A Behbeh-in Giahphual Kigual
2
1 TOPA in Moses le Aaron tungah: 2 "Israel-te Kikhopna Puanbuk kimkot ah a kihal simsimin ama pawl dialkhai nuai-ah a mikim in a innkuan dialkhai khai-in giahphual a sat ding uh hi," a ci hi.3 Nisuahna-lam pangah nisuahna lam nga-in Judah pawlte in amau pawl dialkhai nuai-ah giahphual a sat ding uh hi. Judah mite makaipa Amminadab tapa Nahshon ahi hi. 4 Ama pawl ah mi 74,600 a pha hi.
5 Amaute zomah Issachar behte in giahphual a sat ding uh hi. Issachar mite makaipa Zuar tapa Nethanel ahi hi. 6 Ama pawl ah mi 54,400 a pha hi.
7 Tua zomah Zebulun behte hi ding hi. Zebulun mite makaipa Helon tapa Eliab ahi hi. 8 Ama pawl ah mi 57,400 a pha hi.
9 Judah giahphuala phual sat ding khempeuh amau kipawl khenna zui-in mi 186,400 a pha hi. Amaute dingkhia masa ding uh hi.
10 Leitaw-lam pangah Reuben-te in amau pawl dialkhai nuai-ah giahphual a sat ding uh hi. Reuben mite makaipa, Shedeur tapa Elizur ahi hi. 11 Ama pawlah mi 46,500 a pha hi.
12 Amau zomah Simeon behte in giahphual a sat ding uh hi. Simeon mite makaipa, Zurishaddai tapa Shelumiel ahi hi. 13 Ama pawlah mi 59,300 a pha hi.
14 A zomah Gad behte hi ding hi. Gad mite makaipa Deuel a tapa Eliasaph ahi hi. 15 Ama pawl ah mi 45,650 a pha hi.
16 Reuben giahphuala phual sat ding khempeuh amau kikhenna zui-in mi 151,450 a pha hi. Amaute a nihna-a dingkhia ding ahi uh hi.
17 Tua ciangin a giahphual zui-a paite laizangah Kikhopna Puanbuk le Levi giahphual sat dingte a dingkhia ding uh hi. A giahphual sat ngeina bangun amaute dingkhia ding uh a, amau pawl dialkhai nuai amau mun ciatah pai ciat ding uh hi.
18 A nitumna-lam pangah Ephraim mi pawlte in amau pawlte dialkhai nuai-ah giahphual a sat ding uh hi. Ephraim mite makaipa Ammihud tapa Elishama ahi hi. 19 Ama pawl ah mi 40,500 a pha hi.
20 Amaute zomah Manasseh behte ahi ding hi. Manasseh mite makaipa Pedazur tapa Gamaliel ahi hi. 21 Ama pawl ah mi 32,200 a pha hi.
22 Tua zomah Benjamin behte ahi ding hi. Benjamin mite makaipa, Gideoni tapa Abidan ahi hi. 23 Ama pawl ah mi 35,400 a pha hi.
24 Ephraim giahphuala phual sat ding khempeuh amaute kikhenna-te zui-in mi 108,100 ahi hi. Amaute a thumna ah dingkhia ding uh hi.
25 Leilu lam pangah Dan pawlte in amau dialkhai nuai-ah giahphual a sat ding uh hi. Dan mite makaipa, Ammishaddai tapa Ahiezer ahi hi. 26 Ama pawlah mi 62,700 a pha hi.
27 Amaute zomah Asher behte in giahphual a sat ding uh hi. Asher mite makaipa Ocran tapa Pagiel ahi hi. 28 Ama pawl ah mi 41,500 a pha hi.
29 A zomah Naphtali behte hi ding hi. Naphtali mite makaipa Enan tapa Ahira ahi hi. 30 Ama pawl ah mi 53,600 a pha hi.
31 Dan giahphual ah phual sat ding khempeuh mi 157,600 a pha hi. Amaute amau dialkhai nuai-ah a nunung penin dingkhia ding uh hi.
32 Hihte pen Israel-te amau innkuan zui-a kisim ahi hi. Amaute pawl kikhenna zui-in giahphuala om peuhmah mi 603,550 a pha hi. 33 Levi-te ahileh TOPA in Moses a thupiak bangin Israel dangte tawh a kisim khawm kei hi.
34 Tua hi a, TOPA in Moses a thupiaksa bangin Israel-te in na khempeuh a hih uh hi; amaute dialkhai nuai tekah tuaci bangin giahphual sat ciat uh a, a bawng’ le a innkuanin amau tuaci bangin a dingkhia uh hi.