TOPA in Judah Don Ding
10
1 Khuakhal kipat hunin TOPA tungah guah ngen un;huihpi meiipite a bawl TOPA ahi hi.
Amah in mite tungah guah zusak a,
a kua mahpeuh tungah ankungte a pia hi.
2 Milimte in zuau kam pau-in,
khongkhaite in mangmuhna-zuau mu uh hi;
amaute in amaan lopi-in mang khia uh a,
a mawkna-in a hehnem uh hi.
Tua ahi ciangin mite tuu bangin vakzau uh a,
a cing nei lo tuu bangin amaute a kinengniam hi.
3 "Tuucingte tungah ka heh suak lua-a,
a makaite dan ka thuaksak ding hi;
ahang in, Thahatpen TOPA in a ganhonte,
Judah innkuante don dinga,
gal sunga sakol hatpen a bangsak ding hi.
4 Judah panin innkiu khuambul suang hong pai dinga,
amah panin puanbuk khetphim,
amah panin kidona thalpeu,
amah panin gam-uk peuhmah, hong pai ding hi.
5 Amaute aa a vekpi un galsimna-a
kongzing buannawi a tuancilgawp mi thahatte bang ding uh hi.
TOPA in amaute ompih ahi manin gal do ding uh a,
sakol galkapte a lawnthal ding uh hi.
6 Judah innkuante ka thakhauhsak dinga
Joseph innkuante ka honkhia ding hi.
Amaute khuatuah ka hi manin
a ngei uh ka bangsak kik ding hi.
Keimah amaute Pasian TOPA ka hi manin
ka nial ngei loh bang ka hi ding a,
amaute ngetna ka dawng ding hi.
7 Ephraim-te mi thahat tawh kibang ding uh a,
zudawn bangin a lungkim ding uh hi.
A tate un tua mu-in kipak ding uh a,
TOPA sungah a lungdam ding uh hi.
8 Amaute khutvanin ka kaikhawm ding hi.
Amaute ka tankhia taktak dinga,
a masa lai-a bangin
tampi a pha ding uh hi.
9 Mite lakah amaute ka thehthanga,
mun tuamtuam gamlapi ah a om uh hangin kei hong phawk ding uh hi.
A tate uh tawh amaute suakta in
hong ciah kik ding uh hi.
10 Egypt panin amaute ka paikhiatpih dinga,
Assyria panin amaute ka kaikhawm ding hi.
A om nading uh om lo zah dongin
Gilead le Lebanon ah ka tunpih ding hi.
11 Amaute in lungkhamna tuipi kantan ding uh hi;
tuipi hualte ki-uk zo-in
Nile thuknate khempeuh a kangcip ding hi.
Assyria kiphatsakna kinuaisiah dinga,
Egypt sik ciangkhut a mangthang ding hi.
12 TOPA sungah amaute ka thakhauhsak dinga,
ama minin a kalsuan ding uh hi,"
TOPA in cikhia hi.