<<    <     Phatna     98     >    >> 
Phatna-la khat.
98
1 TOPA in a piandang nate bawl ahi manin
lathak khat amah sak un;
a taklam khut le a ban siangtho in
ama ading hotkhiatna a sem khin hi.
2 TOPA in ama hotkhiatna kitheisak khin a,
minamte tungah ama thumaanna a laakkhia hi.
3  Amah in Israel innkuante tungah a itna le
a muanhuaina phawk khin zo hi;
leimongte khempeuh dong in eite’
Pasian hotkhiatna a mu khin uh hi.
4  Leitung khempeuh aw, lungnuamin TOPA tungah kiko un,
tumtheih tumin lungnopna la sakhia zuahzuah un;
5  harp tumin TOPA tungah gingsak unla,
la awging le harp thuahkhawmin
6  pengkulte le tuutal kite gingkhiasak unla -
Kumpipa ahi TOPA mai-ah lungdamin awng un.
7  Tuipi le a sunga om khempeuh le
leitung le a tunga teng khempeuh kithawn hen.
8  Gunte in a khut uh bengin
mualte in lungdamin la sakhawm uh hen;
9  Leitung thukhen dingin TOPA hong pai ahi manin
ama mai-ah amaute in la sa uh hen.
Amah in leitung buppi thumaanin thu khen dinga,
guptuam paihtuam nei loin mite thu a khen ding hi.