Tumtheih makaipa ading. David phatna-la khat.
21
1 TOPA aw, nangma hatna sungah kumpipa nuamsa hi.Nangma piak gualzawhnate nuam sa mahmah ei!
2 Ama lungsim deihna amah na pia a’
a mukte hong ngetna na deek kei hi.
3 Thupha tampi tawh amah na muak-a,
a lutungah kham citak kumpi lukhu na khusak hi.
4 Amah in nuntakna hong ngena
ama nite a tawntungin na sawtsak den hi.
5 Na piaksa gualzawhnate tawnin ama minthanna lian mahmah a;
nang in thupina le nopcitna ama tungah na khusak hi.
6 Tawntung thuphate amah na pia khin takpi a,
nangma ompih lungnopna-in na kipaksak zo hi.
7 Kumpipa in TOPA muang ahi manin,
Sangpen Pa itna kip hangin
amah a kiling kei ding hi.
8 Nangma khut in na galte khempeuh len dinga;
na khut taklam in nang hong dote a man ding hi.
9 Na kilat hun ciangin
amaute pummei na bangsak ding hi.
TOPA thangpaihna in amaute nawmvalh dinga,
ama mei in amaute a hultum ding hi.
10 Amau suante leitung pan na siasak dinga,
amau khangsawnte mihing panin na phiatmang ding hi.
11 Nang tungah gitloh a sawmsim uh zongin,
a sawm uh gitloh geelna a lawhcing thei kei ding hi;
12 ahang in, thal keksa tawh amaute na ngim ciangin
na lehtaisak ding hi.
13 TOPA aw, na thahatna ah hong kitawisang hen;
kote in la sa in na hatna ka phat ding uh hi.