135
1 TOPA phat un. daTOPA min phat un;
No TOPA’ nasemte
2 no TOPA inn sunga nasemte,
i Pasian inn huanga nasemte aw, amah phat un.
3 TOPA hoih ahi manin TOPA phat un;
nuam ahi manin a min phatna la sa un.
4 Ahang in TOPA in ama adingin Jacob teel khin a,
ama neihsa a goupi dingin Israel a teel khin hi.
5 TOPA a liat lam ka thei-a,
pasiante khempeuh sangin i Topa lianzaw hi.
6 TOPA in vante sung le leitung ah,
tuipite le a thukna munte khempeuh ah
ama utut a bawl hi.
7 Amah in leimongte pan meiite kahtosakin
khuaphia le guah sawla,
a kholna panin huih a puakkhia hi.
8 Amah in Egypt-a ta masa,
mihing ganhing ta masate, sattuk hi.
9 Egypt aw, ama’n nang sung, Pharaoh le a nasemte khempeuh langah
limte le nalamdangte a sawl hi.
10 Amah in minamte tampi sattukin
kumpi thahatte a that hi -
11 Amor-te kumpipa Sihon,
Bashah kumpipa Og le
Canaan kumpite khempeuh that a -
12 a gam uh goutanh ding,
a mi Israel-te goutanh dingin pia hi.
13 TOPA aw, na min kip tawntung a,
TOPA aw, khang sawnsawnte dongin a thang kikkik ding hi.
14 Ahang in, TOPA in a mite tungah thu khenin
a nasemte a khuatuah ding hi.
15 Minamte’ milimte pen ngun le kham hi-a,
mihing khuta kibawl ahi hi.
16 Tua in kam nei napi pau thei lo a,
mit nei napi khua a mu thei kei hi;
17 tuate in bil nei napi khua za thei lo uh a,
a kamun huu a sang tuan kei uh hi.
18 Tuate a bawlte tuate tawh kibang dinga,
tuate a muangte khempeuh zong tuate tawh kibang ding uh hi.
19 Israel innkuante aw, TOPA phat un;
Aaron innnkuante aw TOPA phat un;
20 Levi innkuante aw, TOPA phat un;
no amah a kihtate aw, TOPA phat un.
21 Zion panin Jerusalem-a a teng
TOPA kiphat ta hen.
TOPA phat un.