TOPA Kiphat Hen
25
1 TOPA aw, ka Pasian na hi hi;muanhuaina kiciantakin
tanglai peka na geelsa nate
a piandang nate bawl khin na hi manin
nang kong tawisang dinga, na min ka phat ding hi.
2 Nangmah in khuapi, ninlompi na suaksak a,
kulha ki-um khua susia-in
gamdangte mun muanhuaite khuapi a hi nawn lo dingin na bawla;
a kilam kik ngei nawn kei ding hi.
3 Tua ahi manin mi thahatte in nang hong pahtawi ding uh a,
a cikzia thei lo minamte’ khuapite in nang hong zahtak mahmah ding uh hi.
4 Mizawngte adingin bukna na hi a,
a tasamte lungdon cianga bukna mun,
huihpi pana kidalna le
nisa pana niliim na hi hi.
Ahang in a cikzia thei lo husan in
kulh a mut gawp huihpi tawh kibanga
5 sehnel-gam nisa tawh a kibang hi.
Meiilum in nisa a dialhsak bangin
gamdangte gamlumna na daisak a,
tua ciangin a cikzia thei lo mite sip dide hi.
6 Thahatpen TOPA in hih mual tungah
mi khempeuh adingin an lim mahmah,
zu gei mahmah -
an limpen nekna le zu cilpen dawnna pawi a bawl ding hi.
7 Amah in hih mual tungah
mi khempeuh khuhin a vialcip,
minamte khempeuh a kituamnate susia ding hi,
8 sihna a valhtum den ding hi.
Thupipen TOPA in maitang
khempeuh pana khitui teng nulsak dinga,
leitunga ama mi khempeuh
minsiatna a beisak ding hi.
TOPA gensa ahi hi.
9 Tua ni ciangin amaute in,
"Hih in eite Pasian hi takpi hi;
amah i muanga, amah’n hong hon hi.
Hih in TOPA, amah i muanpa ahi hi;
ama hotkhiatna ah nuamsa-in kipak ni," a ci ding uh hi.
10 Hih mualtung ah TOPA khut a kinga ding hi;
ahi hangin nindum sungah buhtu a kisikcip bangin
ama nuai-ah Moab-te a kisikcip ding hi.
11 Tuipekpa in tuipekin a khut a van bangin
a sungah a khut uh a van ding uh hi.
Pasian in amaute kiphatsakpih khut siamna aa
a niamkhiatsak ding hi.
12 Amah in a kulh muanhuaite uh zong
nuaikhiatsakin a niamsak ding hi;
amah in tuate lei tawh kicinin nuaikhiat dinga
leivui a suaksak ding hi.