Tumtheih makaipa ading. "Unokte" aw in. Korah’ Tapate phuah. Maskil aa khat. Kitenna la.
45
1 Ngaihsutna thupi khat in ka lungsim hong phuut-a,kumpipa ading la tangte suutin,
ka leii laigelh siampa laikung khat ahi hi.
2 Nang mi hoih pha pen na hi a,
Pasian in thupha hong piak densa ahi nungsang;
na mukte hehpihna tawh a kinilh hi.
3 A thahatpa aw, na pangah na namsau kuah inla;
thupina le kumpi hihna silh ta in.
4 Thutak kiniamkhiatna le thumaanna hanga gualzo dingin
na kumpi thupina tawh tuangta in;
na taklam khut in a mulkimhuai sepnate lak ta hen.
5 Na thaltang hiamte in kumpipa’ galte lungtang sunlet henla
nangma khe nuai-ah minamte puk uh hen.
6 Pasian aw, na kumpi tokhom a tawntungin omden dinga;
thutang sik ciangkhut khat na kumpi-gam sik ciangkhut hi ding hi.
7 Thumaanna na it a gitlohna na mudah hi;
tua ahi ciangin Pasian, na Pasian in nopna sathau hong nilhna tungtawnin
na pawlte tungah hong koih hi.
8 Na puansilhte myrrh le aloes le thalsing namtuite-in a namtui hi;
saiha-a kizem kumpi innte panin
khausai tumtheihte in nang hong kipaaksak hi.
9 Na pahtawi numeite lakah kumpipa’ tanute kihel a;
na taklam ah Ophir khama kizem kumpi mo om hi.
10 Tanu aw, ngai in ngaihsun inla na bil ngat in:
Na mite le na pa innkuante mangngilh in.
11 Na mel hoihna in kumpipa lungtungsak hi;
na topa ahi manin amah pahtawi in.
12 Tyre Tanu, letsong bb tawh hong kuan dinga;
mihaute in na angvanna hong zong ding uh hi.
13 Kumpipa’ tanu a inndei sungah minthanna khempeuh tawh om a;
kham tawh a puantual kigankhawm hi.
14 Puangial tuamtuam tawh kizemin kumpipa kiangah kipaipih hi;
a lawm nungak bitte in amah zui uh a,
nang tungah hong puak uh hi.
15 Amaute lung nuam le kipaakin kilutpih a;
kumpipa’ inn ah lut uh hi.
16 Na tapate in na pate’ mun luah ding uh a;
gam sung khempeuh ah amaute gamukte na suaksak ding hi.
17 Nang ciamtehna khang tawntungin ka kipsak suak dinga;
tua hangin minamte in a tawntungin nang hong phatden ding uh hi.