17
1 ‘Ka lungsim kitamkham a,ka nite kitomsakin hankhuk in
kei hong ngak ta hi.
2 Mi zahkohte in hong umcih taktak uh hi;
amaute hong langneihna mitkhah loin ka en pelmawh ding hi.
3 Pasian aw, nong kalh kiciamna hong pia in.
Kua dangin kei adingin bitna hong piaksak ding hiam?
4 Amaute theihtelna lungsim na khaksak hi;
tua ahi ciangin amaute na gualzosak kei ding hi.
5 Mi khat in pahtakman a deih manin
a lawmte a lehbawl leh ama tate mit in khua a mu kei ding hi.
6 "Pasian in mi khempeuh tungah thusia gentehna hong suaksak khin a;
tua mite mai-ah kei hong kicilphih hi.
7 Ka dahna hangin ka mit maang a;
ka guhteng khempeuh niliap bang hi.
8 Mi thutangte in lamdang sa uh a;
a pasian-milote langah mawhpengte a ding uh hi.
9 Tua hi taleh a thumaante in amau lampite lenkip ding uh a,
amau khut siangthote a thahat toto ding hi.
10 "Ahi zongin na vekun hong pai dih un, hanciam lailai un,
no lakah mipil ka mu kei ding hi.
11 Ka nite bei ta in, ka ngimnate maimang ta a,
ka lungsima ka lunggulhnate om nawn lo hi.
12 Hih mite in zanhun sun suaksak uh a;
amaute in khuamial lakah, ‘Khua vak dek ta hi’ ci uh hi.
13 Ka inn dinga ka lamet hankhuk aa hi-a,
khuamial lakah ka lupna phahin
14 siatna kiangah, ‘Ka pa na hi hi,’ ka cih a,
thante kiangah, ‘Nu aw, ahikeh sanggamnu aw,’ ka cihleh
15 ka lametna koi-ah om lai hiam?
Kua in kei ading lametna mu thei lai ding hiam?
16 Sihna bb kongpite ah a paisuk diam?
Leivui lakah i tuaksuk khawm diam?" a ci hi.