Pasian Kihta In
5
1 Pasian inn ah na pai ciangin kidawmin gamta in. A khialh lam uh a thei lo mihaite biakna sangin thu ngai dingin a kiangah pai lecin hoihzaw hi.2 Pasian mai-ah na khatpeuh na gen ciangin
kam paukhiat ding manlang kei inla,
na lungsimin nawh ngaihsut kei in.
Pasian vantungah om a,
nang leitunga om na hi hi;
tua ahi ciangin na kam tawmsak in.
3 Lunghimawhna tampi a om ciang in manga a kimat bangin, kam tampi a kipau ciangin, mihaipa haina kilangkhia hi.
4 Pasian tungah na kiciam ciangin tangtungsak hak kei in. Amah mihaite tungah lungdam lo hi, na kiciamna tangtun in. 5 Kiciamna tangtungsak loh sangin, kiciam loh hoihzaw hi. 6 Na kam tawh mawhna sung kitunsak kei in. Biakinnpi thupuakpa kiangah, "Ka kiciamna ka khial hi," ci kei in. Bang hangin na thugenna ah Pasian hehin na khut a na sepsa susia ding ahi hiam? 7 Mang tampi mat le kam tampi pau a mawknapi ahi hi. Tua ahi ciangin Pasian kihta-in om in.
Hauhna Amawknapi
8 Gam sungah mizawngte kinengniam a, thumaan le thutang a kinial na muh leh lamdang sa kei in; ahang in, ulian khat amah sanga lianzaw khat in ena, amaute gel tungah a sangzaw dang om lai hi. 9 Gam sunga piangte mi khempeuh in tanga; lo panin kumpipa bek in metlawh hi.
10 Sum iplah peuhmah in sum a deihzah nei ngei lo a;
hauhna iplah peuhmah a ngahzah tawh a lungkim ngei kei hi.
Hih zong a mawknapi ahi hi.
11 Nate a khanna tawh ki zui-in,
tuate a ne ding a khang hi.
Tua ahileh a neipa in a mitin a muh nuam a sak longal,
ama adingin bang phatuam ahi hiam?
12 Nasempa khat in tawm ne in
tam ne taleh a ihmut nuam a,
ahi hangin mihaupa a hauhletna in
a ihmusak thei kei hi.
13 Sunni nuai-ah a dahhuai mahmah gitlohna khat ka muh in:
hauhna in a neipa nasak a,
14 vangsiatna hangin hauhna maimanga,
tapa a neih ciangin
ama ading bangmah a nusiat kei hi.
15 Mihing a nu sung pan guaktangin suahkhia a,
a suahkhiat bangin a paikhia ding hi.
A khut sungah a sepsa
bangmah a pua thei kei hi.
16 Hih zong a dahhuai gitlohna mah ahi hi:
Mi khat a suah bangin pai kik hi,
huih adingin gimpi-a na a sep nungsang
bang lawhtak ahi hiam?
17 A nuntak hun sung lawhsamin,
lunggimin hehsa-in khuamial lakah an a ne hi.
18 Tua ciangin mi khat in sunni nuai-ah Pasian piak tomkha a nuntak hun sungin gimpipi-a a sepsate ne-in dawnin kham a ngah ding ama adingin hoih hi, ci-in ka ngaihsun hi - ahang in, ama lawhtak hih ahi hi. 19 Tua tham loin mi khatpeuh Pasian in neihsa lamsa pia-a a hauhna nuamtakin a zatsak leh ama lawhtak tua mah ahi ciangin sang henla a nasepna ah nuamsa hen - hih in Pasian letsong ahi hi. 20 Pasian in a lungsim lungkimna tawh kem ahi manin a nuntak sung nite a ngaihsun kha kei hi.