Zophar
20
1 Tua ciangin Naamath mi Zophar in dawng a:2 "Ka lunghimawhnate in hong dawngsak nuam hi,
bang hang hiam cih leh ka ki-ip zo nawn mahmah kei hi.
3 Kei hong pahtawi loin nong taina ka za a,
ka tel sinsenna in kei hong dawngsak nuam hi.
4 "Tanglai pekpek -
leitung ah mi ia a ki-omsak a kipan,
5 a gilote nopsak hun a tom lam le
pasian nei lote lungnop hun tomkha sung ahilam na thei taktak hi.
6 A kiphatsakna in vantungte bana
a lutang in meiite a nawkkha zongin,
7 ama ek bangin amah a mangthang den ding hi;
amah a mu ngeisate in, ‘Amah koi-ah om hiam’ ci ding uh hi.
8 Mang bangin amah lengmang dinga, kimu kik nawn lo ding hi;
zana mumang bangin maimang ding hi.
9 Amah a mu mittang in mu kik nawn lo dinga,
ama omna mun in amah a mu kik nawn kei ding hi.
10 Mizawngte na a sutte a tate in loh kik pelmawh dinga;
a neih a lam te ama khutin a pia kik pelmawh ding hi.
11 A khangmoi lai guhte a ngek lai pi mah in
amah tawh leivui suakkhawm ding hi.
12 "A kam ah gitlohna khuma,
a leii nuai ah selin
13 sekhia nuam loin
a kam sungah muammuam ta leh
14 a an nekte a gilpi ah a thuk suak lai dinga;
ama sungah gul hangsan gu a suak ding hi.
15 A valhsa a hauhnate sekhia dinga;
Pasian in a gilpi zangin luakhia khinsak ding hi.
16 Amah in gul gilo gu teep dinga;
amah mualtan hate in a that ding hi.
17 Amah in khuaizu le bawngnawi khal a luanna gun le
luite a lungnoppih kei ding hi.
18 Amah in a thalawhsate nek lohin pia kik pelmawh dinga;
a sumbawlna-a a mette a lungnoppih kei ding hi.
19 Ahang in, amah in mizawngte nengniam a, khasiat loin a nusia hi;
ama lam lohpi innte a laksak hi.
20 "A lunggulhna bei thei lo a,
a gou ding bangmah a khol thei kei hi.
21 A khamval bangmah om lo a;
a hauhna sawt a khom kei ding hi.
22 A cih theih pen hun laitakin a tungah lungdonna tung ding a;
a lungkham pen hun, a tungah tung ding hi.
23 A gilpi a dip khit ciangin Pasian in
ama hehna kuangin bi dinga,
a tungah haksatna a zusak ding hi.
24 Sik galhiam panin taikhia ta leh
sumngo thaltang in amah kaplet ding hi.
25 Amah in a sin pana a tee daldal thaltang pak
a nunglam pangah a dokkhia ding hi.
A tungah launa tung dinga;
26 khuamial bikbek in ama gou dingin a ngak hi.
A kizaap lo mei in amah kangtum dinga
a buk sunga a om laite haltum ding hi.
27 Vantungte in ama khialhna pholak ding a;
ama lang khatah leitung in a do ding hi.
28 Tuikhang in a inn taimang dinga,
Pasian thangpaihna ni-in tuizeute ab in a taimang ding hi.
29 Tuate pen Pasian in
migilote ngah dinga a sehsa ahi hi," a ci hi.