Leilu-lam Kumpite Kizo
11
1 Hazor kumpipa Jabin in hih thu a zak ciangin Madon kumpipa Jobab kiang, Shimron le Acshaph kumpite kiang, 2 le mual laka teng leilu-lam kumpite kiang; Kinnereth leitaw-lama om Arabah, nitumna-lam mualbul-ate le nitumna-a Naphoth Dor aa kumpite kiang; 3 nisuahna le nitumna a om Canaan-te; mualtung gama teng Amor-te, Hit-te, Periz-te, le Jebus-te kiang; le Mizpah kuala om Hermon nuai lama teng Hiv-te kiangah thu a puak hi. 4 Galkap a tam lua mahmah tuipi gei-a sehnel zah a tam - galkap honpi le sakol le sakolleng tampitak tawh amaute a kuankhia uh hi. 5 Hih kumpite khempeuh in a galhatnate uh gawm uh a, Israel sim dingin Merom Tuite ah giahphual a sat khawm uh hi.6 TOPA in Joshua kiangah, "Amaute kihta kei in, bang hang hiam cihleh zingciang tu hunin thahsa-in Israel tungah amaute khempeuh kong pia ding hi. A sakol zaguite uh attatsakin a sakol-lengte uh na haltum ding uh hi." a ci hi.
7 Tuaci-in Joshua le a galkap buppi thakhatin Merom Tuite ah tung vatin sim uh a, 8 TOPA in Israel-te khut sungah amaute a pia hi. Amaute in zo uh a, Sidon Lianzaw lam, le Misrephoth Maim lam, le nitumna lama Mizpah lamah a suakta khat beek a omloh dongin a delh uh hi. 9 TOPA lahsa bangin Joshua in amaute tungah bawla: a sakol zaguite uh attatin a sakollengte uh a halsak hi.
10 Tua hun mah in Joshua kileh kik a, Hazor la-a namsau-in a kumpipa a that hi. (Hih kumpi gam khempeuh lutang Hazor ahi hi.) 11 A sunga om peuhmah namsau-in a that uh hi. Amaute in a vekun susiamang bb kiuhkeuh uh a, a husang peuhmah hawi nei loin Hazor mahmah zong a haltum uh hi.
12 Joshua in hih kumpi’ khuapite khempeuh la-in kumpite namsau in a that hi. TOPA nasempa Moses thupiaksa bangin amaute susiamang kiuhkeuh hi. 13 Joshua in a haltum Hazor longal mual neute tunga om khuapite khempeuh Israel in khat beek a hal kei hi. 14 Israel in hih khuapite a van kinusiate le ganhingte khempeuh puakhiamang uh a, ahi hangin a husang khat beek hawi loin mihing khempeuh a susiamang kiuhkeuh uh hi. 15 TOPA in ama nasempa Moses thu pia a, Moses in Joshua a thupiak bangin Joshua in a hih hi; TOPA in Moses a thupiakte sep loh a, a nusiat khat beek a om kei hi.
16 Tua ciangin Joshua in hih gambuppi: Mualtung gam teng, Negev khempeuh, Goshen kual buppi, nitumna lam mualbulte, Arabah le Israel mualliante a mualbulte uh tawh, 17 Halak Vum pan Seir lam manawh a kikhung to, Hermon Vum nuaisan a om Lebanon Kuam sunga Baal Gad ciang dong a la hi. A kumpite khempeuh man-a, sattukin a that hi. 18 Joshua in hih kumpite khempeuh a do hun sung sawtveipi ahi hi. 19 Gibeon a teng, Israel-te tawh kilem nading thuciam a bawl Hiv-te longal a vekpi in sim-a, a lak ahi hi. 20 Ahang in, TOPA in Moses a thupiaksa bangin lainat loin a vekpi un susia mang a a cimansak theih nadingin Israel-te do dingin TOPA in amaute lungsim a khauhsak ahi hi.
21 Tua hun mahin Joshua pai-a mualtung gama om: Hebron, Debir le Anab pan, Judah-te mualtung gam khempeuh pan le Israel mualtung gam khempeuh a Anak-te a susia hi. Joshua in amaute le a khuapite uh a susiamang kiuhkeuh hi. 22 Israel gam sungah Anak-te khat zong om nawn lo a; Gaza, Gath le Ashdod ah a om laisunte bek a om uh hi. 23 TOPA in Moses a lah bang tektekin Joshua in tua gam khempeuh la-a, amau beh khenna tawh kizui-in a luah dingun Israel tungah a pia hi.
Tua ciangin tua gamah gal a veng ta hi.