Rey cheen dubse yizhyo
Salm kwaan mkee David.
24
Cheen Xaa Tubka Nak nak dubse yizhyo,
rese kwaan nzho leena nu rese kwaan mban loya nak cheen xaa.
2 Nel lee xaa mlek yizhyo lo nistoo
nu mlek xaaya lo nis yuu.
3 ¿Cho nzho mod yixoob yi cheen Xaa Tubka Nak?
¿Nu cho nzho mod zo pa nambey cheen Xaa Tubka Nak?
4 Xaa nzhul nak nu xaa nambey nak lextoo,
loka cho nangwiit lo maj
nu nixa nanzeeta xaa le Dios kwaan yalkade.
5 Xaa zee kayaa kwaan wen lo Xaa Tubka Nak
nu kayaa xaa re kwaan wli cheen Dios,
xaa ngoo xaa lo yalgut.
6 Sbaa nzhaal le re dii,
xaa nkwaan Xaa Tubka Nak,
xaa nzhekla wii lo Dios cheen Kob.
{Mbaz}
7 Xal roo yoo cheen yidoo.
¡Laa xal roo pwert kwaan tira ndii,
zee zeeb rey xaa non!
8 ¿Cho nak rey xaa non?
¡Nak Xaa Tubka Nak,
xaa ngezh nu nanzhebt!
¡Xaa Tubka Nak,
nak xaa nle gan lo dil!
9 ¡Xal roo yoo cheen Jerusalén!
¡Laa xal roo pwert kwaan tira ndii,
zee zeeb Rey,
xaa non!
10 ¿Cho nak rey xaa non?
¡Nak Xaa Tubka Nak,
Xaa Nkano Dubse Yalnabeyy!
¡Lee xaa nak Rey xaa non!
{Mbaz}