Job
21
1 Tua ciangin Job in dawng a:2 "Ka kammalte limtakin ngai un;
hih pen kei nong hehnepna uh hisak un.
3 Ka gen laitak na thuak keikai unla,
ka pau khit ciangin hong zahpih pan un.
4 "Kei mawhsakna mihing khat tung ahi hiam?
Bang hangin lungtom lo ding ka hi hiam?
5 Kei hong en unla, lamdang sa un;
na khut pekun na kam uh hum un.
6 Hih thu ka ngaihsut ciangin kei hong lausak a,
hong pumlinsak hi.
7 Bang hangin migilote nungtata lai-in
khansau-a vanglian lailai uh ahi hiam?
8 Amaute in a kim a pam-ua a tate uh a khantoh lam mu uh a,
a suan a khakte uh a mitun mu uh hi.
9 A innte uh muanhuai-a launa a om kei hi;
amaute in Pasian cianggolh a thuak kha kei uh hi.
10 A bawngtalte uh lanlo ngei lo a;
a bawngpite un no nei denin tolh ngei lo hi.
11 Amaute in a tate uh tuuhon bangin sawlkhia uh a;
a tanote uh lam uh hi.
12 Amaute in khuangta le harp tumin la sa uh a;
tamngai aw tawh nuam sa uh hi.
13 A nuntak sung uh cihtheihna-in zang uh a,
a sih uh ciangin lungnuam batakin han cb a zuan uh hi.
14 Tua hi napi, Pasian tungah, ‘Ko hong nawngkaisak kei in!
Na lampi thei nuam kei ung.
15 A na ka sep dingun a Thahatpa kua ahi hiam?
Ama tungah thu ngen le ung bang ngah ding ka hi uh hiam?’ci uh hi.
16 Ahi hangin amau cihtheihna amau khutah om lo hi;
tua ahi ciangin migilote ngaihsutna le kei aa kigamla hi.
17 "Tua hi napi migilopa’ meivak bangzah vei mit ta ahi hiam?
Amaute tungah tuahsiatna bangzah vei tung ta a,
Pasian in ama hehna bangzah vei tuaksak ta hiam?
18 Amaute bangzah vei huih mutleng buhtu bang a,
huihpi in a letmang buhsi bang uh ahi hiam?
19 ‘Pasian in mi khat thuak ding, a tapate ading a kholsak hi,’ kici hi.
Amah in a theih nadingin ama tung mah ah kithuk pah hen!
20 Ama siatna ama mit mah in mu pah hen;
Thahatpenpa thangpaihna amah kidawnsak pah hen. ac
21 Ahang in, a kiciangtansaksa zahkhate a bei khit cianga
a nusiat a innkuanpihte bang awlmawh nawn ahi hiam?
22 "A sangpen thu nangawn a khen khit nungsang,
mi khatpeuh in Pasian tungah pilna hilh thei ahi hiam?
23 Mi khat a thahat pen laitakin si a,
lungmuangtakin a tawlnga hi;
24 a pumpi bd sadim phitphet a,
a guhte in guhtui a hau hi.
25 Midang khat khakham veisapi in si a,
hoih a kici khat beek a sinkha ngei kei hi.
26 Amaute a kibangin leivui lakah lumtuak uh a,
than in pumtuam tuak hi.
27 "Kei nong khialhsak nadingun na tupna uh,
na ngaihsutnate uh hoihtakin ka thei khin hi.
28 Note in, ‘Tu in miliante inn koi-ah om a,
migilote tenna puanbuk koi-ah om ahi hiam?’ na ci uh hi.
29 Khualzin mite dong ngei lo na hi uh hiam?
amau hong gen - tuahsiat hun ciangin migilote peng zawsop a,
30 thangpaihna hun panin ce amah kihukhia hi,
ci-a hong gente uh thusim lo na hi uh hiam?
31 Kua in a mai-ah a gamtatna va langgen ahi hiam?
a gamtatsa a thuk kik kua ahi hiam?
32 Amah han lamah kipua a,
a hankhuk kicingsak hi.
33 Mualkuam a leihoih ama adingin khum a;
mi khempeuh in amah zui-in,
ama mai-ah simzawh loh mihonpi pai khin df hi.
34 "Tua ahi ciangin thu gina lo peuhin kei hong hehnem zo ding na hi uh hiam?
Zuauthu longal nong dawn nading uh bangmah om nawn lo hi," a ci hi.