Pilna
7
1 Paknamtui hoih sangin minpha hoihzaw a,suahni sangin sih ni hoihzaw hi.
2 Mi khempeuh tawpna, sihna hi a,
a nungta laite in a lungsimah ciamteh ding ahi manin
pawibawlte inn a hawh sangin
a dahte inn a hawh hoihzaw hi.
3 Nuihna sangin dahna hoihzaw hi,
bang hang hiam cih leh lungtang adingin dahmai a hoih hi.
4 Mipilte lungsim a dahte inn ah om a,
ahi hangin mihaite lungsim nopna inn ah a om hi.
5 Mihaite lasak ngaih sangin,
mipil khat hong taina thusim hoihzaw hi.
6 Beltaw nuai-a lingkung puak zuahzuah bangin
mihaite nuih puak zuahzuah hi.
Hih zong a mawknapi mah ahi hi.
7 Amaan lo-a ngahna in mipilpa haisak a,
golhsum in lungsim nawngkaisak hi.
8 Thu khat a kipatna sangin a tawpna hoihzaw a,
kiphatsakna sangin lungduaina hoihzaw hi.
9 Mihaite lungtang ah hehna teng ahi manin
na hehna zah dongin lungtom kei in.
10 "Bang hangin tanglai mite, hihte sangin hoihzaw hiam?" ci kei in,
ahang in, hih bang dotna pilvai lo hi.
11 Gouluah khat bangin pilna hoih a,
ni a mute a hampha ahi hi.
12 Sum in hong liah bangin
pilna in hong liah hi,
ahi hangin theihna a hoihzawkna in:
pilna in a neipa nuntakna hutsak hi.
13 Pasian nasepsate ngaihsun dih in:
a kawisaksate
kua in mamsak thei ahi hiam?
14 Hun a hoih ciangin, lungdam in;
hun a siat ciangin ngaihsun in:
Pasian in ni khat le nidang khat
a kibanga a bawl ahi hi.
Tua ahi ciangin mi khat in
a mailam thu ding bangmah a mukhia thei kei hi.
15 Hih a mawknapi a ka nuntak sungin, hihte gel ka mu khin hi:
a thumaan mi a thumaanna ah mangthang a,
a gilo mi a gilosapi mahin sawtpi a nungta hi.
16 Thumaan lua kei inla lah pil lua kei in -
bang hangin nang le nang
kisusia ding na hi hiam?
17 Gilo lua kei inla lah hai kei in -
bang hangin sihhun ma-in
si ding na hi hiam?
18 A khat lencipin a khat pen zong
khah tuan loh ding hoih hi.
Pasian a kihta peuhmah in a uanglua khempeuh pel uh hi. aa
19 Pilna in, khuapi khat sunga gam-uk sawm sangin
mipil khat vangliansak zaw hi.
20 Leitungah a maana gamta a mawh ngei lo
a thumaan mi kuamah a om kei hi.
21 Mi thugen peuhmah thusim pahpah kei in,
tua hi kei leh na nasempa hong hamsiatna na za kha ding a -
22 na lungsim sungah nang zong
midangte tamveipi na hamsiat lam na thei hi.
23 Hihte khempeuh pilna tawh ka sittel hi-a,
"Pil ka sawm hi,"
ahi hangin hih in kei theih zawh loh ahi hi.
24 Bangbang ahi zongin pilna gamla lua a,
a thuk penpen ahi hi -
kua in mukhia thei ding ahi hiam?
25 Tua ciangin theihtelna lamah ka lungsim ka hei a,
pilna le nate ngimna le kheltatna
a telhakna le haina a haihuaizia telkan ding le
a zongkhia dingin ka lungsim ka hei hi.
26 Thang nam khat ahi numei,
a lungsim thang kamsa hi-a,
a khut sikkhainiang ahi numei,
sihna sangin a khaat zawk lam ka phawk hi.
Pasian a lungkimsakpa numei panin suakta dinga,
ahi hangin mawhneipa tuanu thangah a awk ding hi.
27 Siapa bb in, "En un, ka muh khiat hih ahi hi:
Nate a ngimna theih nadingin na khat tungah
adang khat ka gawma -
28 ka zonzon lai mahin ka mu tuan kei hi -
pasal tul khat lakah a thutang khat ka mu a,
numei khempeuh lakah
numei thutang khat zong ka mu kei hi.
29 Hih bekbek ka mu hi:
Pasian in mite a thutang dingin bawla,
ahi hangin mite in ngimna tampi a zongkhia uh hi.