Bildad
18
1 Tua ciangin Shuh mi Bildad in dawng a:2 "Na paupau khawl hun nei lo ding na hiam?
Khawl hun thei lecin ko kong pau thei pan ding uh hi.
3 Bang hangin bawnghon bangin hong ngaihsun a,
mihai banga hong seh na hi hiam?
4 Na hehna hangin nang le nang a kibalnen na suak hi;
nang tangin leitung kinusia ding ahi hiam?
Ahikeh suangtumte a omna pan kilikkhia ding ahi hiam?
5 "A gilopa’ meivak kisukmitsak hi;
ama mei kuanglai mit hi.
6 A puanbuk khuavak mial a;
a kianga meivak a mit hi.
7 A kalsuan ziauziauna kithakiasak a,
ama tupnate in amah sawnpuk hi.
8 A khe in len sungah sawnpai a,
a kekna vang zongin a vak kawikawi hi.
9 Thang in a khetul ah mana,
thangkhau in gakcip hi.
10 Amah siahna khaukual leitungah kisin khinkhian a,
a lampi ah thang kisiah hi.
11 A kim a pam ah lauhuaina in amah panga,
a kalsuanna citengah a sulzuih hi.
12 Tuahsiatna in amah ngaklah a;
a puk cianga a siat nading lauhuaina in amah ngak gige hi.
13 Tua in a vun khenkhat ne mang a,
sihna tacil in a khut a khete a nawmvalh hi.
14 A puanbuk muanhuaina pan amah kibalzan a,
lauhuaina’ kumpipa lam zuanin kipaikhiatpih hi.
15 Mei in a puanbuk tenden ca a;
a tenna tung tengah kaatkuang kitheh hi.
16 A nuai-ah a thaguite keucip a,
a tunga hiangte a keugaw hi.
17 Amah kiphawkna leitung panin mangthang a;
leitungah min a nei kei hi.
18 Khuavak panin khuamial ah amah kihawlkhia a,
leitung panin kidelhkhia hi.
19 Ama mite lakah suan le khak ahikeh gui nei lo a,
a tenna ah a khuasuak kuamah a om nawn kei hi.
20 Nitumna-lam mite ama hangin lauthawng uh a,
nisuahna-lam mite linglawng uh hi.
21 Migilote tenna tua bang hitakpi a;
Pasian a theilote mun tua bang ahi hi," a ci hi.