David le Ziba
16
1 Mualdawn galdiak ah David a tun ciangin Mephibosheth neihsa kempa Ziba in amah a na dawn hi. Amah in anlum zanih, lenggah mohkeu zakhat, thei moh za khat le zu savun-um khat a pua tutphah vawhsa laa nih tawh a na dawn hi.2 Kumpipa in Ziba kiangah, "Bang hanga hihte hong puak na hi hiam?" ci-in a dong hi.
Ziba in, "Laate kumpi innkuante tuan nading hi a, anlum le singgahte mite nek ding hi-in, a zu pen sehnel gama a tha beite tha thawh kik nading ahi hi," a ci hi.
3 Tua ciangin kumpipa in, "Na pu’ tupa koi-ah om ahi hiam?" ci-in a dong hi.
Ziba in, ama kiangah, "Amah Jerusalem ah omlai hi, bang hang hiam cih leh,‘Tuni-in Israel innkuante in ka pu kumpi-gam hong pia kik ding hi,’ ci-in ngaihsun hi," a ci hi.
4 Tua ciangin kumpipa in Ziba kiangah, "Mephibosheth neihsa peuh mah tu-in nang aa ahi hi,"a ci hi.
Ziba in, "Kiniamkhiatin kong kun hi; ka topa kumpipa aw, na mai-ah maipha hong ngahsak in," a ci hi.
Shimei in David Hamsiat
5 Kumpipa David in Bahurim a manawh laitakin Saul innkuan tawh a bawng’ kibang mi khat tua lai panin a paikhia hi. Amah Gera’ tapa hi in a min Shimei hi a, a hamsiat kawmkawmin a paikhia hi. 6 Amah in David veilam le taklam ah galkap honte le amah a cingte om napi David le a uliante khempeuh suangtangin a deng hi. 7 A hamsiat kawmkawmin Shimei in, "Paikhia, paikhia, no mihing sisan suahte, no misiate! 8 Ama muna na uknapa, Saul innkuan sunga na luansak sisan TOPA in hong thuk kik hi. TOPA in na kumpi-gam na tapa Absalom tungah pia khin hi. Nang in mihing sisan luangsak na hi manin a kisia na hi ta hi," a ci hi.
9 Tua ciangin Zeruiah’ tapa Abishai in kumpipa kiangah, "Bang hangin hih ui sisa in ka topa kumpipa hamsiat ahi hiam? A kiangah pai-in a lu hong tankhiasak in," a ci hi.
10 Ahi hangin kumpipa in, "No Zeruiah’ tapate aw, no le ko bang kisai i hi hiam? Amah TOPA in a sawl hi henla, ‘David hamsiat in,’ a ciha hong samsia hileh kua in, ‘Bang hangin hici hih na hi hiam?’ ci thei ding hiam?" a ci hi.
11 Tua ciangin David in Abishai le uliante khempeuh kiangah, "Ka tapa, keima ci-le-sa mahmah in kei thah hong sawm hi. Tua ci lehang hih Benjamin mipa in kei hong hicih ding mah hi! Amah koihkhong lel un; hamsiatsak lel un, TOPA gen ahi hi. 12 TOPA in ka lungdonna mu-in tuni-a ka ngah hamsia a hoihin hong thuk ding hi," a ci hi.
13 Tua ciangin David le a mite lampi tawnin a pai laitakun amau gal ah mualpang tawnin Shimei pai a, a pai kawmkawmin samsia a, amah suangtangin deng a leivui a theh hi. 14 Kumpipa le a tonpihte khempeuh gimpi in a tupna mun uh a tung uh hi. Tua lai-ah amahmah a tawlnga hi.
Hushai le Ahithophel Ngaihsutpihna
15 Tua hun laitakin Absalom le Israel mite Jerusalem ah tung uh a, Ahithophel amah tawh a omkhawm hi. 16 Tua ciangin David lawmpa Arki mi Hushai, Absalom kiangah pai a, "Kumpipa khansawt hen! Kumpipa khansawt hen!" a ci hi.
17 Absalom in Hushai kiangah, "Hih pen na lawmpa na itna na lahna hi ve maw? Bang dinga na lawmpa zui lo na hi hiam?" ci-in a dong hi.
18 Hushai in Absalom kiangah, "Hi lo hi, TOPA le hih mite le Israel mite khempeuh in a teelsa - hih mipa amah tawh ka omkhawm ding hi. 19 Tua banah ke’n kua na sem ding ka hi hiam? A tapa na sem lo ding ka hi hiam? Na pa na ka sep bang tektekin nangma na ka sem ding hi," a ci hi.
20 Absalom in Ahithophel kiangah, "Na ngaihsutna hong gen in. Bang hih ding i hi hiam?" a ci hi.
21 Ahithophel in, "Na pa in a inn cing dinga a nusiat a zinote luppih in. Tua ciangin Israel khempeuh in na pa langpanna za ding uh a, nang tawh a om khawm peuhmah a thakhauhsak ding hi," ci-in a dawng hi. 22 Tua ciangin amaute in inn tungah Absalom puanbuk lamsak uh a, Israel khempeuh muhin a pa’ zinote a luppih hi.
23 Tua hi a, tua hun lai-in Ahithophel ngaihsutna, Pasian dot tawh a kibang ahi hi. Tua bangin David le Absalom in Ahithophel ngaihsutna a thupi sim uh hi.