Sa Siang le Sa Nin
11
1 TOPA in Moses le Aaron kiangah, 2 "Israel-te tungah, ‘Leitunga a nungta ganhingte khempeuh lakah na nek theih ding uh hihte ahi hi: 3 A khecin ciantaka a ka ganhing eknel hai peuhmah na ne thei ding uh hi.4 "‘Ganhing pawlkhat a khecin bek a ka, ahikeh eknel bek a hai om hi; tuate na ne peuhmah kei ding uh hi. Kala-oh in eknel a hai hangin a khecin a ka kei hi; tua pen note adingin a sianglo-a kiseh ahi hi. 5 Sakikh ba in eknel a hai hangin a khecin ka lo hi; tua pen no adingin a siang lo ahi hi. 6 Bilpi in eknel a hai hangin a khecin a ka kei hi; tua pen note adingin asiang lo ahi hi. 7 Tuateh vok a khecin kiciantakin a kat hangin eknel a hai kei hi; tua pen note adingin asiang lo ahi hi. 8 A sa na ne peuhmah kei ding uh a, a sisa zong na lawng kei ding uh hi; tuate note adingin a siang lo ahi hi.
9 "‘Tuipite le luituite sunga om a nungta ganhingte khempeuh lakah phe le lip a neite peuhmah na ne thei ding uh hi. 10 Ahi hangin tuipite ahikeh luite sunga om ganhing phe le lip a nei lo - tuipek thei ahi a, ahikeh tui sunga a nungta ganhing dangte khempeuh ahi zongin no adingin a kihhuai ahi hi. 11 Note in tuate na kih ding uh ahi nungsang a sa na ne peuhmah kei ding uh a, a sisate na kih pelmawh ding uh hi. 12 Tui sunga a nungta phe le lip a nei lo peuhmah note adingin a kihhuai ahi hi.
13 "‘Hihte a kihhuai ahi mana kih a na nek loh ding uh vasate ahi hi: Muvanlai, musane, luimu, 14 mumeika, musan nam khempeuh 15 va-ak nam khempeuh 16 simbu ki nei peuhmah, vabak, tuivakang, musi nam peuhmah, 17 keising, tuimu, simbupi 18 simbukang, gun vakang, tui vatawt 19 gun vapi, tuiva nam peuhmah, huihtun le bak cb ahi hi.
20 "‘A leng thei kheli nei ganhing peuhmah note adingin a kihhuai ahi hi. 21 Ahi zongin kha nei-a a khe li-a a pai na nek theih ding uh pawlkhatte: leitungah a zuan nading khe kikhep nei peuhmah. 22 Hihte lakah kauphe nam peuhmah, kaukhup, khuangbai ahikeh kauphe kisau-te ahi hi. 23 Ahi hangin kha nei ganhing kheli nei peuhmah na kih ding uh ahi hi.
24 "‘Hihte in note hong ninsak dingte ahi hi; tuate sisa a lawngkha peuhmah nitak mateng a siang lo ahi ding hi. 25 Hihte a sisa a tawmkha mi peuhmah a puansilhte sawp pelmawh dinga amah nitak mateng a siang lo hi ding hi.
26 "‘Ganhing a khecin ka napi ka siang taktak lo a eknel a hai lote note adingin a siang lo ahi hi; tuate khatpeuh a sisa a lawng peuhmah a siang lo ahi ding hi. 27 Khe li nei ganhingte lakah a khe bomin cin a nei peuhmah note adingin a siang lo ahi hi; tuate a sisa a lawngkha peuhmah nitak mateng a siang lo ahi hi. 28 Tuate a tawm khatpeuh in a puansilhte sawp pelmawh dinga amah nitak mateng a siang lo hi ding hi. Tuate note adingin a siang lo ahi hi.
29 "‘Leitunga a bokvak ganhingte lakah note adingin a siang lote in: bui, zusa, tangpi nam khempeuh, 30 innhik, thankik, tangteuh, saphulip le tawlbawkpi-te ahi hi. 31 Leitunga a awmtal ganhing khempeuh lakah note adingin a siang lo hihte ahi hi. Hihte a sisa a lawngkha peuhmah nitak mateng a siang lo ahi hi. 32 Hihte lakah khatpeuh sisa na khat tungah a kiat leh tua a tukna, a kizang na: sing, puan, savun ahikeh ippi ahi zongin a siang lo a suak hi. Tui-ah diah un; nitak mateng a siang lo hi dinga, tua ciangin a siang ding hi. 33 Tuate khat leibeel sungah a kiat leh a sunga om na khempeuh a siang lo hi dinga, a beel na sukham pelmawh ding uh hi. 34 Nek ding an khat tua banga a sianglo beel sungah tui in a buah khak leh a siang lo hi a, tui dawn ding tua bang beel sungah a om khak leh tua tui a siang lo a suak hi. 35 Tua bang ganhing sisa a tukna na khatpeuh a siang lo a suak hi; tua bang thuk ahikeh anbeel pel loin na suksiat ding ahi hi. Tuate a siang lo hi a, a siang lo-a na koih ding uh ahi hi. 36 Bangbang ahi zongin tuinak ahikeh tuibem kuangzawnte a siang veve hi a, ahi hangin hih ganhing sisate a lawng peuhmah a siang lo ahi hi. 37 Ganhing sisa khat a kituh ding khaici tung khatah a kiat leh a sianglai veve hi. 38 Ahi hangin a khaici tui-ah a kidiah khitin ganhing sisa tungah a kiat leh no adingin tua khaici a siang lo ahi hi.
39 "‘Note nek theih ganhing khatpeuh a sih leh tua a sisa ganhing a lawngkha mi khatpeuh nitak mateng a siang lo hi ding hi. 40 Ganhing sisa a ne mi khat peuhmah in a puansilhte sawp tektek dinga, nitak mateng amah a siang lo hi ding hi. Tua bang ganhing sisa a tawm peuhmah in a puansilhte sawp pelmawh dinga nitak mateng amah a siang lo hi ding hi.
41 "‘Leitunga a bokvak ganhing peuhmah note adingin a kihhuai hi a; nek loh ding ahi hi. 42 Leitungah bokvaka pai ahikeh a awma tal ahikeh kheli-a pai ahikeh khe tampi-a paite ahi zongin na ne kei ding uh hi; tuate kihhuai hi. 43 Hih ganhingte khatpeuhin kibuahsak kei in. Tuate hangin kisiang losak ahikeh tuate hangin nang le nang a siang lo kisuaksak kei in. 44 Keimah TOPA note Pasian ka hi hi; keimah siangtho ka hi manin no le no kisiansuahin siangtho un. Leitunga a bokvak ganhing khatpeuh hangin no le no kisiang losak kei un. 45 Keimah note Pasian ahi dingin Egypt pana hong pikhia TOPA ka hi hi; tua ahi manin siangtho un, bang hang hiam cih leh keimah ka siangtho hi.