146
1 TOPA phat un. aaKa hinna aw, TOPA phat in.
2 Ka nuntakna khempeuhin TOPA ka phat ding hi;
ka nuntak laiteng ka Pasian phatna ka sa ding hi.
3 Kuamah a hon thei lo kumpitapate,
a si mihingte muang kei in.
4 Amaute kha a paikhiat ciangin lei ah ciah kik uh a;
tua ni mah in amaute ngimna bangmah suak lo hi.
5 Ama huhpa-a Jacob Pasian a nei mi,
a lametna ama Pasian, TOPA ah a nga mi thupha ngah ahi hi.
6 Amah leitung le vantung,
tuipi le a sunga om peuhmah a Bawlpa -
tua TOPA a tawntungin muanhuai den hi.
7 Amah in a kinengniamte’ thu lenkip-a,
a gilkialte an a pia hi.
TOPA in thongkiate khahkhia in,
8 TOPA in mittawte khua musak a,
TOPA in a kunsukte phongto in
TOPA in a thumaante a it hi.
9 TOPA in pemtate cinga,
pa nei lote le meigongte vakin
migilote lampi ahileh a maimangsak hi.
10 TOPA in uk tawntung a,
Zion aw, na Pasian in khang tawntungin uk hi.
TOPA phat un.