96
1 Lathak khat TOPA sak un;leitung khempeuh aw, TOPA la sak un.
2 TOPA la sak unla ama min phat un;
nisimin ama hotkhiatna tangko un.
3 Minamte lakah ama minthanna pulak unla,
mi khempeuh lakah a nasep piandangte pulak un.
4 Ahang in TOPA lian a, a phattak pen ahi hi;
pasiante khempeuh khengin kihtak ding ahi hi.
5 Ahang in minamte’ pasian khempeuh milimte hi-a,
TOPA in ahileh vante a bawl hi.
6 Ama mai-ah nopcitna na le thupina om a;
a munsiangtho sungah hatna le minthanna a om hi.
7 Minamte innkuante aw, TOPA ahi ding bangin hisak un,
TOPA tungah a minthanna le a thahatna bangin hisak un.
8 Ama min tawh kituakin TOPA minthangsak un;
biakna kengin ama huang sung hong zuan un.
9 Ama sianthona ca a thupina tawh kituakin TOPA bia unla
leitung khempeuh ama mai-ah ling un.
10 Minamte lakah, "TOPA in uk hi," ci un.
Leitung kiptakin kikhosak a kikhin thei lo hi;
amah in guptuam paihtuam nei loin minamte thu a khen ding hi.
11 Vante nuam uh henla, leitung kipak hen;
tuipi le a sunga omte khempeuh kithawn uh hen;
12 lote le a sunga omte in nuamsa uh hen.
Tua ciangin tulak a singkungte khempeuh in nuamna la sa ding uh a;
13 TOPA hong pai-a, leitung thukhen dingin hong pai ahi manin
amaute in a mai-ah la a sa ding uh hi.
Amah in thumaanin leitung buppi thu khen dinga,
thutakin mite thu a khen ding hi.