36
1 Elihu in zom lai a:2 "Tawmvei hong thuak keikai lai dih in
genbeh lai ding a om lam Pasian tangin kong lak ding hi.
3 Ka theihtelna gamlapi pan ka ngah hi;
Kei hong Bawlpa a thutang ahina kong tellah ding hi.
4 Ka thugente khial lo hi, thukipin na sang in;
theihna bukim pa khat nang tawh omkhawm hi.
5 "Pasian thahat a, ahi hangin kuamah a simmawh kei hi;
amah thahata a cihsa a lenkip hi.
6 Amah in migilote hinkhawi lo a,
ahi hangin a hingim mite tungah thumaan hi.
7 Thumaante mitkhah loin en a;
amaute kumpipa tawh tukhawmsakin
tawisang den hi.
8 Ahi zongin mihingte sikkhau-in a kikhih leh
gimthuakna khaute in gakcip a,
9 amau gamtatnasa - kiphasak a,
a mawhnasate uh amau tungah a gen hi.
10 Amaute kipuahphat nading thu ngaisak a,
amaute gitlohna kisik dingin sawl hi.
11 Amaute in a thu mangin a na a sep uh leh
a nuntakna uh a om lai nite daupaina-in zangsak a,
a omlai kumte lungkimtak-in a zangsak hi.
12 Ahi hangin thu a ngaih kei uh leh,
amaute namsau-in fa mangthang ding uh a,
theihna loin a si ding uh hi.
13 "A lungsima pasian omlote heh niloh hi;
amaute khauhual in a hen ciang nangawnin huhna a ngen kei uh hi.
14 Amaute biakbukno a pasal kizuakte lakah
a khansih uh hi.
15 Ahi hangin amah in gim thuakte a gim thuak laitakun hu a;
amau hingim laitakin a hopih hi.
16 "Lungdonna gakcipna pan nang hong lakhia in
ki-ukcipna omlohna sabuai tungah na duhduh kilui a,
nuam na sak nading mun tanzau ah nang hong khahkhia ding hi.
17 Ahi zongin tu-in migilote thuakding thukhenna hong kisuan ahi hi;
thukhenna le thutang in nang hong lencip hi.
18 Kuamah in hauhna tawh nang hong zol loh nadingin kidawm in,
golhsum tampi hangin lampial kei in.
19 Na lungdonna a beisak dingin
na hauhna ahikeh
na liatna khempeuh nangawn kicing ding ahi hiam?
20 Mite a inn ab pan kaihkhiat nadingin
zan hong tun ding ngaklah kei in.
21 Thuaksiatna sanga na utzawk gitlohna lamah
na kihei khak ding kidawm in.
22 "A vangliatna hangin Pasian kitawisang hi.
Amah tawh kibang sia kua om ahi hiam?
23 Ama ading lampi kua in laka,
ahikeh ama kiangah, ‘Na Khial zo hi’ ci ahi hiam?
24 Mite in la sa-a a phat uh ama nasepte
nakpitaka na phat ding phawk in.
25 Mihing peuhmah in ama nasepte mu khin uh hi;
mite in gamlapi panin tuate gal-et uh hi.
26 Eite theihtel zawh loh - Pasian lian na lawmlawm e!
Ama kumte zonkhiat zawh hi lo hi.
27 "Amah in tuimalte khai to a,
tuihuute guahin zu a, a luang bc hi.
28 Meiite in meiizunte sungsuk a,
mihing tungah guahpi-in zu hi.
29 Amah in meiite bangci zaal a,
a inn panin vanpi bangci ginsak cih kua in thei ahi hiam?
30 Ama kiimah khuaphia zalh a,
tuipi thukpite a khuhzia thei in.
31 Hih in minamte a ukna cd lampi hi a,
an khamtakin a vak hi.
32 Amah in a khut dimin khuaphia tawi a,
a deihna munmun dengsak hi.
33 Ama vanging in huihpi nun ding hong gen a;
ganhonte nangawn a manawhna de a theisak hi.