Khialhna Hanga Biakna
7
1 "‘Hihte in a siangtho pen khialhna hanga biakna ngeinate ahi hi. 2 Khialhna hanga biakna pen meihal biakna gawhna munah kigo dinga, a sisanin biakna-tau pang khempeuh kitheh ding hi. 3 Biakna-a kipia ding athaute: a mei thau le a sungkuate a tuam athau, 4 a kawngbom kianga a kalte gel a kimkota athau tawh, le a kalte tawh lakkhiat khawm a sin tuam tawh ahi hi. 5 Siampipa in TOPA tungah mei-a hal biakna khat dingin tuate a hal ding hi. Tua in khialhna hanga biakna ahi hi. 6 Siampi innkuana pasal khempeuh in ne thei ding uh hi; ahi hangin siangtho munah a kine pelmawh ding hi; tua in a siangtho pen ahi hi.7 "‘Mawhna hanga biakna le khialhna hanga biakna-ah ngeina a kibangin kizang hi: tuate amaute adingin thoihdamna bawlsak siampite aa ahi hi. 8 Mi khatpeuh adingin meihal biakna a piaksak siampipa in a vun tang thei hi. 9 An-a biakna thuk sunga ki-em ahileh sikbel ahikeh beelpei tunga kihuan peuhmah biakna-a a pia siampite aa hi a, 10 an-a biakna peuhmah, sathau tawh a kihel-a, akeu guak ahi zongin Aaron tapate khempeuh in a kikima a tanh uh ahi hi.
Kilawmtakna Biakna
11 "‘Hihte in, mi khat in TOPA tungah kilawmtakna biakna-a aa a piak theih ngeinate ahi hi:
12 "‘Amah in lungdamkohna-a a piak ahileh, tua lungdamkohna-a biakna tawh, silngo sawhloh sathau tawh a kimek anpheng, silngo sawh loh sathau-a kizut mohnip le sathau tawh limtaka kimek khawm annel mohpheng-te a pia khawm ding hi. 13 Amah in lungdamkohna, kilawm- takna biakna tawh silngo sawh loh anlum tawh biakna piakhawm ding hi. 14 TOPA tunga piak dingin biakna a namkimin khat tek a paipih ding hi; tua pen kilawmtakna biakna-a sisan a pia siampipa aa ahi hi. 15 Ama lungdamkohna kilawmtakna biakna sa pen a kipiak ni-in kigai khin ding hi; amah in zingsang dong bangmah a sit kei ding hi.
16 "‘Ahi ta zongin a biakna pen kiciamna khat ahikeh utthu-a biakna ahileh tua a biakpiakna pen a piak ni-in kigai khin dinga, ahi zongin a kikhamval leh a zing ciangin kine thei lai ding hi. 17 A ni thumni dong a val lai biakpiakna sa peuhmah kihaltum ding hi. 18 A ni thum ni-in kilawmtakna biakna sa khatpeuh a kinek leh tua pen kisang lo ding hi. Biakna-a a piapa adingin bangmah in a kisim kei ding hi; ahang in, tua pen anin ahi hi; tua sa a nepa siakhu ding hi.
19 "‘A nin-a kisehsa na khatpeuh tawh a kisawhkha sa a kine peuhmah kei ding hi; pel loin kihaltum ding hi. Sa dang ahileh a sianga kiseh mi peuhmah in ne thei ding hi. 20 Ahi hangin a sianglo mi khatpeuh in kilawmtakna biakna-a TOPA a kipia sa khatpeuh a nek leh tua mipa a mipihte panin kikhenkhia pelmawh ding hi. 21 Mi khatpeuh in a siang lo na khat a lawnkhak leh - mihing siantho-lohna ahikeh ganhing siantho-lohna khat ahikeh a siang lo a kihhuai na khatpeuh - tua khit ciangin kilawmtakna biakna-a TOPA a kipiasa a nek leh tua mipa a mipihte panin kikhenkhia pelmawh ding hi,’ ci in," a ci hi.
Sathau le Sisan Nek Kikham
22 TOPA in Moses tungah, 23 "Israel-te tungah: Bawngte, tuute ahikeh keelte thau ne kei un. 24 Ganhing a sisa-a kimute ahikeh gamsa nek ganhing thaute, nadanga zat dingin kizang thei dinga ahi hangin na ne peuhmah kei ding uh hi. 25 TOPA tungah meihal biakna-a kizang thei ding bb ganhing thau a ne peuhmah a mipihte panin a kikhenkhia pelmawh ding hi. 26 Na tenna peuhpeuhuah gamsa ahikeh vasa khatpeuh sisan na ne peuhmah kei ding uh hi. 27 Sisan a ne mi khatpeuh a om leh a mipihte panin kikhenkhia pelmawh ding hi,’ ci-in gen in," a ci hi.
Siampite’ Tanh
28 TOPA in Moses tungah, 29 "Israel-te tungah: TOPA tungah kilawmtak-na biakna hong paipih mi khatpeuh in tua laka pawlkhat TOPA tunga biakpiakna-in hong tawi uh hen. 30 Ama khut tektekin TOPA tungah mei-a hal biakna a tawi ding hi; amah in athau a iik tawh tawikhawm dinga, TOPA mai-ah vei-a biakna-in a iik a vei ding hi. 31 Siampipa in biakna-tau tungah a thau hal ding hi, ahi hangin a iik pen Aaron le a tapate tanh ahi hi. 32 Kilawmtakna biakna a taklam phei siampipa tanh dingin na pia ding hi. 33 Kilawmtakna biakna-a sisan le athaute a pia Aaron tapa in a ma tanh dingin a taklam phei tang ding hi. 34 Israel kilawmtakna biakna panin a kiveisa a iik le a kipiasa a phei ken ka la zo a, tuate siampi Aaron le a tapate in Israel tung pana a tanh den dingin ka pia khin zo hi,’ ci in," a ci hi.
35 Hih in, TOPA tungah siampi nasem dinga Aaron le a tapate a kipiak ni-ua, TOPA mai-a meihal biaknate pana kisehkhia amau tanh ding ahi hi. 36 Amaute sathau a kinilh ni-in, Israel in khang sawnsawn donga Israel-te tanh den dingin TOPA in amaute tungah a piak ahi hi.