Nali nak Xaa Tubka Nak
99
Xaa Tubka Nak,
nak rey;
nzhaal zheb re xaa yezh ne xaa.
Lee xaa nzob xsaw rop kerubin,
xaa nak mandad cheen xaa
nu lee xaa kun yizhyo.
2 Gro nak Xaa Tubka Nak,
xaa nzho yezh Jerusalén,
nu non xaa lo rese yezh.
3 Nzhaal gool re xaa lo lu nel naro nak lu nu zheb xaa ne xaa lu.
¡Nambey doo nak xaa!
4 Rey ngezh nak lu nu nkela lu kwaan wli.
Nali nle lu re kwaan;
nali nle lu lo re dii cheen Kob
nu nlu lu kwaan wli lo xaa.
5 Gool be lo Xaa Tubka Nak,
xaa nak Xtios be
nu kichxub be lo xaa.
¡Nambey doo nak xaa!
6 Ches rop Aarón ngok ngwleyy cheen xaa
nu lee Samuel mbill lo xaa;
ngunii xaa lo Xaa Tubka Nak,
nu lee xaa mkeb.
7 Leen tub xkaw ngunii xaa lo re xaa;
nu lee re xaa mlozhaw xley xaa,
ley kwaan mzaa xaa lo xaa.
8 Xaa Tubka Nak,
Xtios nu,
lu mkeb lo re xaa;
nu nak lu Dios xaa mche xjwalt re xaa,
nixa mtezi lu xaa lo re xjwalt xaa.
9 Gool be lo Xaa Tubka Nak,
xaa nak Xtios be,
kichxub be lo yi nambey cheen xaa,
nel Xaa Tubka Nak,
nak Xtios be,
¡Nambey doo nak xaa!