Misimna
Mi Kisimna
1
1 Israel-te Egypt pana a paikhiat khit uh a kum nihna, a kha nihna a ni masa ni-in Sinai Sehnel gam-a Kikhopna Puanbuk ah TOPA in Moses a hopih hi. Amah in: 2 "Israel mipi bup a bawng’ le a innkuan zui-in simin, pasal peuhmah a min uh khat khit khat gual in. 3 Nang le Aaron in kum sawmnih pan a tungsiah, Israel-te khempeuh pasal paltan tum thei ding peuhmah amau kikhenna bangin na sim ding uh hi. 4 A beh, simin pasal khat ciat, a innkuan lutang pen ciat in nang hong huh ding uh hi. 5 Nang hong huh ding mite min hihte ahi hi:Reuben panin, Shedeur tapa Elizur;
6 Simeon panin, Zurishaddai tapa Shelumiel;
7 Judah panin, Amminadab tapa Nahshon;
8 Issachar panin, Zuar tapa Nethanel;
9 Zebulun panin, Helon tapa Eliab;
10 Joseph tapate pan:
Ephraim panin, Ammihud tapa Elishama;
Manasseh panin, Pedahzur tapa Gamaliel;
11 Benjamin panin, Gideoni tapa Abidan;
12 Dan panin, Ammishaddai tapa Ahi-ezer;
13 Asher panin, Ocran tapa Pagiel;
14 Gad panin, De-u-el tapa Eliasaph;
15 Naphtali panin, Enan tapa Ahira," ahi hi.
16 Hihte mihonpi pana kiseh pupa beh pana makaite ahi hi. Amaute Israel bawng’ lutangte ahi uh hi.
17 Moses le Aaron in a min kipiasate tonpih uh a, 18 a kha nihna a ni masa ni-in mihonpi bup a kikhawmsak uh hi. Tua mite in amau pupa bawng’ le innkuan zui-in ciamteh uh a kum sawmnih leh a tungsiah a min a banbanin a khum uh hi; 19 Tua pen TOPA in Moses a thupiak bang ahi hi. Tua hi-a Sinai Sehnel gamah tuaci-in mi khat khit khat a sim uh hi.
20 Israel tapa upa pen Reuben suante panin:
Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi. 21 Reuben beh panin mi 46,500 a pha hi.
22 Simeon suante panin:
Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in kisima a min uh a kigual ahi hi. 23 Simeon beh panin mi 59,300 a pha hi.
24 Gad suante panin:
Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 25 Gad beh panin mi 45,650 a pha hi.
26 Judah suante panin:
Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 27 Judah beh panin mi 74,600 a pha hi.
28 Issachar suante panin:
Kum sawmnih pan a tungsiah paltan tum thei ding pasal khempeuh amau bawng’te le a innkuante ciamtehna tawh kizui-in a min uh a kigual ahi hi. 29 Issachar beh panin mi 54,400 a pha hi.
30 Zebulun suante panin:
Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi. 31 Zebulun beh panin mi 57,400 a pha hi.
32 Joseph tapate pan:
Ephraim suante panin:
Kum sawmnih pan a tungsiah paltan tum thei ding pasal khempeuh amau bawng’te le innkuante ciamtehna tawh kizui-in a min uh a kigual ahi hi. 33 Ephraim beh panin mi 40,500 a pha hi.
34 Manasseh suante panin:
Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 35 Manasseh beh panin mi 32,200 a pha hi.
36 Benjamin suante panin:
Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 37 Benjamin beh panin mi 35,400 a pha hi.
38 Dan suante panin:
Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-a a min uh a kigual ahi hi. 39 Dan beh panin mi 62,700 a pha hi.
40 Asher suante panin:
Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawhzui-in a min uh a kigual ahi hi. 41 Asherbeh panin mi 41,500 a pha hi.
42 Naphtali suante panin:
Kum sawmnih pan a tungsiah paltan tum thei ding pasal khempeuh, amau bawng’te le innkuante ciamtehna tawh kizui-in a min uh a kigual ahi hi. 43 Naphtali beh panin mi 53,400 a pha hi.
44 Hih mite pen Moses Aaron le amau innkuan ciat tanga a sem Israel makai sawm le nihte misimna ahi hi. 45 Israel mi paltan tum thei ding khempeuh kum sawmnih pan a tungsiah a innkuan zui-a kisim ahi hi. 46 A vekpi-a kigawm mi 603,550 a pha hi.
47 Tuate lakah Levi beh innkuan teng adangte tawh a kisim khawm kei hi. 48 TOPA in Moses tungah: 49 "Na misimna ah Israel dangte tawh Levi beh na simkhawm peuhmah kei ding hi. 50 Tua tangin, Levi-te Tecipanna biakbuk - a nazat khempeuh le tua tawh kisai na khempeuh uk dingin seh in. Amaute in biakbuk le a vanzat khempeuh a pua ding uh hi; amaute in cing ding uh a, a kimkot ah giahphual sat ding uh hi. 51 Biakbuk a kiphualsuan peuhpeuh ciangin Levi-te in phel ding uh a, biakbuk a kilam peuhpeuh ciangin Levi-te in a sem ding uh hi. Midang khatpeuh a kiangah a pai leh kithat ding hi. 52 Israel-te in a pawlpawlin a puanbukte uh lam ding uh a, amau satsa giahphual-a dialkhai nuai-ah a om tek ding uh hi. 53 Levi-te in ahileh Israel mipite tungah thangpaihna a tun loh nadingin biakbuk kimkot ah a puanbukte uh a lam ding uh hi. Levi-te in Tecipanna biakbuk kep ding tavuan a la ding uh hi," a ci hi.
54 TOPA in Moses a thupiak bang tektekin Israel-te in hihte khempeuh a sem uh hi.