Job
16
1 Tua ciangin Job in dawng a:2 "Hih bang thute tampi ka za khin hi;
na vek un a lunggim huai hehnemte hi lel uh teh!
3 A mawkna-in na mutmutna kamte uh bei ngei lo ding hiam?
Hong nasak bang kammal tawh kei hong busimsim lai ding na hi uh hiam?
4 Note kei dinmunah om le uhcin
kei zong no pau bangin ka pau thei ding hi;
note ka lu hong peisanin note langah
kam hoih nono ka pau thei mah ding hi.
5 Ahi hangin ka kam in note hong hanthawn thei ding hi;
ka muk panin hong hehnemin kong nuamtuamsak ding hi.
6 "Pau taleng lah ka natna nuamtuam tuan lo a;
ki-iip taleng zong a damsiang tuan kei hi.
7 Hi takpi hi, Pasian aw, kei nong patkhiasak a;
ka innkuan bup nong gamsak hi.
8 Kei nong hencip khin a - tua mah kei teci a suak hi;
ka gawn’na dingto-in kei langah teci a pang hi.
9 Pasian in kei hong doin, hehin kei hong balkham a,
a ha hong gawisan hi;
ka langpa in a mitin hong sal gemgam hi.
10 Mite kamka-in kei hong zahnuihsan uh a;
hong zahpihna-un ka paang hong bengin,
kei langkhatah kipawl uh hi.
11 Pasian in migilote tungah kei hong pia a,
a kheltatte kepcip dingin hong lawnkhia hi.
12 A nuamsa kimlai kei hong nuaizan a;
ka gawlah hong manin hong nencip hi.
Muitum in hong nei a;
13 a thalkapte in kei hong umcih uh hi.
Hehpih peuhmah loin ka kalte sunlet uh a,
leilakah ka sinkha luangkhia hi.
14 Amah in kei hong liamsuah kikkik a,
galhangpa bangin kei hong ngongbawl hi.
15 "Ka vuntungah puanhampi ka khui-a,
ka taltang leivui lakah ka phum hi.
16 Ka kahkahna-in ka mai san a,
ka mitkhu bawk in ka mit a liah hi;
17 tua hi napi, ka khutte ngongtat lo a,
ka thungetna a siangtho hi.
18 "Leitang aw, ka sisan vukcip kei in;
ka kikona kikhawlsak kei tapeuh hen!
19 Tu nangawn in vantungah ka teci a om hi;
ka tangdingpa a sangna ah om hi.
20 Kei hong thumsakpa ka lawm aa hi-a,
tua kawmkawmin Pasian tungah ka khitui ka sungkhia hi;
21 Mi khat in a lawmpa ading a thumsak bangin
mi khat tangin amah in Pasian tungah a thumsak hi.
22 "A kileh kik nawn lo dingin
khual ka zin ma-in kum tawmkhat sung bek lah hong bei ding hi.