Nadab le Abihu Sihna
10
1 Aaron tapa Nadab le Abihu te in amau gimnamtui beelte la uh a, a sungah mei koihin gimnamtui a sung uh hi; tua ciangin amaute in ama thupiakna tawh kilehbulhin a thu tawn loin TOPA mai-ah mei a pia uh hi. 2 Tua ciangin TOPA omna panin mei kuangkhia a, amaute kangtumin TOPA mai-ah a si uh hi. 3 Tua ciangin Moses in Aaron kiangah, "Hih in TOPA thugen ahi hi, amah in:‘Kei hong naihte lakah,
kei a siangtho ka hina ka lak ding hi;
mite khempeuh muhna-ah
kei hong kipahtawi ding hi,’ ci hi," a ci hi.
Aaron a daidide hi.
4 Moses in Aaron pano Uzziel tapate Mishael le Elzaphan-te sama, amaute kiangah, "Hih lai-ah hong pai un; mun siangtho mai panin giahphual pua ah na sanggamte uh puakhia un," a ci hi. 5 Tua ahi ciangin amaute pai uh a Moses sawl bangin a puantungsilh mah uh tawh giahphual pualamah a puakhia uh hi.
6 Tua khit ciangin Moses in Aaron le a tapa Eleazar le Ithamar kiangah, "Na samte uh gumsak ca kei unla na puan uh balkek kei un, na tua cih kei uh leh na si ding uh a, mipi bup tungah TOPA a heh ding hi. Ahi hangin na tanaute uh, Israel innkuan khempeuh, TOPA in mei-a a suksiatna hangin a thum thei ding uh hi. 7 Kikhopna Puanbuk lutna lawi kei un; na lawih uh leh TOPA sathau nilh note tungah baang ahi manin na si ding uh hi," a ci hi. Amaute in Moses cih bangin a hih uh hi.
8 Tua khit ciangin TOPA in Aaron kiangah, 9 "Nang le na tapate in Kikhopna Puanbuk sungah na pai peuhmah uh ciangin lenggahzu ahikeh a kibilh dang khatpeuh na dawn kei ding uh hi; na dawn uh leh na si ding uh hi. Hih in khang sawnsawnte donga a om den ding thuzek ahi hi. 10 A siangtho le a siangtho lo, asiang le anin na khen tektek ding uh a, 11 Moses tawna TOPA in amaute a piaksa thukipte khempeuh Israel-te na hilh ding uh hi" a ci hi.
12 Moses in Aaron le a omlai a tapate Eleazar le Itharmar-te tungah, "TOPA mai-a mei-a hal biaknate pana an-a biakna valte la unla silngo sawh loin biakna-tau kiangah ne un; ahang in, a siangtho pen ahi hi. 13 Mun siangtho khatah ne un, bang hang hiam cih leh TOPA mai-a mei-a hal biaknate panin nang le na tapate tanh ahi hi; ahang in, tua bang dingin kei tungah thu hong kipia hi. 14 Ahi hangin nang le na tanute na tapate in a kivei a iik le a kipiasa a phei na ne thei ding uh hi. A siangtho-a kisehna munah tuate ne un; Israel-te kilawmtakna biakna ab pana nang le na tate tanh dinga hong kipia ahi hi. 15 A kipiasa a phei le a kivei a iik, mei-a hal biakna lakah athaute tawh TOPA mai-ah vei-a biakna dingin nong tawi ding uh hi. Hih in TOPA hong thupiak bangin nang le na tate in na kaih den ding uh ahi ding hi," a ci hi.
16 Moses in mawhna hanga biakna keel thu a kan ciangin kihaltum khin hi, cih thei-a a om lai Aaron tapa Eleazar le Ithamar tungah heh a amaute kiangah, 17 "Bang hangin mawhna hanga biakna mun siangtho huam sungah ne lo na hi uh hiam? Tua in a siangthopen ahi hi; TOPA mai-ah amaute adingin thoihdamna bawla mipite khialhna lakmang nadingin no tunga hong kipia ahi hi. 18 Munsiangtho pena, a sisan a kilah loh nungsang kong thupiak bangin tua keel, mun siangtho huam sungah na nek ding uh ahi hi," a ci hi.
19 Aaron in Moses kiangah, "Tuni-in amaute in amau mawhna hanga biakna le a meihal biakna uh TOPA mai-ah a pia uh hi; ahi hangin tua bang nate kei tungah hong piang hi. Tuni-in mawhna hanga biakna ne hi leng TOPA a lungdam ding hiam?" ci-in a dawng hi. 20 Moses in hih thute a zak ciangin a lungkim hi.