Tumtheih makaipa ading. "Thukhun unok kungte" aw a sak. Asaph phuah. Phatna-la khat.
80
1 Israel Cingpa, tuuhon banga Joseph a makaihpa;cherub-te kikal ah tu a,
2 Ephraim, Benjamin le Manasseh mai-a a tangkhiapa aw, kote hong za in.
Na thahatna phong inla hong
pai-in kote hong hon in.
3 Ka ngei uh hong bangsak in Pasian aw;
kote hong kihotkhiat theih nadingin
ko tungah na mai hong taan in.
4 TOPA Thahatpen Pasian aw,
na mite thungetna langkhatah
bang tanvei hehsan lai ding na hiam?
5 Khitui anlum in amaute na vak khin a;
kuang-uk dimin amau khitui na dawnsak khin hi.
6 Ka vengte uh tungah phunna bul nong suaksak a,
ka galte un hong zahko uh hi.
7 Ka ngei uh hong bangsak in a Thahatpen Pasian aw,
kote hong kihotkhiat theih nadingin
ko tungah na mai hong taan in.
8 Egypt panin lenggui khat na puakhia a;
minamte nawhkhia in tua na suan hi.
9 Na suan nading mun na hah sianga,
tua in zungkha-in gamsung a dim hi.
10 A liim in mualliante tuam a,
ahiangte in tamtak liante hiang a liah hi.
11 A guipite Tuipi aa lam ah zaam a,
a hiang neute Gunpi bb dongah a zaam hi.
12 A tawn khate khempeuh in a gah a lawh theih nadingin
bang dinga a kulhte sukham na hi hiam?
13 Tulak a ngal khaatte in phukek uh a,
gamlak ganhingte in kivakna-in nei uh hi.
14 A Thahatpen Pasian aw, ko kiangah hong kileh in!
Van pan hong ensuk inla mu in!
Hih lenggui cing in,
15 a zung na khut taklama na suansa hi a,
a tapa cc nangmah mah in nang adinga na laptoh ahi hi.
16 Na lenggui kisattat a mei in a kang hi;
na mite na taihilh a, a kisia uh hi.
17 Na taklam a mipa nangmah mah in
na laptoh mihing tapa tungah na khut nga in.
18 Tua ciangin nang kong taisan nawn kei ding uh hi;
kote hong puahpha in, na min kong sam ding uh hi.
19 Ka ngei uh hong bangsak in TOPA Thahatpen Pasian aw;
kote hong kihotkhiat theih nadingin
ko tungah na mai hong taan in.