Thukhenna le Lametna
66
1 TOPA gen hih ahi hi:"Vantung ka tokhom hi a,
leitung ka khe-ngakna ahi hi.
Kei adingin na lam ding uh inn koi lai-ah om ahi hiam?
Ka tawlngak nading mun koi lai ahi hiam?
2 Hih nate khempeuh ka khut in a bawlsa hi a,
tua ciangin tuate na-a hong om hi lo ahi hiam?"
TOPA in ci hi.
"Ka thupi ngaihsut hih mipa ahi hi:
kiniamkhiatin a lungsimin kisika
ka thu hanga a lingpa ahi hi.
3 Ahi hangin bawngtalin biakna a piapa
mi thatpa tawh kibanga,
tuuno khat go-a biakna a pia peuhmah
ui ngawngtanpa tawh kibang hi;
an-a biakna a pia peuhmah
vok sisan piapa tawh kibanga,
tuateh phawkna-a gimnamtui a hal peuhmah
milim biapa tawh kibang ahi hi.
Amaute in amau deih zia le tong teel khin uh a,
amaute hinna in a kihhuaite nuam sa uh hi;
4 tua ahi ciangin amaute ka bawlsiat nadingin haksatna ka teel dinga
amaute kihtak pen amau tungah ka tungsak ding hi.
Ahang in, ka sap ciangin kuamah in hong dawng lo uh a,
ka gen ciangin kuamah in a ngai kei uh hi.
Amaute in kei muhin gitlohna sem uh a,
kei hong lungkimsak lo nate a teel uh hi," a ci hi.
5 No ama thu hanga lingte aw,
TOPA kammal za un:
"Na sanggamte un keima min hangin
hong mudahin hong hawlkhia uh a,
‘Na lungnopna uh i muh theih nadingin
TOPA kiminthangsak hen!’ ci uh hi.
A tua cih uh hangin amaute a kimaizumsak ding hi.
6 Khuapi pana husa za unla,
biakinnpi pana gamlumna za un!
Tua in, TOPA in a galte
amau thuak dinga kilawma a thuhna awging ahi hi.
7 "Tua nu in nausuahnatna a thuak ma-in
nau suaka,
a tungah natna a tun ma-in
tapa khat a nei hi.
8 Tua bang na kua in za ngei ahi hiam?
Tua bang na kua in mu ngei ahi hiam?
Ni khatin gam khat suakkhia thei a,
tomkha sungin minam khat piangkhia thei ahi hiam?
Tua hi napi Zion inlah nausuahnatna a thuakphetin
a tate a suak pah hi.
9 Ta suah hun tungsak napi
ta suaksak lo ka hi hiam?" TOPA in a ci hi.
"Ka suahsak ding ciangin
a sul khakcip ka hi hiam?" note Pasian in a ci hi.
10 Jerusalem a it note khempeuh aw, amah tawh nuamsa unla,
ama hangin kipak un;
ama hanga a thum note khempeuh aw,
amah tawh nuamsa khawm un.
11 Ahang in, ama angah
hehnepna nawi na teepteep ding uh a,
na gilvah ding uh hi;
a nawi gau mahmah nuam na sa ding uh hi," a ci hi.
12 Ahang in, hih in TOPA gen ahi hi:
"Gun bangin ama lungnopsakna ka khangsak dinga,
minamte hauhna lui khang ka bangsak ding hi;
a khutin hong tawi-in a nawi na teep ding uh a,
a khuk tungah na diang ding uh hi.
13 Nu khatin a ta a hehnep bangin,
nang kong hehnem dinga;
Jerusalem tungtang thu ah nang hong kihehnem ding hi," a ci hi.
14 Hih thu na muh uh ciangin na lungsim uh nuam dinga,
lopa bangin na nosuak ding uh hi;
ama nasemte tungah TOPA khut kilang dinga
ahi hangin a galte tungah a hehna a lak ding hi.
15 En un, mei tawisa-in TOPA hong pai a,
ama sakollengte pingpei tawh kibang hi.
A hehna in a thangpaihna hong puaksuk dinga,
amah in meikuangin a taai ding hi.
16 Ahang in, TOPA in mi khempeuh tungah
mei le namsau-a thahna tawh thu khen dinga,
TOPA thahsa mi tampi ahi ding hi.
17 "Huante sunga pai dingin amaute kisiansuah a, amau le amau a kisiangsakte, voksa, zusa le a kihhuai nate ne a, a laizang aa pena a zuite - amaute a beimang khawm ding uh hi," TOPA in cikhia hi.
18 "Tua hi-a amaute sepna le a ngaihsutnate uh hangin keimah hong pai-in bb minamte khempeuh le pau khempeuh ka kaikhawm dinga, ka minthanna a mu ding uh hi.
19 "Amaute lakah lim khat ka omsak dinga a suakta lai pawlkhat minamte - Tarshish-te tung, Libya mite cc tung le Lydia (thalkap siama minthang)-te tung, Tubal-te le Grecce-te tung le ka vang neihna le ka minthanna a za nai lo a gamla-a om tuikulhte tungah ka sawl ding hi. Amaute in minamte tungah ka minthanna a tangko ding uh hi. 20 Tuateh amaute in minamte khempeuh tung panin TOPA tunga biakna-in Jerusalem a ka mual siangtho ah sakol tung, sakolleng tung, leng tung, laa-sakol tung le kala-oh tungah na sanggamte khempeuh uh hong puak ding uh hi," TOPA in a ci hi. "Israel-te in TOPA biakinnpi ah thukham ngeina-in a siangtho beelte in an-a biakna a puak bangun amaute in hong puak ding uh hi. 21 Tuateh amaute pawlkhat siampi ding le Levi-te dingin ka tengkhia ding hi," TOPA in a ci hi.
22 "Ka bawl ding athak vante le lei thak ka mai-ah a kip den bangin, note le na suan na khakte uh min a kip ding hi," TOPA in cikhia hi. 23 Kha Thak khat pan adang khatah, Sabbath khat pan adang khatah mihing khempeuh hong pai-in ka mai-ah a kun ding uh hi," TOPA in ci hi. 24 Tuateh amaute paikhia-in kei hong lehdo misiate luang a en ding uh hi; amaute than a si kei dinga, amaute mei zong mit loin mihing khempeuh in a kih ding uh hi," a ci hi.