Tumtheih makaipa ading. "Susia kei in" cih aw a sak ding. David phuah. Miktam fa khat. Saul in David a thah theih nadingin a inn vil dinga mi a sawl hun a.
59
1 Pasian aw, ka galte panin hong hukhia in;ka langa dingte panin hong dal in.
2 A sia-a gamtate panin hong hu inla,
sisan suah hat mite pan hong honkhia in.
3 Amaute in kei hong pansim lam uh mu in!
TOPA aw kei mawh, kei khialhna om lopi-in
mi ngongtatte in hong sawmsim uh hi.
4 Khialhna ka bawl loh hangin kei sim dingin a baihsa-in om uh hi.
Hong huh dingin tho in; ka tuah siat hunin hong en in.
5 Israel’ Pasian, a Thahatpen Pasian, TOPA aw,
minam khempeuh dan thuaksak dingin nangmah hong tho inla;
a lehhek migilote lainat kei in.
6 Amaute nitak ciang ciahin
uite bangin ngik uh a,
khuapi kimkot ah a vak khuankhuan uh hi.
7 A kam panun a phitkhiat uh en in -
a muk panun namsaute phitkhia uh a,
"Kuan hong za ding hiam?" ci uh hi.
8 Ahi hangin TOPA aw, nang amaute nuihsan inla
tua minamte khempeuh zahpih in.
9 Ka Thahatna aw, nangmah kong mitsuan hi;
Ka mai-ah Pasian pai dinga
kei hong gensiate tungah hong kisialsak ding hi.
11 Kote’ lum ab Topa aw, amaute that kei in,
na thah leh ka mite in a mangngilh ding uh hi.
Nangma hatna-in kawivakvaksak inla
amaute niamkhiat in.
12 A kamte uh mawhnate,
a muk ua a paute uh hangin-
amaute kisaktheihna ah amaute mah lehmatsak in.
Amaute in hamsiat in zuauthu a genna uh hangin
13 thangpai-in hultum henla
a om nawnloh dongun amaute hultum hen.
Tua ciangin Pasian in Jacob uk hi cih
leimongte dongin a kithei ding hi.
14 Amaute nitak ciangin ciah uh a,
uite bangin ngikin khuapi kimkot-ah
a vak khuankhuan uh hi.
15 An zongin sukvak tovakin,
a kham zawh kei uh leh ham ngaungau uh hi.
16 Ahi hangin nang ka kulhpi le
lungkham hunin ka belh na hi manin
na hatna la-in ka sa dinga,
zingsangin na itna la in ka sa ding hi.
17 Keima Thahatna aw, nang phatna kong sak hi;
Pasian aw, nang ka kulhpi le ka it Pasian na hi hi.