Ephraim le Manasseh-te Sehtanh
16
1 Joseph sehtanh in Jericho tuite nisuahna-lam Jericho a Jordan da panin kipana, tua lai pan paito-in sehnel-gam kantan-a, Bethel mualtung gam sungah a lut to hi. 2 Bethel (tua pen Lud) eb panin pai lai-a, Ataroth a Ark-te gam kantan in, 3 nitumna-lam ah Japhlet-te gam lamah sukpai-a, Beth Horon Nuainung kual Gezer dong bansukin tuipi ah a tawp hi.4 Tuaci-in Joseph suante Manasseh le Ephraim-te in amau gouluah a ngah uh hi.
5 Hih in Ephraim-te a bawng’bawng’a a gam uh ahi hi.
Amaute luahna gamgi, Beth Horon Tungnung nisuahna lama om Ataroth Addar panin pai-a, 6 tuipi a zom hi. Micmethath panin leilu-lam manawhin Taanath Shiloh dong nisuahna-lam manawhin kualto a, nisuahna-lam Janoah dongah a kantan hi. 7 Tua ciangin Janoah panin Ataroth le Naarah dong tuaksuk-a, Jericho nawkin Jordan ah a suakkhia hi. 8 Tappuah panin gamgi in nitumna lam manawh a Kanah Kuampi ah tungin tuipi ah a tawp hi. Hih in Ephraim behte in a bawngbawng’ a, a luah uh ahi hi. 9 Tua in Manasseh-te luah sung panin Ephraim-te adinga kikhenkhia khuapite le a khuaneute khempeuh zong a huam hi.
10 Amaute in Gezer a tengsa Canaan-te a hawlkhia kei uh hi; tuni dong Ephraim mite lakah Canaan-te teng uh a, ahi hangin zawhthawh thu in na kisemsak hi.