6
1 TOPA in Moses tungah: 2 "Mi khatpeuh in, a vengpa in muanga na a kepsakna ah a khemna ahikeh kepsak lo ahikeh a kigu ahikeh amah a khem suahna tawh TOPA tungah a muanhuai lo a suah leh 3 ahikeh amah in na kimansuah khat mu in zuau gena, ahikeh amaan lopi-in a tomlawh leh, ahikeh tua bang mihing bawl theih mawhna a bawl leh - 4 tua in khiala a mawh a suahsak leh amah in a guksa pen ahikeh khema a laksak ahikeh ama kepsa van ahi zongin van kimangsak a muh, 5 ahikeh zuauthu tawh a tomlawhna khatpeuh a pia kik pelmawh ding hi. A kimin din kik dinga aman zah sehnga suah sehkhat behlapin mawhna hanga biakna a piak ni-in a neipa tungah a vekpi in a pia khin ding hi. 6 Amah in a dantuahna-in siampipa tungah tua pen TOPA tungah ama khialhna hanga biakna dingin tuuhon lak pan aman ding a kisehsa tawh kituak a sit baang lo tuutal khat a paipih ding hi. 7 Hici bangin siampipa in TOPA mai-ah ama adingin thoihdamna bawlsak dinga, tua ciangin hih bang nate sema, a mawh a suahna tawh kisai-in ama mawhna kimaisak ding hi," a ci hi.Meihal Biakna
8 TOPA in Moses tungah: 9 "Aaron le a tapate hih thupiak pia in: Meihal biakna ngeinate hihte ahi hi: ‘Meihal biakna, zan khuavakin zingsang dong biakna-tau-a tap tungah om den dinga, biakna-tau laizangah pel loin mei kuangden ding hi. 10 Tua ciangin siampipa in saihadial puan silh dinga, a pumpi tungah saihadial puan sungsilhin, biakna-tau tunga meihal biakna meivute luakkhia-in, tuate biakna-tau pangah a koih ding hi. 11 Tua ciangin a puansilhte suahkhia-in adangte silh dinga, giahphual pua-a a siangtho-a kiseh mun khatah vutte a buakhia ding hi. 12 Biakna-tau tungah pel loin mei kuang den dinga; a mit ngei peuhmah kei ding hi. Zingsang simin siampipa in sing cihbeh dinga, mei tungah meihal biaknate gualin tua tungah kilawmtakna biakna ca thaute a hal ding hi. 13 Biakna-tau tungah pel loin mei kuang den dinga, a mit ngei peuhmah kei ding hi.
An-a Biakna
14 "‘Hihte an-a biakna ngeinate ahi hi: Aaron tapate in biakna-tau mai-a TOPA mai-ah tuate a paipih ding uh hi. 15 Siampipa in annel limci le sathau khut dim khat an-a biakna gimnamtui khempeuh le phawkna khenkhiat gawmin TOPA a lungkimsak gimnamtui ahi dingin biakna-tau tungah a hal ding hi. 16 A omlai teng Aaron le a tapate in ne ding uh a, ahi hangin tuate silngo sawh lohin siangtho munah a ne ding uh hi; amaute in tuate Kikhopna Puanbuk huang sungah a ne ding uh hi. 17 Silngo tawh a ki-em peuhmah kei ding hi; kei hong kipia mei-a hal biakna panin a tanh dingun ka piaksa ahi hi. Mawhna hanga biakna le khialna hanga biaknate mah bangin a siangtho pen ahi hi. 18 Aaron suan pasal khempeuh in ne thei ding uh hi. Tua in khang sawnsawnte adingin TOPA tungah mei-a hal biaknate panin ama tanh ding ngeina ahi hi. Tua tawh a kisukha na khatpeuh a siangtho db suak ding hi,’ ci in," a ci hi.
19 TOPA in Moses tungah, 20 "Hih in Aaron le a tapate in amah ec sathau a kinilh ni-a TOPA tunga a paipih ding uh biakna ahi hi: a hunhuna kipuak an-a biakna annel limci panin ephah fd khat sehsawm suah sehkhat, zingsangin alang, nitakin alang a pia ding hi. 21 Hoihtakin mekman inla belpei-in hoihtakin sathau tawh kang in, balnenin geTOPA a lungkimsak an-a biakna gimnamtui dingin paipih in. 22 Ama za a luah sathau kinilh a tapa in a hih ding hi. Tua pen TOPA in a hunhun-a a tanh den hi-a, a kihaltum kiuhkeuh ding hi. 23 Siampi khat in an-a biakna-a a piak peuhmah a kihaltum kiuhkeuh ding hi; a kine peuhmah kei ding hi," zong a ci lai hi.
Mawhna Hanga Biakna
24 TOPA in Moses tungah, 25 "Aaron le a tapate tungah: ‘Hihte in mawhna hanga biakna ngeinate ahi hi: mawhna hanga biakna in meihal biakna kigawhna mun TOPA mai-ah kigo ding hi; tua in a siangtho pen ahi hi. 26 Biakna-a a pia tua siampipa in tua a ne ding hi; tua pen Kikhopna Puanbuk huang sung siangtho munah a kine ding hi. 27 Tua sa tawh a kisukha na peuhmah a siangtho suak dinga, sisan in a puantualpi a theh khak leh siangtho munah a sawp ding hi. 28 Sa kihuanna leibel a kisukham pelmawh ding hi; ahi hangin taubelin a kihuan leh a beel kiatsiangin tui-in a kisawp siang sinsen ding hi. 29 Siampi innkuan sunga pasal peuhmah in a ne thei ding hi; tua in a siangtho pen ahi hi. 30 Ahi hangin Mun Siangtho ah thoihdamna bawl nadinga Kikhopna Puanbuk-a kipuak sisan kilakna mawhna hanga biakna sa a kine peuhmah kei ding hi; kihaltum pelmawh ding hi.