Zaa be dixkix lo Xaa Tubka Nak nel tira nkela xaa be
118
¡Zaa be dixkix lo Xaa Tubka Nak,
nel wen nak xaa,
nel tira nak yalnkela cheen xaa!a
2 Xaa Israel guzh:
“Tira nak yalnkela cheen xaa.”
3 Xaa li Aarón guzh:
“Tira nak yalnkela cheen xaa.”
4 Re xaa nzheb ne Xaa Tubka Nak guzh:
“Tira nak yalnkela cheen xaa.”
5 Lo yalnales cheen na ngunii na lo Xaa Tubka Nak,
nu lee Xaa Tubka Nak mkeb lo na nu mzo xaa na tub pa chul.
6 Lee Xaa Tubka Nak nzo kwaan na,
zee nazhebt na ne na nik tub kwaan nzho mod le myet lo na.
7 Lee Xaa Tubka Nak,
nzo kwaan na,
lee xaa nle yud na,
zee nalet na xgab wii na lo re xaa nayii ne na.
8 Mas wen wii xaa lo Xaa Tubka Nak,
ke wii xaa lo myet.
9 Mas wen wii xaa lo Xaa Tubka Nak,
ke wii xaa lo re xaa non.
10 Rese yezh ngulo mzhaal dub welt lo na,
per kwaan le Xaa Tubka Nak,
na luux re xaa.
11 Dub welt lo na ngulo mzhaal xaa,
per kwaan le Xaa Tubka Nak,
na luux re xaa.
12 Mzhaal xaa lo na modxa nzhaal mbaz ser cho xaa,
per liger ngut xaa modxa liger nzek xaa yich lo ki.
Per kwaan le Xaa Tubka Nak,
na luux re xaa.
13 Mzob ya xaa na zee la na lo yo,
per lee Xaa Tubka Nak mle yud na.
14 Lee Xaa Tubka Nak,
nak yalngezh cheen na
nu nak xaa nzholl na lo,
lee xaa nak yalnaban cheen na.
15 Garli re xaa nali nak,
nzhon xaa bi cheen yalnix kwaan nzhé:
“Lee yalnabeyy cheen Xaa Tubka Nak mle gan lo dil.
16 Non nak yalnabeyy cheen Xaa Tubka Nak,
¡Lee Xaa Tubka Nak,
mle zyen kwaan gro!”
17 Nayeta na,
mas wen ban na,
zee za na kwent re kwaan mle Xaa Tubka Nak.
18 Nixa bid doo mted Xaa Tubka Nak na,
per namlaat xaa ngut na.
19 Bxal re pwert lach roo yidoo kwaan nali nak,
zee zeeb na za na dixkix lo Xaa Tubka Nak.
20 Kwaane nak pwert cheen Xaa Tubka Nak;
leeya zeeb xaa nali nak.
21 Gol na lo lu nel mbin lu xtizh na
nu mle lu yud na.
22 Lee ke kwaan mlebi re xaa nza yoo,
leeya mzhin ngok ke chul doo kwaan nzob xaa skin yoo.
23 Kwaane mle Xaa Tubka Nak
nu ndedyall be lo kwaane.b
24 Mbizh ne nak mbizh kwaan mle Xaa Tubka Nak;
yakla be nu gak nix lextoo be.
25 Naab na lo lu Xaa Tubka Nak,
te le yud nu;
naab na lo lu Xaa Tubka Nak,
le lu zee wen yo nu.
26 Wen doo xaa nze kwaan le Xaa Tubka Nak,c
axta leen xkidoo Xaa Tubka Nak nii wen nu xaa.
27 Xaa Tubka Nak nak Dios
nu mle xaa zee nla xni cheen xaa lo be;
mzelo yalni nu wee be ram yag axta lo xkach mdo.
28 Lu nak Xtios na kwaanzee gol na lo lu;
lu nak Xtios na kwaanzee le non na lu.
29 ¡Zaa be dixkix lo Xaa Tubka Nak nel wen nak xaa,
nel tira nak yalnkela cheen xaa!