Phatna 20

Tumtheih makaipa ading. David phatna-la khat.

1  Na lungdon ciangin TOPA in hong dawng henla;

Jacob’ Pasian min-in nang hong dal hen.

2  Mun siangtho panin nang huhna hong sawl henla,

nang panpihna Zion panin hong pia ta hen.

3  Na biakpiaknate khempeuh phawk henla

na meihal biakna hong sang ta hen.

4  Na lungsim deihna hong pia henla

na geelna khempeuh hong tungsak ta hen.

5  Na gualzawh ciangin lung nuamin ka kiko ding uh a,

kote Pasian minin ka dialkhaite uh ka laamto ding uh hi.

TOPA in na nget khempeuh hong pia ta hen.

6 TOPA in a sathau-nilhsa a hotkhiat lam tu in ka thei hi;

amah in ama vantung siangtho panin

a hotkhiatna taklam khut vanglian-in, a mah a dawng hi.

7  Pawlkhat in sakolleng muang uh a, pawlkhatte in sakolte a muang uh hi,

ei te in i hi leh TOPA eite Pasian min i muang hi.

8  Amaute khuptukin a puk uh hi,

ei te in i hi leh tho in kiptakin i ding hi.

9 TOPA aw, kumpipa honkhia in!

Kong sap uh ciangin hong dawng a in!