Thukhenna le Hotkhiatna
65
1 "Kei hong kan lote tungah kei le kei ka kilaak a;kei hong zong lote in hong mu uh hi.
Ka min hong sam lo minam khat tungah,
‘Hiah ka om hi, hiah ka om hi,’ ka ci hi.
2 Sun nilohin a paupeng mite tungah
ka khut ka zan hi,
tua mite pen amau ngaihsutna zui-a
lampi hoih lo a tawnte
3 huan sungah kithoihna-in biakna pia-a
leisek biakna-tau ah gim namtui halin
ka maitang tekteka
hong hehsakte;
4 han lakah tu-a zan thapai-in
thungena a dap zan hahhahte;
voksa nete le amau beel sunga
sa siang lo tui a koihte;
5 ‘Nang a dingin siangtho lua ka hih manin
kihemkhia inla, hong neh kei in!’ a ci mite ahi uh hi.
Tua bang mite ka nak vang sungah meikhu hi uh a,
sun niloh a kuang den mei ahi uh hi.
6 "En in, ka mai-ah gelhsa-in a om hi:
Daitakin ka om nawn kei dinga,
cingtakin ka thuk ding hi;
7 amaute ang sungah note mawhna le na pate uh mawhnate ka thuk khawm ding hi,"
TOPA in ci hi
"Bang hang hiam cih leh
amaute in mualliante tungah kithoihna hal uh a,
mualneute tungah ka min daisak uh ahi manin
amau sepsate thaman a cingin amau ang sungah, teh in ka thuk ding hi," a ci hi.
8 TOPA gen hih ahi hi:
"Lenggah bom ah lenggah tui om lai a,
mite in, ‘Tuate sungah a hoih pawlkhat om lai,
susia dah un,’ a cih bangin,
ka nasemte ka khualna-in tua bangin ka hih dinga
a vekun ka susia khin kei ding hi.
9 Ka mualliante a nei dingin Jacob pan le
Judah panin suan le khak ka piangkhiasak dinga;
ka teelsa mite in tuate luahin,
tua lai-ah ka nasemte a teng ding uh hi.
10 Kei hong zong ka mite adingin
Sharon in, tuuhon gamtatna mun suak dinga,
Achor Kuam, bawnghon giahna mun a suak ding hi.
11 "Ahi hangin TOPA a taisan
ka mual siangtho a mangngilh nang,
Kam-etna a sabuai phah a,
Sehkholhna adingin zuhelsa hai a sungpa,
12 ken, namsau adingin nang kong sehkhol dinga,
hong ngawngtan dingte dawhin na vekun na kun ding uh hi;
ahang in, kong sap hangin nong dawng kei uh a,
kong gen hangin na ngai kei uh hi.
Kei muhin gitlohna na sem uh a,
kei hong lungkimsak lote na teel uh hi," a ci hi.
13 Tua ahi ciangin Thupipen TOPA gen hih ahi hi:
"Ka nasemte in ne ding uh a,
note na hi uh leh na gilkial ding uh hi;
ka nasemte in dawn ding uh a,
note na hi uh leh na dangtak ding uh hi;
ka nasemte nuamsa ding uh a,
note na hi uh leh hong kimaizumsak ding hi;
14 Ka nasemte in amau lungsima pusuakkhia
lungdamna la sa ding uh a,
note na hi uh leh na lunggim man uh leh
na lungsim uh a kitapna hangin tau-in
na kapkhia ding uh hi.
15 Ka mite in hamsiatna-a zat dingin
na min uh na nusia ding uh a;
Thupipen TOPA in note hong thatin,
ahi hangin ama nasemte mindang a pia ding hi.
16 Leitungah thupha a ngen peuhmah in
thutak Pasian suangin a hih ding hi;
leitungah a kiciamte in
thutak Pasian ah tomlo ding hi.
Ahang in, a beisa-a lungkhamnate kimangngilhin
ka mit panin kisel ta ding hi.
A Thak Vante le Lei Thak
17 "En un, a thak vante le lei thak khat
ka piangsak ding hi.
A masa nate kiphawk nawn loin
lungsimin zong a kingaihsun kha kei ding hi.
18 Ahi hangin, Jerusalem nopsakna-in
ka piangsak dinga
a sunga tengte nuamsa ding uh ahi manin
ka piansaksa sungah nuamsa-in kipak tawntung un.
19 Jerusalem tungah ka lungnuam dinga,
ka mite laka om nuam ka sa ding hi;
tua sungah kahna le
kikona aw kiza nawn lo ding hi.
20 "Tua sungah naupang a ngeklai-a si
om nawn lo dinga,
putek a nuntak ding tan a nungta lo a om kei ding hi;
kum za khat nungta-a site,
a khansih in kingaihsun ding hi;
kum za pha aa lo-a site
hamsia thuakin kiseh ding hi.
21 Amaute in inn lamin a sungah teng ding uh hi,
lengguite suan ding uh a, a gah a ne ding uh hi.
22 Amaute lamsa inn sungah midangte teng nawn lo dinga,
amau suansate midangte in a ne kei ding hi.
Ahang in, singkung khat a hin tan mah
ka mite nungta ding uh a;
ka teelsate in amau sepsa
nuamtakin sawtpi a ne ding uh hi.
23 Amaute, amaute le a suan a khakte uh
TOPA thupha piak ahi manin,
a mawkna-a nasep suak loin,
khasiat nading lelin ta a nei kei ding uh hi.
24 Amaute hong sap ma-in ka dawng dinga;
amaute a paupau laitakun ka na za ding hi.
25 Keivom le tuuno gamta khawm dinga,
humpinelkai in bawngtal bangin buhtu a ne ding hi;
ahi hangin gulpi an ahileh leivui mah hi ding hi.
Ka mual siangtho tung khempeuh ah
amaute a kiliamsak a kisusia a om kei ding uh hi,"
TOPA in ci hi.