tira ndii
nu lee ley cheen lu nak kwaan wli.
143 Bid mdeed na nu mkano na yalnales,
per lee xtizh lu ngok yalnix cheena.
144 Tubka nali nak xtizh lu;
zaa yalnzhak zee nzho mod ban na.
145 Xaa Tubka Nak,
kwaan dub lextoo na nii na lo luk
keb lo na zee gon na xtizh lu.
146 Lo lu nii na:
“Le yud na”,
nel kozhaw na xtizh lu.
147 Garziil nyixche na nii na lo lu,
zee le lu yud na
nu kambaz na xtizh lu.
148 Nanzhaat na dub yaal,
nel nle na xgab xtizh lu.
149 Bin xtizh na nel nkela lu na;
Xaa Tubka Nak,
zaa zee ban na modxa nii xtizh lu.
150 Mzhin xaa nakap nu re xaa nrenal na gax pa nzhoo na,
per zit nzo xaa lo xley lu.
151 Xaa Tubka Nak,
gax nzo lu lo na,
nel wli nak xtizh lu.
152 Nzhala mbizh mlabeyy na xtizh lu,
kwaan tira mzaa lu.
153 Wii lo yalnales cheen na nu te le yud na,
nel nayenlazht na xley lu.
154 Bloo na nu le yud na lo xkwent na;
zaa diizh ban na modxa nzhé xtizh lu.
155 Zit nzo yud cheen lu lo re xaa nakap,
nel nankwaant xaa xtizh lu.
156 Xaa Tubka Nak,
gro nak yalnkela cheen lu;
zaa diizh ban na modxa nzhé xtizh lu.
157 Zyen doo xaa nrenal na nu xaa nayii ne na,
per nambachit na lo ley cheen lu.
158 Nanyulat na re xaa nkade,
nel nangozhawt xaa xtizh lu.
159 Xaa Tubka Nak,
wii nkela na ley cheen lu;
zaa diizh ban na modxa nak yalnkela cheen lu.
160 Lee xtizh lu nak kwaan wli,
nu tubka nali nak ley cheen lu.
161 Nrenal re xaa non na,
nixa namlet na kwaan,
per lee na nzheb ne xtizh lu.
162 Nix nzhak lextoo na ne na xtizh lu,
kwenta tub xaa nyizhal tub kwaan non.
163 Nanyulat na yalnkade,
per nkela na ley cheen lu.
164 Gazh welt nzholl na lo lu yizata mbizh,
nel wen nak ley cheen lu.
165 Wen doo nyu xaa nkela ley cheen lu
nu nyent cho kwaan le zee denke xaa.
166 Xaa Tubka Nak,
kambaz na le lu yud na,
nel ngozhaw na xtizh lu.
167 Kwaan dub lextoo na ngozhaw na xtizh lu
nu nkedoola naya.
168 Ngozhaw na xtizh lu,
nel lu ne rese kwaan nle na.
169 Xaa Tubka Nak,
naab na zee zhin kwaan nii na lo lu;
zaa yalnzhak lo na modxa nii xtizh lu.
170 Naab na zee zhin kwaan nii na lo lu;
bloo na modxa nii xtizh lu.
171 Kwaan roo na gol na lo lu,
gorna nseed lu na xtizh lu.
172 Lee roo na nii xtizh lu,
nel xtizh lu nak kwaan nali.
173 Ble yud na kwaan yaa lu,
nel mleey na xtizh lu.
174 Xaa Tubka Nak,
nzhekla na le lu yud na,
nel xley lu nak yalnix cheen na.
175 Laa ban na zee gol na lo lu
nu kwaan wli cheen lu le yud na.
176 Na mkanzee kwenta mbakxiil,
ma mzowen;
te kwaan lu xmos lu nal,
nel namyenlazht na xtizh lu.