Pahtawina La
26
1 Tua ni ciangin Judah gamah hi la a kisa ding hi:Khuapi muanhuai khat i nei hi;
Pasian in kulhte le a kanhte dingin
hotkhiatna a bawl hi.
2 A thumaan minamte -
upna a nei den minam lut nadingin
kongte hong un.
3 Lungsim kippa in
nang hong muang ahi manin
lung nuamtakin kem ta in.
4 A tawntungin TOPA muangun,
ahang in TOPA, tua TOPA tawntung Suangpi ahi hi.
5 Amah in a sangna-a tengte niamkhiat a,
khuapi sangpi a khiasuk hi;
leidongin tamsak a,
dengkhamin leivui a suah hi.
6 A kinengniamte’ khete,
mizawngte khekhapte ahi -
khete in a tuancil ding hi.
7 A thumaante lampi tamkim a;
Thutang Pa aw, a thumaante lampi na nelsak hi.
8 Hihi, TOPA aw, na thukham ba zui-a kalsuan dingin
nang kong ngak uh hi:
kote lungsim deihna in
a tawntunga nangma min phawkna ahi hi.
9 Zan ciangin nang kong ngaihsunsun a,
zingsang ciangin ka kha in nang hong ngai hi.
Leitung ah na thukhenna hong tun ciangin
leitung mite in thumaan a thei pan uh hi.
10 A tatsiate tungah hehpihna a kilah hangin,
thumaan a thei thei kei uh hi;
thutanna gamah tatsia dingin a kuan laitakun
TOPA thupina a thusim tuan kei uh hi.
11 TOPA aw, na khut sangpi in na viktoh hangin
amaute in a mu kei uh hi.
Na mite adingin na deihluatna musak inla amaute maizumsak in;
na galte a kangtum dingin meikuangsa koih khol in.
12 TOPA aw, ko adingin lemna na kipsak zo hi;
ka sepzawhte khempeuh uh ko adingin nangma sepsa ahi hi.
13 TOPA kote Pasian aw, nang lo pasian dangte in hong uk uh hangin
kote in nangma min bek ka pahtawi uh hi.
14 Tu-in amaute si uh a, a nungta nawn kei uh hi;
a paisa khate a tho nawn kei uh hi.
Amaute dan na thuaksak a, na siasak mang hi;
amaute kiciamtehna khempeuh na phiatmang hi.
15 Minam khat nong liansak hi, TOPA aw;
ko minam nong liansak hi.
Nangmah bek in minthanna na ngah hi;
gamgite khempeuh nangma sotsa ahi hi.
16 TOPA aw, amaute lungdongin nangmah hong zuan uh hi;
amaute na sek ciangin
thu ngenin a phun thei mialmial bek uh hi. cb
17 Numei gai lai nausuak kuan
na sa-in kizia a, a kah bangin
kote zong nangma mai-ah kong kiko uh hi, TOPA aw.
18 Ko zong nau ka paii uh a, na sa-in ka kizia uh hi;
ahi hangin huih bek ka suakkhia uh hi.
Kote in leitungah hotkhiatna ka puak kei uh hi;
leitunga mite tungah bangmah ka semkhia kei uh hi.
19 Ahi hangin na misi te uh nungta dinga,
a pumpite uh a tho ding hi.
No leivui laka tengte aw,
khanglo unla nuamin kiko un.
Na daitui uh zingsang daitui tawh kibang hi;
leitung in a misite a hingkhia ding hi.
20 Ka mite aw, pai un,
na inndei sunguah lut unla kong kikhaknelh un;
ama thangpaihna a bei matengin
tawlkhat sung bu phot un.
21 En un, leitung mite amau mawhna dan thuaksak dingin
a tenna pan TOPA hong paikhia hi.
Leitung in ama tunga sisan luannate sin lo dinga;
ama thahsate a selcip nawn kei ding hi.