David Gualzawhnate
18
1 Hih hun khit ciangin David in Philistia-te zo a, amaute nuaisiahin Philistia-te ukna panin Gath le a kimkota khuaneute a la hi.2 David in Moab-te zong zoin, amaute a nasem suak uh a, siah a puak uh hi.
3 Tua tham loin Euphrates Gunpi dungah ama ukna a kipsak dingin a pai kawmin Hamath ciang dong Zobah kumpipa Hadadezer a sim hi. 4 David in a sakolleng tul khat, sakol-leng hawl tul sagih, khe galkap tul sawmnih a matsak hi. Amah in sakol-lengkai zakhat longal a zagui a attat khin hi.
5 Zobah kumpipa Hadadezer huh dingin Damascus a Aram-te a kuan ciangin David in amaute tul sawmnih le tulnih a vatlum hi. 6 Amah in Damascus a Aram-te kumpi-gamah khuapi cingte koih-a, Aram-te ama nasem suakin siah a puak uh hi. David a paina peuhpeuh ah TOPA in a gualzawhna a pia hi.
7 Hadadezer uliante in a puak uh khama kibawl lumte David in la-a, Jerusalem ah a pua hi. 8 Hadadezer neihsa khuapi Tebah aa le Cun panin David in sumngo tampitak la-a, tuate tawh Solomon in sumngo Tuipi, khuampite le vanzat tuamtuamte a bawl hi.
9 David in Zobah kumpipa Hadadezer galkap buppi zo khin hi ci-in Hamath kumpipa Tou in a zak ciangin 10 Tou tawh a kidosa Hadadezer le Kumpi David kido-a a zawhna lungdampih ding le amah a hopih dingin a tapa Hadoram a paisak hi. Hadoram in ngun le kham le sumngo-a kibawl van namkim a puak hi.
11 Kumpi David in hih minamte khempeuh: Edom le Moab, Ammon-te le Philistia-te le Amalek-te tunga a lak ngun le khamte TOPA tungah a hihsa bangin hihte zong a ap hi.
12 Zeruiah tapa Abishai in Ci Kuam ah Edom-te tul sawm le tul giat a vattuk hi. 13 Amah in Edom ah khuapi cingte koih-a, Edom-te khempeuh David nasem a suak uh hi. David a paina peuhpeuhah TOPA in gualzawhna a pia hi.
David Uliante
14 David in Israel khempeuh uk-a mite khempeuh tungah thutangin a thumaan hi. 15 Zeruiah tapa Joab in galkap khempeuh uk a; Ahilud tapa Jehoshaphat thu ciamteh hi-in; 16 Ahitub tapa Zadok le Abiathar tapa Ahimelech-te bb siampi ahi uh hi; ama thuvanpi Shavsha hi in; 17 Jehoiada tapa Benaiah in Kereth-te le Peleth-te uk a; tuateh David tapate kumpipa gei-ah uliante makai ahi uh hi.