99
1 TOPA in uk hi,minamte ling uh hen;
amah cherub-te kikal kumpi tokhom ah a tu hi,
leitung kiling hen.
2 Zion ah TOPA lian a;
minam khempeuh tungah amah kitawisang hi.
3 A lipkhaphuai na min lianpi amaute in phat uh hen -
amah siangtho hi.
4 Kumpipa a thahat hi,
amah in thutang it hi -
deihsaktuam neihlohna na kipsak a;
Jacob ah thumaan le thutangin na sem khin hi.
5 Eite Pasian TOPA tawisang unla
a khengakna ah bia un;
amah siangtho hi.
6 Ama siampite lakah Moses le Aaron kihel uh a,
ama mina kilote lakah Samuel kihel hi;
amaute in TOPA sam uh a
amah in dawng hi.
7 Amah in meii khuampi panin amaute hopih a;
amaute in ama piak ngeina kipte le thukipte a zui uh hi.
8 Kote Pasian TOPA aw,
amaute na dawnga;
amau tatkhialhna aa dan na piak hangin,
Israel-te bb adingin mawhna a maisak Pasian na hi hi.
9 Eite Pasian, TOPA siangtho ahi manin,
i Pasian TOPA tawisangin
ama mual siangtho ah bia un.