Jordan Galkahna
3
1 A zing ciang zingtung in Joshua le Israel-te khempeuh Shittim panin dingkhia uh a, Jordan tungin a galkah ma-un tua lai-ah a giak uh hi. 2 Ni thum khit ciangin a uliante uh giahphual khempeuh ah pai uh a, 3 mipite tungah, "TOPA note Pasian thukhun singkuang Levi siampite in a puak na muh uh ciangin na omna mun tek panun paikhia-in na zui ding uh hi. 4 Hih lampi-ah pai ngei lo na hi manun tua hun ciangin na pai nading uh na thei ding uh hi. Ahi hangin singkuangpi le no kikal yard da tul khat bang kihalin pai un; a kiang neh kei un," ci-in thu a pia uh hi.5 Tua ciangin Joshua in mipite tungah, "No le no kisiansuah un, zing ciangin TOPA in note lakah nalamdang hong bawl ding hi," ci-in a gen hi.
6 Joshua in siampite kiangah, "Thukhun singkuang pua unla, mipite mai-ah galkahpih un," a ci hi. Tua bangin amaute in pua uh a amaute mai-ah a masa uh hi.
7 Tua ciangin TOPA in Joshua kiangah, "Moses ka ompih bangin nang kong ompih lam Israel-te in a theih theih nadingun tuni-in amaute muhna ah nang kong tawisangna ka kipan ding hi. 8 Thukhun singkuang a pua siampite tungah, ‘Jordan tuite gei na tun uh ciangin pai-in gun sungah ding un,’ ci-in gen in," a ci hi.
9 Joshua in Israel-te kiangah, "Hih lai-ah hong pai unla, TOPA note Pasian kammalte ngai un. 10 Hih in a nungta Pasian note lakah a om lam na theih nading uh le amah in note mai-a om Canaan-te, Hit-te, Hiv-te, Periz-te, Girgash-te, Amor-te le Jebus-te hawlkhia takpi ding ahilam na theih nading uh ahi hi. 11 En un, leitung khempeuh Topa’ thukhun singkuang note mai Jordan sungah a masa ding hi. 12 Tua ahi ciangin tu-in Israel behte panin beh khatah mi khat, mi sawm le nih telkhia un. 13 Leitung khempeuh Topa ahi TOPA ’ singkuang a pua siampite a khe uh le Jordan tui a kisukkhak phetin tui a luangsuk kimlai kikhenin vum venvanin a kiciang ding hi," a ci hi.
14 Tua ciangin mite Jordan galkah dingin a giahphual pan un dingkhia uh a, thukhun singkuangpi pua-in siampite amaute mai-ah a masa uh hi. 15 Anlak hun sung tawntung Jordan a khang hi. Tua hi napi singkuangpi pua siampite khe in Jordan tuimong a sukkhak phetin 16 tui khang kimlai a luang nawn kei hi. A lompi-in kiciang to venvan a gamlapi pek, Zarethan gei-a Adam kici khuapi dong vungto in, a nuaisiah a luangsukte Arabah Tuipi (Ci Tuipi) ab dong in a kikhentat siang kiuhkeuh hi. Tuaci-in mipite Jericho galtakah a galkah uh hi. 17 Israel khempeuh in a minam bupun leikeu tung tawnin Jordan a kantan khit kiuhkeuh matengun TOPA ’ thukhun singkuang pua siampite gunpi laizang leikeu tungah a dingkip uh hi.