Tum theih makaipa ading. "Tapa Sihna aw a tum ding" David phatna-la khat.
9
1 TOPA aw, ka lungsim khempeuhin nang kong phat dinga;nangma nalamdangte khempeuh ka genkhia ding hi.
2 Nang sungah nuamin ka kipak dinga;
na min phatna ka sa ding hi, Sang Penpa aw.
3 Ka galte nungkik uh a;
nangma mai-ah muktu in a kisia uh hi.
4 Ahang in, ka thuneihna le ka thu na lenkip a;
na kumpi tokhom ah tu-in thumaanin thu na khen hi.
5 Minamte na taihilh a, migilote susia-in;
a tawntunga manden dingin a min uh na phiatkhia hi.
6 A mong nei lo kisiatna in galte pha a,
amau khuapite na kibulkalh hi;
amaute mualsuangte nangawn a kisia mang ta hi.
7 TOPA in a mang tawntung hi;
amah in thukhen nadingin ama tokhom phutkip zo hi.
8 Amah in thumaanin leitung thu khen dinga;
thutangin mite a uk ding hi.
9 A kinuainette bukna TOPA hi-a,
lungkham huna dingin kulhpi ahi hi.
10 TOPA aw, nang in nang hong zongte taisan ngei lo na hi manin,
na min hong theite in nang hong muang ding uh hi.
11 Zion kumpi tokhom a tu TOPA phatnate sa un;
minamte lakah ama sepsate tangko un.
12 Ahang in, sisan phulapa in phawk a,
a thuaksiate kahna a kiphawkmawhbawl kei hi.
13 TOPA aw, ka galte hong bawlsiat zia mu in!
Hong lainat inla sihna kongpite panin kei hong laamto in;
14 tua hileh Zion Tanu kongpite ah
nangma phatnate ka pulak thei dinga
tua lai-ah nangma hotkhiatna nuam ka sa ding hi.
15 Minamte, amau tawhsa gum sungah kia khin uh a;
amau siahsim lenthang ah a khe uh a awk khin hi.
16 Ama thutang hangin TOPA kithei khin a;
migilote amau bawlsa thangah a awk uh hi. ea
17 Pasian a mangngilh a gilo minamte khempeuh
hankhuk fb ah a ciah uh hi.
18 Ahi zongin a tasamte kimangngilh suak lo dinga,
gimthuakte lametna zong a sia suak ngei kei ding hi.
19 TOPA aw, tho inla mihing gualzosak kei in;
nangma mai-ah minamte thu kikhen hen.
20 Amaute lausak in, TOPA aw;
amaute mihing lel ahina minamte theisak in.