6
1 Sunni nuai-ah gitlohna adang khat ka mu a, mite tungah a gik mahmah hi: 2 Pasian in mi khat a lungsima a deih teng a kim nadingin hauhna neihsa lamsa le minphatna pia-a ahi hangin Pasian in amah nopsasak loin ama tangin midang khat in nopsak lawh hi. Hih in a mawknapi hi-a a dahhuai gitlohna ahi hi.3 Mi khat in ta za khat nei-in kum tampi nungta thei hi; amah bang tanvei nungta taleh ama daupaina a nopsakpih kei a, a kivui ding banga a kivui kei leh amah sangin lamhzui naungeek hoihzaw hi. 4 A khiatna nei loin paikhia a, khuamial ah ciah kikin ama min khuamial sungah kikhupcip hi. 5 Tua in ni mukha loin bangmah a theih loh hangin tua mipa sangin sawtvei tawlnga zaw a - 6 amah kum tul khat zahnih nungta ta leh ama daupaina nuam a sakpih kei hi.A vekun a paina mun uh kibang hi lo ahi hiam?
7 Mi khempeuh gimpih a kama ding bek hi napi,
a ankam limna in phazo sak hun nei lo hi.
8 Mihai khat sangin mipil khat
a hamphatzawkna bang ahi hiam?
Mizawng khat in midangte mai-ah a omzia ding
a theih hangin bang phatuam ahi hiam?
9 Ankam limna zon kawikawi sangin
mita muhna hoihzaw hi.
Hih zong a mawknapi hi a,
huih nungdelh mah hi lel hi.
10 A piangkhiasa peuhmah min kivawhsa hi-in,
mihing bang hiam cih a kitheisa hi a;
amah sanga hatzaw khat
a to ngam kuamah a om kei hi.
11 Thu tam semsem leh
khiatna nei lo semsem hi;
tua in mi khatpeuh bang ci phattuamsak hiam?
12 Mihing khat in a khiatna nei lo hun tomkha sung niliim banga a khenkhen sungin, mihing khat nuntak nadingin a hoih kua in thei ding ahi hiam? Amah a sih khit ciangin sunni nuai-ah bang piang ding cih ama tungah kua in gen thei ding ahi hiam?