David le Mephibosheth
9
1 David in, "Jonathan hangin Saul innkuan sungah migitna ka lah theih nadingin mi a om lai hiam?" ci-in a dong hi.2 Saul innkuanpih Ziba kici nasem khat a om lai hi. Amaute in samin David mai-ah lak uh a kumpipa in, "Nang Ziba na hiam?" a ci hi.
Amah in, "Na nasempa ka hi hi," ci-in a dawng hi.
3 Kumpipa in, "Saul innkuan sungah Pasian migitna ka lah theih nadingin mi khatpeuh a om lai a om hiam?" ci-in a dong hi.
Ziba in kumpipa kiangah, "Jonathan tapa a omlai hi, amah a khe langnihin a bai hi," ci-in a dawng hi.
4 Kumpipa in, "Amah koi-ah om hiam?" ci-in a dong hi.
Ziba in, "Lo Debar a Ammiel’ tapa Makir’ innah om hi," ci-in a dawng hi.
5 Tua ciangin Kumpipa David in Lo Debar a Ammiel’ tapa Makir’ inn panin a lasak hi.
6 David kiangah Saul’ tapa Jonathan’ tapa Mephibosheth pai-a, kunin zahtakna a bawl hi.
David in, "Mephibosheth," a ci hi.
"Na nasempa," ci-in a dawng hi.
7 David in, "Lau kei in, na pa Jonathan hangin migitna kong lak pelmawh ding hi. Na pu Saul neihsa leitang khempeuh nang kong pia kik dinga, ka sabuai-ah an na ne den ding hi," a ci hi.
8 Mephibosheth kunsukin, "Kei ui sisa khat bang lel, nang phawk tham dingin na nasempa bang ka hi hiam?" a ci hi.
9 Tua ciangin kumpipa in Saul nasempa Ziba samin ama kiangah, "Saul le a innkuanpihte tawh kisai khempeuh na pu’ tupa ka pia khin hi. 10 Nang le na tapate le na nasemte in ama tangin na khawhsak ding uh a, na pu’ tupa a kivak theih nadingin ante a innah na tun ding uh hi. Tuateh na pu’ tupa Mephibosheth in ka sabuai-ah an a ne den ding hi," a ci hi. (Ziba in tua hunin tapa sawm le nga le nasem sawmnih a nei hi.)
11 Tua ciangin Ziba in kumpipa kiangah, "Ka topa kumpipa in a nasempa sep dinga a thupiak peuhmah na nasempa in a sem ding hi," a ci hi. Tua hi-a Mephibosheth in kumpipa’ tapate khat bangin David ha sabuai ah an a ne hi.